Moris kontente iha Jeová nia serbisu

Tinan ida tuirmai, Betel fó sai anúnsiu katak presiza voluntáriu atu serbí iha sukursál Áfrika Súl hodi uza mákina print neʼebé foun. Haʼu hatama haʼu-nia naran, no kontente loos kuandu sira hili haʼu. Sira mós hili irmaun naʼin-tolu husi sukursál Kanadá. Sira-nia naran mak Dennis Leech, Bill McLellan no Ken Nordin. Betel hatete katak sira sei fó deʼit billete bá nian.

Haʼu telefone haʼu-nia amá, hodi dehan: “Amá, haʼu hakarak hatete buat ruma. Haʼu atu bá Áfrika Súl.” Haʼu-nia amá mak ema neʼebé kalma, iha relasaun diʼak ho Jeová no fiar metin. Maski nia la koʼalia barak, maibé haʼu hatene katak nia apoia haʼu-nia desizaun. Haʼu-nia apá no amá triste tanba haʼu sei hela dook, maibé sira apoia haʼu.

MUDA BA ÁFRIKA SÚL

Ami naʼin-haat simu treinamentu durante fulan tolu iha Betel Booklyn no aprende oinsá atu uza mákina print ida. Tuirmai, ami saʼe ró neʼebé tula sasán atu bá Cape Town, Áfrika Súl. Iha tempu neʼebá, haʼu tinan 20. Kuandu toʼo iha Cape Town, ami saʼe komboiu iha kalan atu bá Johannesburg. Fatin primeiru neʼebé komboiu para iha dadeer-saan mak knua kiʼik iha área Karoo. Fatin neʼe iha rai-rahun barak, ahi-suar barak no rai-manas. Ami naʼin-haat hateke sai liuhusi janela no hanoin katak fatin neʼe oin-seluk loos. Ami hanoin barak kona-ba ami-nia knaar foun. Liutiha tempu balu bainhira ami vizita fali área neʼe, ami rekoñese katak knua sira-neʼe mak furak no hakmatek.

Durante tinan barak, haʼu-nia knaar mak atu uza mákina print ida hodi print revista Matan-moris bá! no Livru Haklaken. Sukursál print revista iha língua Afrikanu oioin, laʼós deʼit ba Áfrika Súl maibé mós ba nasaun seluk iha Áfrika. Ami kontente tanba bele uza mákina foun neʼe atu print publikasaun barak.

Tuirmai haʼu serbisu iha departamentu neʼebé tau matan ba buat oioin neʼebé liga ho print, haruka publikasaun no serbisu tradusaun. Haʼu okupadu loos, maibé kontente.

KABEN NO KNAAR FOUN

Iha tinan 1968, haʼu kaben ho irmán pioneiru ida naran Laura Bowen neʼebé hela besik Betel. Nia mós ajuda ketik iha Departamentu Tradusaun nian. Iha tempu neʼebá, ema neʼebé foin kaben labele hela nafatin iha Betel, tan neʼe ami simu knaar atu serbí nuʼudar pioneiru tempu-tomak. Haʼu hanoin barak. Durante tinan sanulu haʼu serbí iha Betel, haʼu sempre iha hahán no hela-fatin, tan neʼe haʼu hanoin barak se osan neʼebé ami simu nuʼudar pioneiru tempu-tomak bele toʼo ba ami-nia presiza ka lae. Fulan-fulan ami simu osan rand 25 kuandu ami kumpre ami-nia oras haklaken, vizita fali, no fahe livru. Iha tempu neʼebá, neʼe mak dolar Amerikanu 35. Ami uza osan neʼe atu selu uma, transporte, hahán, médiku no mós gastu sira seluk.

Ami simu knaar atu serbí iha grupu kiʼik besik sidade Durban, besik Oseanu Índiku. Iha área neʼe, iha ema barak husi Índia. Sira mak bei-oan husi serbisu-naʼin sira neʼebé mai Áfrika Súl atu serbisu hodi halo masin-midar iha tinan maizumenus 1875. Agora sira halo serbisu seluk, maibé sira kontinua moris tuir sira-nia kultura no teʼin sira-nia hahán tradisionál, inklui karíl neʼebé gostu loos. Sira koʼalia Inglés, tan neʼe fasil ba ami atu haklaken ba sira.

Pioneiru tempu-tomak tenke hatama oras 150 fulan-fulan, tan neʼe haʼu no Laura planu atu haklaken oras neen iha loron primeiru. Rai-manas loos. Ami la iha vizita fali no estudante Bíblia, tan neʼe ami tenke haklaken uma ba uma durante oras neen. Haʼu sente ami haklaken kleur ona, maibé bainhira haʼu hateke ba relójiu, ami foin mak haklaken ba minutu 40. Haʼu hanoin, oinsá mak ami bele kumpre knaar neʼe?

