Pergunta husi lee-naʼin

Se ema Kristaun ida soe-malu ho ninia feen la ho razaun neʼebé loos tuir Bíblia no tuirmai kaben ho ema seluk, oinsá kongregasaun nia haree kona-ba juramentu kaben uluk nian no foun nian?

Iha situasaun hanesan neʼe, kongregasaun sei haree juramentu kaben uluk nian remata ona bainhira mane neʼe kaben fali ho feto seluk. No juramentu kaben foun nian nuʼudar buat neʼebé vale. Atu komprende tanbasá, mai ita haree buat neʼebé Jesus hatete kona-ba soe-malu no kaben fali ho ema seluk.

Iha Mateus 19:9, Jesus esplika kona-ba razaun ida deʼit atu bele hakotu juramentu kaben nian. Nia hatete: “Ema naran deʼit neʼebé soe ninia feen no kaben fali ho ema seluk, nia halo adultériu. Maibé, só deʼit kuandu feen halo sala seksuál mak ninia laʼen bele soe nia.” Husi Jesus nia liafuan, ita aprende katak (1) tuir Bíblia razaun ida deʼit atu feen-laʼen bele hakotu juramentu kaben nian no soe-malu mak sala seksuál no (2) se mane ida soe-malu ho ninia feen la ho razaun loos tuir Bíblia, no tuirmai kaben fali ho feto seluk, mane neʼe halo adultériu.a

Jesus nia liafuan la dehan katak mane neʼebé halo sala seksuál no soe-malu ho ninia feen, livre tuir Bíblia atu kaben fali ho feto seluk. Bainhira laʼen ida halo adultériu, ninia feen neʼebé la halo sala mak presiza deside atu perdua ninia laʼen ka lae. Se feen lakohi perdua ninia laʼen no sira soe-malu tuir lei, entaun sira rua bele kaben fali ho ema seluk bainhira sira halo tuir ona prosesu legál atu soe-malu.

Dala ruma feen neʼebé la halo sala, hakarak hamutuk nafatin ho ninia laʼen no hatete ba ninia laʼen katak nia prontu atu fó perdua. Maibé oinsá se laʼen neʼe lakohi simu ninia feen nia perdua, lakohi hamutuk fali ho ninia feen no mós hahú halo prosesu legál atu soe-malu? Tanba feen neʼe prontu atu perdua laʼen no hakarak kontinua moris nuʼudar feen-laʼen, neʼe katak tuir Bíblia laʼen neʼe la livre atu kaben fali ho feto seluk. Se laʼen neʼe kontinua kontra Bíblia nia matadalan hodi kaben fali ho feto seluk maski tuir Bíblia nia la livre atu kaben fali, neʼe katak nia halo adultériu dala ida tan. No katuas kongregasaun presiza forma komisaun judisiál dala ida tan atu haree ba kazu neʼe.​—1 Kor 5:1, 2; 6:9, 10.

Se mane ida kaben fali maski la livre tuir Bíblia, oinsá kongregasaun nia haree kona-ba juramentu kaben uluk nian no foun nian? Tuir Bíblia, juramentu kaben uluk nian sei vale ka lae? Feen neʼebé la halo sala bele nafatin deside atu perdua ninia laʼen ka lae? Kongregasaun sei haree juramentu kaben foun nian nuʼudar moris kaben adultériu nian ka lae?

Uluk kongregasaun haree nafatin juramentu kaben foun nian nuʼudar moris kaben adultériu nian, se feen neʼebé la halo sala seidauk mate, la kaben fali ho ema seluk no la halo sala seksuál. Maibé tuir loloos, bainhira Jesus koʼalia kona-ba soe-malu no kaben fali ho ema seluk, nia la esplika kona-ba feen neʼebé la halo sala. Jesus esplika deʼit katak mane neʼebé soe-malu ho ninia feen la ho razaun loos tuir Bíblia no tuirmai kaben fali ho feto seluk, mane neʼe halo adultériu. Iha situasaun neʼe, tuir Jesus nia liafuan, soe-malu no kaben fali ho ema seluk mak adultériu. Entaun, ida-neʼe hakotu juramentu kaben uluk nian.

Bainhira mane ida soe-malu ho ninia feen no kaben fali ho feto seluk, la iha ona dalan ba ninia feen uluk nian neʼebé la halo sala atu perdua no simu fali nia. Neʼe katak feen uluk nian la presiza halo desizaun susar kona-ba fó perdua ka lae. No kongregasaun nia haree kona-ba juramentu kaben foun la depende ba feen uluk nian mak mate, kaben fali ho ema seluk ka halo sala seksuál.b

Ezemplu neʼebé foin temi mak kona-ba laʼen neʼebé halo adultériu no tuirmai feen-laʼen soe-malu. Oinsá se laʼen la halo adultériu, maibé soe-malu ho ninia feen tuir lei no tuirmai kaben fali ho feto seluk tuir lei? Ka oinsá se laʼen ida la halo sala seksuál antes soe-malu tuir lei maibé halo sala seksuál depois sira soe-malu no tuirmai kaben fali ho ema seluk maski ninia feen uluk hakarak perdua nia no hakarak simu fali nia? Iha situasaun hotu neʼe, soe-malu tuir lei no tuirmai kaben fali ho ema seluk mak adultériu no sei hakotu juramentu kaben uluk nian. Juramentu kaben foun nian mak juramentu legál. Livru Haklaken 15 Novembru 1979, pájina 32 iha lian Inglés esplika: “Mane neʼe kaben ona ho ema seluk, no nia labele hakotu juramentu kaben foun nian no fila fali ba ninia feen uluk nian. Ninia juramentu kaben uluk nian remata ona kuandu nia soe-malu, halo adultériu no kaben fali ho ema seluk.”

Esplikasaun foun neʼe la dehan katak moris kaben nian ladún sagradu ona ka la dehan katak adultériu laʼós sala neʼebé sériu. Bainhira mane ida soe-malu ho ninia feen maski la ho razaun loos tuir Bíblia no tuirmai kaben fali ho feto seluk maski la livre tuir Bíblia, katuas sira presiza forma komisaun judisiál tanba mane neʼe halo adultériu. (Se mane neʼe nia feen foun mak ema Kristaun, entaun katuas sira mós presiza forma komisaun judisiál tanba feto neʼe mós halo adultériu.) Maski kongregasaun la haree juramentu kaben foun nian nuʼudar moris kaben adultériu nian, maibé mane neʼe sei la kumpre kritéria atu halo knaar espesiál ruma iha kongregasaun durante tinan barak. Nia mós sei la simu knaar ruma se ema seluk nafatin sente laran-kanek kona-ba ninia hahalok aat ka ema sente katak nia la merese simu knaar neʼe. Antes fó knaar ba nia, katuas sira mós presiza hanoin kona-ba situasaun husi ninia feen neʼebé nia soe ona no oan kiʼik neʼebé karik mane neʼe husik hela.​—Mal 2:14-16.

Soe-malu no kaben fali la ho razaun loos tuir Bíblia lori konsekuénsia aat, tan neʼe ema Kristaun hatudu matenek hodi banati-tuir Jeová no haree moris kaben nian nuʼudar buat neʼebé sagradu.​—Ecle 5:4, 5; Ebr 13:4.