Halo tuir “ukun-fuan laran-diʼak nian”

Bainhira irmán Lisaa konta kona-ba buat neʼebé book nia atu simu lia-loos, nia hatete: “Irmaun-irmán sira-nia laran-diʼak book tebes haʼu-nia laran.” Irmán Anne mós sente hanesan neʼe, nia hatete: “Foufoun, haʼu hakarak aprende lia-loos tanba Testemuña sira hatudu laran-diʼak, laʼós tanba buat neʼebé sira hanorin.” Agora irmán naʼin-rua neʼe kontente atu lee Bíblia no hanoin kleʼan kona-ba neʼe, maibé buat neʼebé book tebes sira-nia laran mak hahalok laran-diʼak.

Oinsá ita bele hatudu laran-diʼak neʼebé bele book ema seluk nia laran? Mai ita koʼalia kona-ba dalan rua, neʼe mak liuhusi ita-nia hahalok no liafuan. Tuirmai ita sei koʼalia kona-ba ita bele hatudu laran-diʼak ba sé.

“UKUN-FUAN LARAN-DIʼAK NIAN” MAK IHA ITA-NIA NANÁL

Provérbios kapítulu 31 konta kona-ba feen matenek neʼebé iha “ukun-fuan laran-diʼak nian” iha ninia nanál. (Prov 31:26) “Ukun-fuan laran-diʼak nian” mak afeta dalan neʼebé nia koʼalia no ninia liafuan. Aman sira mós tenke iha “ukun-fuan” neʼe iha sira-nia nanál. Inan-aman barak hatene katak liafuan neʼebé makaʼas bele fó impaktu neʼebé la diʼak ba sira-nia oan no sira-nia oan sei lakohi rona ba sira. Bainhira inan-aman sira koʼalia ho laran-diʼak, fasil liu ba oan sira atu rona no halo tuir.

Maski Ita mak inan-aman ka lae, oinsá Ita bele koʼalia ho laran-diʼak? Parte primeiru husi Provérbios 31:26 hatete: “Nia loke ibun hodi fó sai matenek.” Neʼe inklui hili didiʼak ita-nia liafuan no dalan neʼebé ita koʼalia. Dala barak diʼak atu husu ba ita-nia an: ‘Buat neʼebé haʼu koʼalia sei halo ema hirus liután ka halo situasaun sai kalma?’ (Prov 15:1) Matenek tebes atu hanoin uluk antes ita koʼalia.

Provérbios 12:18 hatete: “Liafuan neʼebé koʼalia sai hodi la hanoin uluk mak hanesan sona ho surik.” Se ita hanoin didiʼak kona-ba oinsá ita-nia liafuan no dalan neʼebé ita koʼalia bele afeta ema seluk, neʼe sei ajuda ita kontrola ita-nia liafuan. Bainhira ita halo tuir “ukun-fuan laran-diʼak nian”, neʼe sei ajuda ita atu la koʼalia liafuan neʼebé bele hakanek ema seluk nia laran no la koʼalia iha dalan neʼebé la diʼak. (Éf 4:31, 32) Duké hanoin negativu no koʼalia negativu, ita sei koʼalia ho laran-diʼak no iha dalan neʼebé pozitivu. Jeová hatudu ezemplu diʼak kona-ba neʼe bainhira fó kmaan ba Elias neʼebé sente taʼuk. Jeová nia anju koʼalia ho “lian neʼebé neineik no kalma”. (1 Reis 19:12) Maibé la toʼo atu hatudu laran-diʼak liuhusi liafuan deʼit, ita mós tenke hatudu ida-neʼe liuhusi hahalok. Oinsá?

HAHALOK LARAN-DIʼAK BOOK EMA SELUK NIA LARAN

Ita banati-tuir Jeová liuhusi koʼalia ho laran-diʼak no hatudu hahalok laran-diʼak. (Éf 4:32; 5:1, 2) Irmán Lisa neʼebé temi ona ohin, esplika kona-ba irmaun-irmán sira-nia laran-diʼak hodi hatete: “Uluk kuandu ami presiza muda uma derrepente, feen-laʼen Testemuña rua foti feriadu atu ajuda haloot ami-nia sasán. Iha tempu neʼebá, haʼu seidauk estuda Bíblia!” Sira-nia laran-diʼak book irmán Lisa atu aprende lia-loos.

Irmán Anne neʼebé temi ona ohin, hafolin irmaun-irmán sira-nia laran-diʼak. Nia hatete: “Tanba mundu aat tebes, susar ba haʼu atu tau fiar ba ema seluk. Bainhira haʼu hasoru Testemuña sira, haʼu deskonfia sira. Haʼu hanoin: ‘Tanbasá sira interese loos mai haʼu?’ Maibé laran-diʼak neʼebé haʼu-nia mestra Bíblia hatudu mai haʼu, book haʼu atu tau fiar ba nia.” Neʼe lori rezultadu saida? Nia hatutan tan: “Ikusmai, haʼu komesa hanoin didiʼak kona-ba buat neʼebé haʼu aprende.”

