Hakarak hatene?

Ema Roma fó lisensa atu hakoi ema neʼebé hetan kastigu-mate iha ai-riin hanesan Jesus ka lae?

EMA barak hatene istória kona-ba Jesus neʼebé hetan kastigu-mate iha ai-riin entre kriminozu naʼin-rua. (Mt 27:35-38) Maibé matenek-naʼin barak dehan katak Bíblia nia istória kona-ba ema prepara Jesus nia mate-isin no hakoi nia iha rate mak la loos.​—Mc 15:42-46.

Matenek-naʼin balu dehan katak ema neʼebé hetan kastigu-mate iha ai-riin sei la hakoi iha dalan neʼebé diʼak hanesan ema seluk. Jornalista naran Ariel Sabar hakerek iha jornál Smithsonian kona-ba tanbasá ema balu hanoin hanesan neʼe. Nia hatete: “Ema neʼebé hetan kastigu-mate iha krús mak ema neʼebé aat liu, no matenek-naʼin balu dehan katak ema Roma sei nunka hakoi ema sira-neʼe iha dalan neʼebé diʼak.” Ema Roma hakarak hamoe kriminozu sira-neʼe, tan neʼe baibain sira-nia mate-isin husik deʼit iha ai-riin leten atu animál fuik sira han. No buat neʼebé animál sira la han sei soe ba rate hamutuk ho mate-isin sira seluk.

Maibé arkeólogu sira deskobre katak ema Judeu balu neʼebé hetan kastigu-mate la hakoi iha dalan hanesan neʼe. Iha tinan 1968 sira hetan mate-ruin husi mane neʼebé hetan kastigu-mate iha apóstolu sira-nia tempu. Mate-ruin neʼe tau iha kaixa laran iha rate ida besik Jeruzalein. Mate-ruin neʼe inklui ruin tuban neʼebé prega metin ba ai ho pregu sentímetru 11,5. Ariel Sabar hatete: “Neʼe mak ruin tuban husi mane ida naran Jehohanan, no neʼe mak evidénsia neʼebé halakon ema nia duvida kona-ba istória husi Evanjellu sira katak ema hakoi Jesus iha rate.” Nia hatutan tan: “Jehohanan nia ruin tuban mak ezemplu neʼebé hatudu katak ema Roma iha Jesus nia tempu fó lisensa atu hakoi ema neʼebé hetan kastigu-mate.”

Karik ema barak kontinua iha hanoin oioin kona-ba dalan neʼebé ema prega Jesus iha ai-riin kuandu haree ba ruin tuban neʼe. Maibé klaru katak ema hakoi kriminozu balu neʼebé hetan kastigu-mate iha dalan neʼebé diʼak no la hakoi deʼit hamutuk ho mate-isin sira seluk. Entaun ita bele fiar duni Bíblia nia istória kona-ba ema hakoi Jesus nia mate-isin iha rate. Evidénsia neʼe apoia buat neʼebé Bíblia hatete.

Importante liu mak Jeová fó-hatene nanis ona katak ema sei hakoi Jesus iha ema riku nia rate, no ema ida labele hanetik Maromak nia liafuan atu sai loos.​—Isa 53:9; 55:11.