Oinsá mak orasaun bele ajuda Ita?
Bainhira Pamela hetan moras neʼebé sériu tebes, nia buka ajuda husi doutór sira. Maibé nia mós husu Maromak atu fó forsa ba nia hodi bele tahan. Orasaun ajuda nia ka lae?
Pamela dehan: “Bainhira haʼu halaʼo hela tratamentu ba haʼu-nia moras kankru, dala ruma haʼu sente taʼuk tebes. Maibé bainhira haʼu reza ba Maromak Jeová, haʼu sente kalma iha laran no bele hanoin ho loloos. Toʼo agora haʼu nafatin sente moras tebes, maibé orasaun ajuda haʼu atu iha hanoin pozitivu. Se ema husu haʼu sente oinsá, haʼu dehan, ‘Haʼu sente moras hela, maibé haʼu kontente!’”
Maibé klaru katak ita la hein toʼo ita hasoru susar boot mak foin ita halo orasaun. Ita hotu hasoru problema, kiʼik ka boot, no ita hakarak hetan ajuda atu bele tahan problema sira-neʼe. Oinsá mak orasaun bele ajuda ita?
Bíblia dehan: “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.” (Salmo 55:22) Neʼe halo ita sente kmaan tebes! Entaun, oinsá mak orasaun bele ajuda Ita? Bainhira Ita halo orasaun ba Maromak iha dalan neʼebé loos, nia sei fó buat neʼebé Ita presiza atu bele tahan Ita-nia problema sira.—Haree kaixa “Orasaun bele ajuda Ita.”