Lakleur ami sai toman. Loroloron ami lori paun no sopa ka kafé iha termu laran. Bainhira ami presiza deskansa, ami para karreta iha ai-mahon no dala ruma labarik Indianu balu hamriik hodi hateke ami. Loron balu liutiha, ami rekoñese katak liutiha oras rua ka tolu, tempu liu lalais deʼit.

Ami kontente atu fahe lia-loos husi Bíblia ba ema laran-luak sira iha ami-nia haklaken-fatin. Ema Indianu sira hatudu respeitu, laran-diʼak no hamtaʼuk Maromak. Sira barak nia relijiaun mak Indú no sira simu mensajen neʼebé ami haklaken ba sira. Sira gosta atu aprende kona-ba Jeová, Jesus, Bíblia, esperansa kona-ba ema mate no mundu foun neʼebé nakonu ho dame. Liutiha tinan ida, ami iha estudante Bíblia naʼin-20. Loroloron ami han-meiudia hamutuk ho família oioin neʼebé estuda ho ami. Ami kontente tebes ho ami-nia knaar.

Lakleur ami simu knaar seluk. Ami serbí nuʼudar katuas área no tau matan ba área sira besik Oseanu Índiku. Semana-semana ami hela ho família ida no haklaken ho irmaun-irmán oioin atu anima sira. Sira haree ami nuʼudar sira-nia família, ami halimar ho sira-nia oan, no mós animál hakiak. Ami kontente atu serbí nuʼudar katuas área durante tinan rua. Maibé derrepente sukursál telefone ami no hatete: “Ami hakarak imi serbí fali iha Betel.” Haʼu hatán: “Ami kontente ona ho ami-nia knaar.” Maski nuneʼe, ami prontu atu simu knaar naran deʼit.

SERBÍ FALI IHA BETEL

Haʼu-nia knaar iha Betel mak iha Departamentu Serbisu nian, no haʼu iha priviléjiu atu serbisu hamutuk ho irmaun maduru barak neʼebé iha esperiénsia. Iha tempu neʼebá, bainhira katuas área vizita tiha kongregasaun ida, nia haruka relatóriu ba sukursál. Tuirmai Departamentu Serbisu nian sei haruka karta ba kongregasaun neʼe atu anima no fó matadalan tuir katuas área nia relatóriu. Neʼe mak serbisu boot ba ami-nia sekretáriu sira neʼebé tradús karta sira-neʼe husi língua Xhosa, Zulu, no língua sira seluk ba língua Inglés. No tuirmai tradús karta sira husi Departamentu Serbisu nian ba língua Afrikanu oioin. Haʼu hafolin tebes tradutór sira neʼebé serbisu makaʼas no ajuda haʼu atu komprende susar neʼebé irmaun-irmán kulit metan sira hasoru.

Iha tempu neʼebá, governu iha Áfrika Súl haketak rasa sira. Rasa ida-idak tenke hela iha fatin ketaketak no sira labele ransu malu. Irmaun-irmán sira neʼebé kulit metan koʼalia sira-nia língua rasik, haklaken ba ema neʼebé koʼalia sira-nia língua, no tuir reuniaun iha sira-nia língua rasik.

Haʼu la koñese irmaun-irmán barak neʼebé kulit metan tanba haʼu sempre serbí iha kongregasaun língua Inglés. Maibé agora haʼu hetan oportunidade atu aprende kona-ba irmaun-irmán kulit metan sira, sira-nia kultura no mós kostume. Haʼu aprende kona-ba susar neʼebé irmaun-irmán sira hasoru tanba ema nia kostume no fiar. Sira aten-brani tebes. Sira la simu kostume neʼebé kontra Bíblia nia matadalan no mós lakohi halo tuir toman neʼebé uza espiritizmu maski sira-nia família no ema seluk kontra sira. Iha área rurál, ema barak kiak no la eskola, maibé sira hafolin Bíblia.

Haʼu kontente atu ajuda ho kazu legál kona-ba liberdade atu adora Maromak no neutrál. Haʼu-nia fiar sai metin liután bainhira haree joven Testemuña sira neʼebé laran-metin no aten-brani maski eskola hasai sira tanba la hola parte iha igreja nia knananuk no orasaun.

Irmaun-irmán sira hasoru susar ida tan iha nasaun kiʼik ida iha Áfrika naran Suazilándia (agora Esuatini). Bainhira Liurai Sobhuza II mate, sidadaun hotu tenke halo tuir kostume kona-ba ema mate. Mane sira tenke koir sira-nia fuuk no feto sira tenke tesi badak sira-nia fuuk. Ema fó-terus ba irmaun-irmán barak tanba la hola parte iha toman neʼe neʼebé liga ho adorasaun ba beiʼala sira. Sira-nia laran-metin ba Jeová book tebes ami-nia laran. Ami aprende kona-ba fiar metin, laran-metin no pasiénsia husi irmaun Afrikanu no neʼe hametin ami-nia fiar.

