Hametin ita-nia esperansa

1. Esperansa saida mak Jeová fó ona mai ita?

JEOVÁ fó mai ita esperansa kapás atu moris ba nafatin. Ema balu iha esperansa atu moris ba nafatin iha lalehan nuʼudar kriatura espíritu. (1 Kor 15:50, 53) Maibé ema maioria iha esperansa atu moris iha rai ho saúde neʼebé perfeitu no moris kontente. (Apok 21:3, 4) Maski ita iha esperansa atu moris iha rai ka iha lalehan, ita-nia esperansa mak folin-boot duni.

2. Ita-nia esperansa bazeia ba saida, no tanbasá?

² Liafuan “esperansa” neʼebé uza iha Bíblia bele signifika “hein namanas katak buat diʼak sei akontese”. Ita bele fiar katak ita-nia esperansa ba futuru sei sai loos tanba neʼe mai husi Jeová. (Rom 15:13) Ita hatene buat neʼebé Jeová promete ona, no ita hatene katak nia sempre kumpre ninia promesa sira. (Núm 23:19) Ita fiar katak Jeová hakarak no nia iha forsa atu kumpre buat hotu neʼebé nia promete ona. Ita-nia esperansa laʼós mehi ka imajinasaun deʼit. Maibé ita-nia esperansa bazeia ba evidénsia ka realidade.

3. Iha lisaun neʼe, ita sei aprende saida? (Salmo 27:14)

³ Ita-nia Aman iha lalehan hadomi ita no hakarak ita atu tau fiar ba nia. (Lee Salmo 27:14.) Bainhira ita-nia esperansa ba Jeová mak metin, neʼe ajuda ita atu tahan hasoru susar sira no kontinua hatudu aten-brani no sente haksolok. Ita sei aprende oinsá ita-nia esperansa bele proteje ita. Ulukliu, ita sei haree oinsá esperansa mak hanesan ankor ida no mós kapasete. Tuirmai ita sei haree oinsá ita bele hametin ita-nia esperansa.

ESPERANSA MAK HANESAN ANKOR IDA

4. Oinsá mak esperansa hanesan ho ankor ida? (Ebreu 6:19)

⁴ Iha apóstolu Paulo nia karta ba ema Ebreu, nia kompara esperansa ho ankor ida. (Lee Ebreu 6:19.) Paulo halo viajen beibeik ho ró, tan neʼe nia hatene katak ema uza ankor atu halo ró metin nafatin. Loron ida bainhira Paulo saʼe ró, mosu anin-fuik. Durante anin-fuik neʼe, Paulo haree mariñeiru sira hatún ankor sira ba tasi laran atu ró labele xoke fatuk sira. (Após 27:29, 39-41) Hanesan ankor ida halo ró metin, ita-nia esperansa bele hametin ita atu nuneʼe ita sei la hadook an husi Jeová bainhira ita hasoru problema neʼebé hanesan anin-fuik. Ita-nia esperansa ajuda ita atu kalma nafatin bainhira ita hasoru problema sira tanba ita fiar katak buat hotu sei sai diʼak. Hanoin-hetan, Jesus fó avizu nanis katak ema sei haterus ita. (João 15:20) Tan neʼe hodi hanoin kleʼan kona-ba ita-nia promesa ba futuru bele ajuda ita atu kontinua serbí Jeová.

5. Oinsá esperansa ajuda Jesus?

⁵ Esperansa ajuda Jesus atu nafatin laran-metin, maski nia hatene katak nia sei mate iha dalan neʼebé aat tebes. Iha loron Pentekostes tinan 33 EC, apóstolu Pedro temi fali profesia husi livru Salmo neʼebé esplika Jesus nia sentimentu kalma no konfiansa: “Haʼu sei moris ho esperansa, tanba Ita sei la husik hela haʼu iha rate laran, no mós Ita sei la husik Ita-nia atan neʼebé laran-metin ba Ita atu ninia isin sai dodok. . . . Ita halo haʼu nakonu ho ksolok iha Ita-nia oin.” (Após 2:25-28; Sal 16:8-11) Maski Jesus hatene katak nia sei mate, nia iha esperansa neʼebé metin katak Maromak sei halo nia moris-hiʼas no nia sei hasoru fali ninia Aman iha lalehan.—Ebr 12:2, 3.

6. Irmaun ida hatete saida kona-ba esperansa?

⁶ Esperansa ajuda ona irmaun-irmán barak atu tahan. Hanoin toʼok esperiénsia husi irmaun Leonard Chinn neʼebé hela iha rai-Inglaterra. Iha Funu Mundiál Primeiru, ema hatama nia ba komarka tanba nia lakohi hola parte iha militár. Durante fulan rua, nia hela iha sela izoladu. Nia mós presiza halo serbisu todan. Nia hakerek: “Haʼu-nia esperiénsia ajuda haʼu komprende katak ita presiza tebes esperansa atu bele tahan nafatin. Jesus nia ezemplu, apóstolu sira no profeta sira-nia ezemplu no mós Jeová nia promesa sira iha Bíblia fó ita esperansa kona-ba futuru no hametin liután ita atu tahan.” Esperansa mak hanesan ankor ida ba irmaun Leonard no bele mós sai ankor ba ita.

