Bainhira mak mundu nia rohan toʼo mai? Saida mak Jesus hatete?
Hanesan ita aprende ona iha informasaun antes neʼe, bainhira Bíblia koʼalia kona-ba mundu nia rohan, neʼe laʼós katak mundu neʼe ka ema hotu sei lakon tiha. Maibé, neʼe katak sistema aat no ema neʼebé apoia ida-neʼe mak sei lakon. Tuir Bíblia, bainhira mak ida-neʼe sei akontese?
HAREE TOʼOK BUAT RUA NEʼEBÉ JESUS TEMI KONA-BA MUNDU NIA ROHAN:
“Matan-moris nafatin bá, tanba imi la hatene loron no oras.”—MATEUS 25:13.
“Kontinua hateke, no matan-moris nafatin bá, tanba imi la hatene tempu neʼebé Maromak hili tiha ona.”—MARCOS 13:33.
La iha ema ida mak hatene ho loloos bainhira mak sistema aat neʼe nia rohan toʼo mai. Maski nuneʼe, Maromak hili tiha ona “loron no oras” kona-ba mundu nia rohan. (Mateus 24:36) Neʼe katak ita la iha duni dalan atu hatene bainhira mak mundu nia rohan toʼo mai ka lae? Lae. Jesus hanorin ninia dixípulu sira kona-ba sinál sira neʼebé hatudu katak mundu nia rohan besik loos ona.
SINÁL SIRA
Neʼe mak sinál sira neʼebé hatudu katak “mundu neʼe nia rohan mai ona”. Jesus hatete: “Nasaun ida sei kontra nasaun seluk no ukun ida sei kontra ukun seluk, no rai-hamlaha no rai-nakdoko sei mosu iha fatin oioin.” (Mateus 24:3, 7) Nia mós hatete katak sei iha “moras-peste oioin”. (Lucas 21:11) Ita haree buat neʼebé Jesus temi akontese duni ohin loron ka lae?
Funu, hamlaha, rai-nakdoko no moras oioin akontese daudaun iha ita-nia tempu. Porezemplu, iha tinan 2004 rai-nakdoko no tsunami akontese iha Oseanu Índia no maizumenus ema naʼin-225.000 mak mate. Iha tinan tolu nia laran, pandemia COVID-19 halo ema maizumenus naʼin millaun 6,9 iha mundu tomak mate. Jesus dehan sinál sira hanesan neʼe hatudu katak mundu nia rohan besik ona.
“LORON IKUS SIRA”
Bíblia temi tempu antes mundu nia rohan nuʼudar “loron ikus sira”. (2 Pedro 3:3, 4) Segundu Timóteo 3:1-5 hatete katak iha loron ikus sira ema nia hahalok sei sai aat liután. (Haree kaixa “Ema nia hahalok iha loron ikus sira”.) Ita haree ka lae ema hatudu hahalok hanesan hanoin an deʼit, kaan-teen, siʼak, no la hadomi malu? Buat sira-neʼe mós hatudu katak mundu nia rohan besik loos ona.
Loron ikus sira sei toʼo bainhira? Bíblia dehan, “hela tempu uitoan tan”. Tuirmai, Maromak sei halakon tiha “sira neʼebé estraga daudaun mundu”.—Apokalipse 11:15-18; 12:12.
MUNDU PARAÍZU BESIK ONA!
Maromak marka tiha ona loron no oras bainhira mak nia sei halakon tiha sistema aat hotu. (Mateus 24:36) Liafuan diʼak ida tan mak Maromak “lakohi ema ida lakon”. (2 Pedro 3:9) Nia hakarak ema hotu hetan salvasaun no moris iha mundu paraízu, tan neʼe nia fó oportunidade ba ema atu aprende kona-ba ninia hakarak no halo tuir.
Maromak halo ona arranju kona-ba serbisu haklaken iha mundu tomak atu ajuda ema aprende oinsá bele tama ba mundu foun iha Maromak nia Ukun okos. Jesus hatete katak liafuan diʼak kona-ba Maromak nia Ukun sei haklaken “iha mundu tomak”. (Mateus 24:14) Testemuña ba Jeová iha mundu tomak uza oras biliaun ba biliaun atu haklaken no hanorin ema kona-ba esperansa husi Bíblia. Jesus hatete katak serbisu haklaken neʼe sei halaʼo iha mundu tomak antes mundu nia rohan toʼo mai.
Tempu ba ema nia ukun besik ona atu remata. Maibé liafuan diʼak mak ita bele hetan salvasaun no moris iha mundu paraízu neʼebé Maromak promete ona. Informasaun tuirmai sei koʼalia kona-ba oinsá Ita bele tama ba mundu foun.
Jesus nia profesia kona-ba “loron ikus sira” fó ita esperansa