SERBISU FALI IHA FATIN PRINT NIAN

Iha tinan 1981, haʼu simu knaar atu ajuda dezenvolve dalan foun atu print hodi uza komputadór. Tan neʼe, haʼu halo fali serbisu iha fatin print nian. Haʼu gosta tebes tempu neʼe. Iha mudansa boot kona-ba dalan atu print. Negósiu-naʼin ida fó mákina print ida ba sukursál atu koko, no ami la presiza selu buat ida. Rezultadu mak ami troka mákina sia neʼebé tuan ho mákina foun lima. Sukursál mós monta mákina print foun neʼebé boot. Neʼe halo serbisu print sai lalais liu.

Hodi uza komputadór, neʼe ajuda ami inventa dalan foun atu halo furak testu iha revista sira hodi uza MEPS (Multilanguage Electronic Publishing System). Teknolojia sai avansadu liután husi tempu neʼebé ami naʼin-haat muda ba Áfrika Súl atu serbí iha sukursál. (Isa 60:17) Ami naʼin-haat kaben ona ho irmán pioneiru sira neʼebé hadomi tebes Jeová. Haʼu no mós Bill nafatin serbí iha Betel. Ken iha ona oan, nuneʼe mós ho Dennis.

Serbisu iha Sukursál Áfrika Súl sai barak liután. Ita-nia publikasaun tradús no print iha língua barak liután no haruka ba sukursál seluk. Tan neʼe presiza fatin foun. Irmaun sira harii sukursál foun iha Johannesburg nia parte oeste no dedika iha tinan 1987. Haʼu kontente tebes atu haree oinsá serbisu aumenta no haʼu serbí nuʼudar Membru ba Komisaun ba Sukursál Áfrika Súl durante tinan barak.

KNAAR SELUK TAN

Iha tinan 2001, ami hakfodak tebes bainhira haʼu simu konvite atu sai membru ba Komisaun ba Sukursál foun iha Estadus Unidus. Maski ami triste atu husik ami-nia serbisu no belun sira iha Áfrika Súl, maibé ami kontente atu sai parte ba família Betel iha Estadus Unidus.

Maibé ami hanoin barak kona-ba hela dook husi haʼu-nia banin-feto neʼebé idade ona. Ami labele ajuda nia tanba ami hela iha Novaiorke. Maibé, haʼu-nia kuñada naʼin-tolu oferese atu ajuda haʼu-nia banin iha dalan fíziku, emosaun, no osan. Sira hatete: “Ami labele serbí Maromak tempu-tomak, maibé se ami tau matan ba amá nia presiza, neʼe sei ajuda imi atu kontinua halaʼo imi-nia knaar.” Ami agradese tebes ho sira-nia ajuda.

Haʼu-nia maun no ninia feen neʼebé hela iha Torontu, rai-Kanadá mós tau matan ba haʼu-nia amá neʼebé faluk ona. Amá hela hamutuk ho sira durante tinan 20 liu. Ami agradese tebes tanba sira hatudu domin no tau matan ba amá toʼo nia mate. Amá mate lakleur depois ami toʼo iha Novaiorke. Ami agradese tebes ba família neʼebé prontu atu halo mudansa iha sira-nia moris atu tau matan ba ami-nia inan-aman neʼebé idade ona maski dala ruma ida-neʼe susar.

Ba tinan barak haʼu-nia knaar iha Estadus Unidus mak atu ajuda prodús livru sira. Ohin loron, ita-nia organizasaun nia dalan atu halo livru sira mak modernu no simples liu. Agora haʼu serbisu hamutuk ho Departamentu Kompras nian. Durante tinan 20 liu, haʼu kontente tebes atu sai parte ba sukursál neʼebé boot. No agora iha ema Betel naʼin-5.000 no ema naʼin-2.000 ajuda part-time iha Betel.

Tinan 60 liubá, haʼu nunka imajina katak haʼu sei serbí iha Betel. Durante tinan sira-neʼe, Laura apoia haʼu ho laran tomak. Haʼu-nia moris mak furak tebes. Ami hafolin tebes knaar oioin neʼebé ami halo no hafolin irmaun-irmán sira neʼebé serbisu hamutuk ho ami, inklui irmaun-irmán barak iha sukursál sira neʼebé ami vizita. Agora haʼu tinan 80 liu no haʼu-nia serbisu menus tanba iha irmaun joven barak neʼebé bele halo serbisu neʼe.

Ema ida neʼebé hakerek Salmo hatete: “Ksolok ba nasaun neʼebé adora Jeová nuʼudar ninia Maromak.” (Sal 33:12) Liafuan sira-neʼe mak loos duni. Haʼu kontente tebes tanba bele serbí Jeová hamutuk ho ninia povu neʼebé kontente.