Hakarak hatene?
Ema Izraél bele hasaʼe manu-lakateu no manu-pombu nuʼudar sakrifísiu. Tanbasá neʼe diʼak?
TUIR Moisés nia Ukun-Fuan, Maromak simu manu-lakateu no manu-pombu nuʼudar sakrifísiu. Manu sira-neʼe sempre temi hamutuk kuandu temi kona-ba sakrifísiu sira no ema Izraél iha opsaun atu hili manu-lakateu ka manu-pombu nuʼudar sakrifísiu. (Lev 1:14; 12:8; 14:30) Tanbasá neʼe diʼak? Razaun ida mak tanba dala ruma susar atu hetan manu-lakateu. Tanbasá susar?
Manu-lakateu
Manu-lakateu mak manu neʼebé la hela metin iha fatin ida. Sira hela iha área Izraél durante tempu manas. Iha fulan-Outubru sira semo ba nasaun seluk iha súl neʼebé manas liu. Tuirmai kuandu tempu malirin remata iha Izraél, manu-lakateu fila fali. (Kna 2:11, 12; Jer 8:7) Neʼe katak susar ba ema Izraél atu fó manu-lakateu nuʼudar sakrifísiu durante tempu malirin.
Manu-pombu
Maibé baibain manu-pombu hela metin iha fatin ida, entaun ema Izraél bele hetan manu-pombu durante tinan tomak. No mós ema barak hakiak manu-pombu. (Kompara ho João 2:14, 16.) Livru ida (Bible Plants and Animals) kona-ba animál no ai-horis iha Bíblia esplika katak “ema hakiak manu-pombu iha fatin hotu iha rai-Palestina. Uma-naʼin ida-idak iha uma sira ba manu-pombu ka kuak sira iha didin atu manu-pombu sira hela bá”.—Kompara ho Isaias 60:8.
Manu-pombu iha ninia uma
Jeová hatudu sai ninia domin no mós hatudu katak nia la ulun-toos tanba nia prontu atu simu manu oioin nuʼudar sakrifísiu tuir buat neʼebé ema Izraél bele hetan tuir tempu.