Pergunta husi lee-naʼin
Iha Levítico 19:16, iha mandamentu atu labele “hamriik hasoru” ema seluk nia moris. Mandamentu neʼe katak sá no ita aprende saida?
Jeová haruka ema Izraél atu sai santu. Atu ajuda sira sai santu, Jeová hatete ba sira: “Imi labele koʼalia aat hodi hafoʼer ema nia naran no habelar liafuan aat neʼe iha povu nia leet. Imi labele hamriik hasoru imi-nia maluk nia moris. Haʼu mak Jeová.”—Lev 19:2, 16.
Liafuan “hamriik hasoru” mak dalan diʼak atu tradús liafuan Ebraiku neʼe, maibé liafuan neʼe signifika saida? Ema Ebreu nia livru ida kona-ba livru Levítico esplika: “Husi versíkulu neʼe, parte ida-neʼe . . . susar atu komprende tanba ita la hatene ho loloos oinsá ema Ebreu rasik uza liafuan neʼe, neʼebé bele iha signifikadu ‘labele hamriik rabat, hamriik besik’.”
Matenek-naʼin balu hanoin katak liafuan neʼe liga ho versíkulu 15, neʼebé hatete: “Imi labele hatudu hahalok todan ba sorin kuandu tesi-lia. Imi labele todan ba sorin ba ema kiak ka apoia deʼit ema riku. Imi tenke tesi-lia ba imi-nia maluk tuir justisa.” (Lev 19:15) Se nuneʼe, mandamentu iha versíkulu 16 kona-ba labele “hamriik hasoru” ema ruma bele signifika ema Izraél labele halo buat neʼebé la justu iha tribunál, iha negósiu, ka iha família laran. Ema Izraél ida labele hamatak ema. Klaru katak, ita labele halo buat sira-neʼe, maibé iha mós esplikasaun lójiku seluk.
Iha parte primeiru husi versíkulu 16, Maromak bandu ema Izraél atu labele koʼalia aat hodi hafoʼer ema nia naran. Maski gosip bele hamosu problema, maibé koʼalia aat hodi hafoʼer ema nia naran mak aat liu duké gosip, tanba hamosu rezultadu neʼebé aat liu. (Prov 10:19; Ecle 10:12-14; 1 Tim 5:11-15; Tgo 3:6) Baibain ema neʼebé koʼalia aat hodi hafoʼer ema nia naran koko atu estraga ema neʼe nia reputasaun. Sira mós karik fó sasin falsu hasoru ema seluk, no ema neʼe karik hetan kastigu-mate. Hanoin-hetan mane ida neʼebé fó sasin falsu hasoru Nabot, no tanba ida-neʼe ema tuda mate Nabot. (1 Reis 21:8-13) Klaru katak ema neʼebé koʼalia aat hodi hafoʼer ema seluk nia naran hamriik hasoru ema seluk nia moris, hanesan temi ona iha parte segundu husi Levítico 19:16.
Ema balu mós koʼalia aat hodi hafoʼer ema seluk nia naran tanba sira odi ema neʼe. 1 João 3:15 hatete: “Ema hotu neʼebé odi ninia maluk, ema neʼe mak ohodór, no imi hatene katak ema neʼebé ohodór la simu moris rohan-laek.” Depois fó sai mandamentu iha Levítico 19:16, Maromak mós hatete iha versíkulu 17: “Imi labele odi imi-nia maluk iha imi-nia laran.”
Entaun, mandamentu iha Levítico 19:16 mak avizu makaʼas ba ema Kristaun sira. Ita labele hanoin aat kona-ba ema seluk no ita labele koʼalia aat ema seluk hodi hafoʼer sira-nia naran. Se ita “hamriik hasoru” ema ruma, ka ita koʼalia aat nia tanba ita la gosta ka laran-moras ba nia, neʼe prova katak ita odi nia. Ema Kristaun tenke hadook an husi hahalok odi.—Mt 12:36, 37.