“Agora haʼu gosta tebes serbisu haklaken”

HAʼU LAKON HAʼU-NIA KSOLOK

Triste mak bainhira haʼu tinan maizumenus 13, haʼu-nia relasaun diʼak ho Jeová komesa sai fraku. Haʼu haree katak haʼu-nia kolega eskola iha liberdade barak, no haʼu mós hakarak hanesan sira. Haʼu sente katak haʼu-nia inan-aman nia regra no matadalan husi Bíblia halo haʼu la livre, no haʼu hanoin adora Jeová mak todan tebes. Maski haʼu sempre fiar katak Jeová iha, maibé haʼu la sente besik ba nia.

Maski haʼu nafatin bá haklaken, maibé haʼu haklaken uitoan deʼit no la halo ho laran. Bainhira haʼu bá haklaken, haʼu la prepara nanis. Tan neʼe, susar ba haʼu atu komesa no kontinua atu dada lia ho ema. Rezultadu mak haʼu la iha vizita fali no estudante Bíblia, no haʼu la sente kontente bainhira haklaken. Ida-neʼe halo haʼu la gosta liután serbisu haklaken. Dala ruma haʼu hanoin: ‘Oinsá ema seluk bele halo ida-neʼe semana-semana ka fulan-fulan?’

Bainhira haʼu tinan 17, haʼu hakarak tebes atu sai husi uma. Entaun, haʼu arruma haʼu-nia sasán, sai husi uma, no muda ba Austrália. Haʼu-nia inan-aman sente triste bainhira haʼu sai husi uma. Sira hanoin barak. Maibé sira fiar katak haʼu sei kontinua serbí Jeová.

Iha Austrália, haʼu-nia atividade espirituál sai menus liután. Haʼu komesa falta reuniaun no habelun ho joven sira neʼebé hanesan ho haʼu. Sira tuir reuniaun no kalan tuirmai sira bá diskoteka atu hemu tua no dansa. Bainhira haʼu hanoin fali kona-ba tempu neʼe, haʼu rekoñese katak maski haʼu nafatin iha lia-loos, maibé haʼu mós moris tuir mundu. Maski nuneʼe, haʼu sente katak haʼu-nia fuan sorin iha lia-loos no fuan sorin iha mundu.

HAʼU APRENDE LISAUN IMPORTANTE IDA

Maizumenus tinan rua liutiha, haʼu hasoru irmán ida neʼebé la ho neon book haʼu atu hanoin kona-ba dalan neʼebé haʼu halaʼo haʼu-nia moris. Haʼu hela hamutuk ho irmán klosan naʼin-haat. Ami konvida katuas área no ninia feen naran Tamara atu hela hamutuk ho ami durante semana ida. Bainhira ninia laʼen okupadu ho asuntu kongregasaun nian, nia gasta tempu hamutuk ho ami no hamnasa hamutuk ho ami. Haʼu gosta tempu neʼe. Tamara mak ema neʼebé haraik an, no fasil atu koʼalia ho nia. Haʼu hakfodak katak ita bele sente kontente bainhira gasta tempu hamutuk ho ema neʼebé okupadu loos atu serbí Jeová.

Tamara laran-manas tebes. Ninia domin ba lia-loos no ba serbisu haklaken book duni haʼu. Nia kontente atu serbí Jeová ho laran tomak. Maibé haʼu la sente kontente tanba haʼu la serbí Jeová ho laran tomak. Ninia hanoin neʼebé pozitivu no ninia ksolok fó impaktu duni ba haʼu-nia moris. Ninia ezemplu halo haʼu hanoin kona-ba lia-loos importante ida: Jeová hakarak ita hotu atu serbí nia “ho haksolok” no “ho haklalak haksolok nian”.—Sal 100:2.

HAʼU KOMESA GOSTA FALI SERBISU HAKLAKEN

Haʼu hakarak sente haksolok hanesan Tamara. Maibé atu bele sente hanesan neʼe, haʼu presiza halo mudansa boot. Haʼu la halo kedas mudansa boot, maibé haʼu halo mudansa kiʼik oioin. Haʼu komesa prepara ba serbisu haklaken, no dala ruma haʼu foti pioneiru estra. Neʼe ajuda haʼu atu la sente laran-taridu no sai fiar an liután. Tanba haʼu uza Bíblia beibeik iha serbisu haklaken, neʼe halo haʼu gosta liután atu haklaken. Lakleur, haʼu foti pioneiru estra fulan-fulan.

Haʼu komesa habelun ho ema oioin neʼebé kontente atu serbí Jeová ho laran tomak. Sira-nia ezemplu diʼak ajuda haʼu atu buka-hatene saida mak importante iha haʼu-nia moris no mós haburas toman atu lee Bíblia loroloron. Haʼu komesa gosta liután atu haklaken no tuirmai haʼu serbí nuʼudar pioneiru regulár. Haʼu sente kontente no kmaan atu sai parte ba kongregasaun. Ba tempu kleur ona haʼu la sente hanesan neʼe.

