HAPARA SIKLU ODI MALU

1 | Keta todan ba sorin

Bíblia hanorin:

“Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.”—APÓSTOLU 10:34, 35.

Neʼe katak sá:

Maromak Jeováa la haree ba ita-nia nasaun, rasa, kór, ka kultura. Nia fokus ba ita-nia laran, inklui ita-nia hanoin no hakarak. Bíblia dehan: “Ema haree deʼit buat neʼebé iha liʼur, maibé Jeová haree ema nia laran.”—1 Samuel 16:7.

Saida mak Ita bele halo:

Maski ita labele haree ema nia laran, maibé ita bele koko atu halo tuir Maromak nia ezemplu hodi la fihir ema. Hakaʼas an atu haree ema ida-idak, laʼós nuʼudar grupu. Se Ita iha sentimentu negativu ba rasa ka nasaun ida, halo orasaun ba Maromak no husu ninia ajuda atu hasai tiha sentimentu neʼe. (Salmo 139:23, 24) Se ita husu ho laran ba Maromak Jeová hodi bele hetan forsa atu la todan ba sorin, ita bele fiar katak nia sei rona Ita-nia orasaun no ajuda Ita.—1 Pedro 3:12.

a Jeová mak Maromak nia naran rasik.—Salmo 83:18.

“Uluk haʼu nunka tuur ho dame hamutuk ho ema mutin . . . Agora haʼu sai parte ba família internasionál neʼebé hadomi malu.”—TITUS

Esperiénsia—TITUS

Halakon sentimentu ódiu

Uluk Titus mak membru husi gang ida neʼebé protesta lei sira neʼebé hanehan ema metan sira. Nia dehan: “Ami-nia toman mak bá fatin oioin hanesan otél no bar neʼebé la gosta simu ema metan, no provoka ema iha fatin neʼe.” Titus rekoñese katak buat neʼebé motiva nia mak sentimentu ódiu. Nia dehan: “Kuandu haʼu diskute malu ho mane ka feto, haʼu mak sei baku uluk.”

Titus komesa troka ninia hahalok kuandu nia hahú estuda Bíblia ho Testemuña ba Jeová. Bainhira nia lee Bíblia, neʼe book tebes ninia hanoin. Eskritura neʼebé kona tebes nia mak promesa kona-ba futuru, katak “mate sei la iha tan, no ema sei la triste tan ka tanis ka sente moras”.—Apokalipse 21:3, 4.

Foufoun Titus sente susar atu halakon sentimentu odi. Nia dehan: “Susar tebes ba haʼu atu troka haʼu-nia dalan atu hanoin no haʼu-nia hahalok.” Maibé nia hetan ajuda husi buat neʼebé nia aprende iha Apóstolu 10:34, 35, neʼebé dehan katak Maromak la todan ba sorin.

Rezultadu mak saida? Titus esplika: “Bainhira haʼu haree katak Testemuña ba Jeová hatudu domin ba malu maski rasa ka kór la hanesan, neʼe halo haʼu fiar katak sira halo tuir Bíblia nia hanorin. Maski iha tempu neʼebá haʼu seidauk batizmu, irmaun kulit mutin ida konvida haʼu ba ninia uma atu han hamutuk. Uluk haʼu nunka tuur ho dame hamutuk ho ema mutin, sá tan han hamutuk iha ema mutin nia uma. Agora haʼu sai parte ba família internasionál neʼebé hadomi malu.”