Irmaun-irmán sira-nia laran-diʼak book tebes Lisa no Anne nia laran, no neʼe ajuda sira atu aprende lia-loos. Neʼe mós ajuda sira atu tau fiar ba Jeová no mós ninia povu.

BANATI-TUIR MAROMAK HODI HATUDU LARAN-DIʼAK

Ema balu koʼalia ho laran-diʼak no hatudu oin-midar tanba sira-nia kultura. La sala atu hatudu laran-diʼak tanba ita-nia kultura ka toman. Maibé se neʼe deʼit mak book ita atu hatudu laran-diʼak, karik neʼe hatudu katak ita la banati-tuir Maromak nia laran-diʼak.—Kompara ho Apóstolu 28:2.

Laran-diʼak neʼebé loos mak hahalok ida neʼebé mai husi Maromak nia espíritu santu. (Gal 5:22, 23) Tan neʼe atu haburas hahalok neʼe, ita presiza Maromak nia espíritu santu. Bainhira ita halo nuneʼe, ita banati-tuir Jeová no Jesus. Hanesan Jesus, ita hatudu interese ba ema seluk. Entaun ita hatudu laran-diʼak tanba ita hadomi Jeová no mós hadomi ema seluk. Bainhira domin book ita atu hatudu laran-diʼak, neʼe katak hahalok neʼe mai husi ita-nia laran no halo Maromak kontente.

ITA PRESIZA HATUDU LARAN-DIʼAK BA SÉ?

Fasil atu hatudu laran-diʼak ba ema neʼebé hatudu laran-diʼak ba ita ka ema neʼebé ita koñese. (2 Sam 2:6) Dalan ida atu hatudu laran-diʼak mak hodi fó obrigadu. (Kol 3:15) Maibé oinsá se ita sente katak ema ida la merese atu simu ita-nia laran-diʼak?

Jeová hatudu ezemplu kapás kona-ba hatudu laran-diʼak neʼebé boot, no Bíblia mós hanorin ita oinsá atu hatudu laran-diʼak. Eskritura Lian Gregu temi beibeik liafuan “laran-diʼak neʼebé boot”. Oinsá Maromak hatudu laran-diʼak mai ita?

Jeová hatudu ona laran-diʼak ba ema millaun ba millaun hodi fó buat neʼebé sira presiza atu bele kontinua moris. (Mt 5:45) Antes ita koñese Jeová, nia hatudu ona laran-diʼak ba ita. (Éf 2:4, 5, 8) Porezemplu, nia fó buat neʼebé diʼak liu ba ita, neʼe mak ninia Oan-Mane mesak. Apóstolu Paulo hakerek katak Jeová hatudu “laran-diʼak neʼebé boot” hodi fó Jesus nuʼudar sakrifísiu ba ita. (Éf 1:7) Liután neʼe, maski ita halo sala no halo Jeová laran-kanek, nia kontinua fó matadalan no hanorin ita. Ninia matadalan no liafuan sira mak hanesan “udan neʼebé turuk”. (Deut 32:2) Ita labele selu fali ninia laran-diʼak hotu neʼebé nia hatudu mai ita. No se Jeová la hatudu laran-diʼak ba ita, ita la iha esperansa ba futuru.—Kompara ho 1 Pedro 1:13.

Jeová nia laran-diʼak book ita atu hakbesik ba nia no hadomi nia. Tan neʼe, duké hatudu deʼit laran-diʼak ba ema balu, ita presiza hakaʼas an atu banati-tuir Jeová hodi hatudu laran-diʼak ba ema hotu loroloron. (1 Tes 5:15) Bainhira ita hatudu beibeik laran-diʼak, ita sei fó kmaan ba ema seluk. Ita-nia família, maluk fiar-naʼin, kolega serbisu, kolega eskola no viziñu sira sei sente kmaan.

Hanoin kona-ba ema iha Ita-nia família ka kongregasaun neʼebé sei hetan benefísiu tanba Ita koʼalia ka hatudu laran-diʼak. Karik iha ema ruma iha Ita-nia kongregasaun neʼebé presiza ajuda atu hamoos uma no jardín ka atu halo buat seluk tan hanesan bá kompras. No mós bainhira Ita hasoru ema iha serbisu haklaken neʼebé presiza ajuda, Ita bele fó ajuda ka lae?

Mai ita banati-tuir Jeová no husik “ukun-fuan laran-diʼak nian” mak afeta ita-nia liafuan no hahalok.