HAʼU HETAN KOLEGA HAKLAKEN NEʼEBÉ PERMANENTE

Tinan ida tuirmai, haʼu hasoru Alex. Nia laran-diʼak, hadomi tebes Jeová no gosta serbisu haklaken. Iha tempu neʼebá, nia serbí nuʼudar atan ba kongregasaun no mós serbí nuʼudar pioneiru ba tinan neen. No maizumenus durante fulan ualu, nia ajuda serbisu haklaken iha rai-Malavi. Nia gasta tempu ho misionáriu sira no sira-nia ezemplu book nia. Sira anima nia atu kontinua tau uluk Jeová iha ninia moris.

Iha tinan 2003, haʼu no Alex kaben. No husi tempu neʼebá, ami kontinua haklaken tempu-tomak hamutuk. Ami aprende buat furak oioin no Jeová haraik bensaun oioin mai ami.

JEOVÁ HARAIK BENSAUN BARAK TAN

Iha tinan 2009, ami simu konvite atu serbí nuʼudar misionáriu iha Timor-Leste. Ami hakfodak, taʼuk no kontente iha tempu hanesan. Fulan lima liutiha, ami toʼo iha Dili.

Ami presiza halo mudansa oioin iha ami-nia moris. Ami presiza sai toman ho kultura, língua, hahán no situasaun moris neʼebé foun. Bainhira haklaken, ami hasoru beibeik ema neʼebé kiak, la iha edukasaun no moris susar. Ami haree ema barak neʼebé iha problema fíziku no emosaun tanba funu no violénsia.a

Haklaken iha Timor-Leste mak furak tebes. Porezemplu, haʼu hasoru feto joven ida naran Mariab neʼebé tinan 13. Ninia inan mate tinan balu antes neʼe, no nia ladún hasoru ninia apá. Hanesan ho joven seluk, Maria la hatene atu halo saida ho ninia moris. Haʼu hanoin-hetan loron ida bainhira nia tanis no fó sai ninia sentimentu mai haʼu. Maibé haʼu la komprende buat neʼebé nia koʼalia tanba haʼu seidauk hatene koʼalia Tetun ho moos. Haʼu halo orasaun ba Jeová no husu Jeová atu ajuda haʼu hodi haʼu bele fó laran-manas ba nia, no tuirmai haʼu komesa lee eskritura sira neʼebé bele fó kmaan ba nia. Durante tinan hirak-neʼe nia laran, haʼu haree katak lia-loos troka duni ninia hahalok, dalan neʼebé nia hatais no ninia moris. Nia hetan batizmu, no agora nia rasik estuda Bíblia ho ema. Ohin loron, Maria iha família espirituál neʼebé boot no nia mós sente domin.

Jeová haraik bensaun ba serbisu haklaken iha Timor-Leste. Maski irmaun-irmán barak hetan batizmu iha tinan sanulu nia laran deʼit, maibé sira barak mak serbí nuʼudar pioneiru, atan ba kongregasaun ka katuas. Irmaun-irmán seluk serbí iha eskritóriu tradusaun nian no ajuda atu prepara ai-han espirituál iha língua lokál sira. Haʼu sente kontente bainhira rona irmaun-irmán sira kanta iha reuniaun, haree sira-nia oin-midar no mós haree sira laʼo ba oin iha lia-loos.

MORIS NEʼEBÉ KONTENTE TEBES

Ami-nia knaar iha Timor-Leste la hanesan duni ho Austrália, maibé ami kontente tebes ho ami-nia moris. Dala ruma, ami saʼe mikrolet neʼebé nakonu ho ema, no ema balu lori ikan maran no mós modo butuk husi merkadu. Dala ruma ami estuda Bíblia ho ema iha sira-nia uma neʼebé kiʼikoan no mós manas no la iha simente, no manu-inan sira mós halai bá-mai. Maski hasoru susar sira, haʼu sempre hanoin: ‘Knaar neʼe kapás.’

Bainhira haʼu hanoin fali kona-ba tempu uluk, haʼu agradese tanba haʼu-nia inan-aman hakaʼas an atu hanorin haʼu kona-ba Jeová no apoia haʼu, inklui mós bainhira haʼu-nia relasaun ho Jeová sai fraku. Haʼu-nia esperiénsia moris mak evidénsia katak liafuan iha Provérbios 22:6 mak loos. Haʼu-nia inan-aman orgullu ba haʼu no Alex. Sira kontente atu haree katak ami serbí Jeová. Hahú husi tinan 2016, ami serbí nuʼudar katuas área iha sukursál Australásia nia territóriu.

Susar atu fiar katak uluk haʼu la gosta haklaken. Agora haʼu gosta tebes serbisu haklaken. Haʼu aprende katak maski buat oioin akontese iha haʼu-nia moris, maibé kontente neʼebé loos mai deʼit husi serbí Jeová ho laran tomak. Tinan 18 neʼebé haʼu serbí Jeová hamutuk ho Alex mak tempu neʼebé kontente liu hotu. Agora haʼu komprende katak buat neʼebé David hatete ba Jeová mak loos: “Ema hotu neʼebé buka protesaun husi Ita sei haksolok; sira sei haklalak ho haksolok nafatin. . . . No ema sira neʼebé hadomi Ita-nia naran sei haksolok tanba Ita.”—Sal 5:11.