7. Oinsá susar neʼebé ita hasoru bele hametin liután ita-nia esperansa? (Roma 5:3-5; Tiago 1:12)

⁷ Bainhira ita tahan susar no sente katak Jeová ajuda no kontente ho ita, neʼe hametin ita-nia esperansa. (Lee Roma 5:3-5; Tiago 1:12.) Rezultadu mak agora ita-nia esperansa metin liu se kompara ho tempu neʼebé ita foin simu liafuan diʼak. Satanás hakarak atu halo ita sai fraku bainhira hasoru susar ruma, maibé ho Jeová nia ajuda, ita bele tahan susar ida-idak ho susesu.

ESPERANSA MAK HANESAN KAPASETE IDA

8. Iha dalan oinsá mak esperansa hanesan ho kapasete ida? (1 Tesalónika 5:8)

⁸ Bíblia mós kompara esperansa ho kapasete ida. (Lee 1 Tesalónika 5:8.) Soldadu ida uza kapasete atu proteje ninia ulun husi buat oioin neʼebé inimigu tiru. Ita mós halo funu espirituál hasoru Satanás, tan neʼe ita presiza proteje ita-nia neon husi Satanás. Nia uza tentasaun no ideia oioin atu estraga ita-nia hanoin. Hanesan kapasete proteje soldadu ida nia ulun, ita-nia esperansa proteje ita-nia hanoin atu ita bele laran-metin nafatin ba Jeová.

9. Saida mak akontese bainhira ema la iha esperansa?

⁹ Ita-nia esperansa kona-ba moris rohan-laek sei ajuda ita atu halo desizaun ho matenek. Maibé se ita-nia esperansa sai fraku no ita komesa hanoin deʼit kona-ba ita-nia hakarak rasik, ita sei haluha ita-nia esperansa ba futuru. Hanoin toʼok kona-ba ema Kristaun balu iha sidade Korinto antigu. Sira la tau fiar tan ba buat neʼebé importante, neʼe mak esperansa kona-ba moris-hiʼas. (1 Kor 15:12) Paulo hakerek katak ema neʼebé la iha esperansa ba futuru halo tuir deʼit sira-nia hakarak isin nian. (1 Kor 15:32) Ohin loron, ema barak la tau esperansa ba Maromak nia promesa, tan neʼe sira halo buat naran deʼit atu bele sente kontente. Maibé ita tau fiar ba Maromak nia promesa kona-ba futuru. Ita-nia esperansa mak hanesan ho kapasete neʼebé proteje ita-nia hanoin no ajuda ita atu la hanoin an deʼit, tanba neʼe bele estraga ita-nia relasaun diʼak ho Jeová.—1 Kor 15:33, 34.

10. Oinsá esperansa bele proteje ita husi ideia falsu?

¹⁰ Ita-nia esperansa mós bele proteje ita husi ideia sala katak ita nunka bele halo kontente Jeová. Porezemplu, karik Ita hanoin: ‘Haʼu la merese atu hetan moris ba nafatin. Haʼu sei nunka bele halo tuir Maromak nia hakarak.’ Hanoin-hetan oinsá Job nia kolega falsu ida naran Elifaz fó sai ideia neʼebé hanesan ba Job hodi dehan: “Ema bele sai moos iha Maromak nia oin ka lae?” No Elifaz hatete kona-ba Maromak hodi dehan: “Nia la tau fiar ba ninia anju santu sira, iha ninia matan, lalehan deʼit mós la moos.” (Job 15:14, 15) Neʼe lia-bosok neʼebé aat. Satanás hakarak Ita atu hanoin hanesan neʼe. Satanás hatene katak se Ita kontinua halo ida-neʼe, neineik-neineik Ita sei lakon Ita-nia esperansa. Tan neʼe, keta simu lia-bosok sira no tau fokus ba Jeová nia promesa. Iha konfiansa katak nia hakarak atu Ita moris ba nafatin no nia sei ajuda Ita atu hetan moris ba nafatin.—1 Tim 2:3, 4.

HAMETIN ITA-NIA ESPERANSA

11. Tanbasá ita presiza pasiénsia nuʼudar ita hein ita-nia esperansa sai loos?

¹¹ Dala ruma la fasil atu kontinua iha esperansa neʼebé metin. Karik ita lakon pasiénsia atu hein Maromak kumpre ninia promesa. Maibé Jeová la iha rohan, tan neʼe buat neʼebé ita sente katak kleur demais, ba Jeová neʼe mak tempu badak deʼit. (2 Ped 3:8, 9) Nia sei kumpre buat neʼebé nia promete ona iha dalan neʼebé diʼak tebes, maibé karik la tuir tempu neʼebé ita espera. Saida mak bele ajuda ita atu hametin ita-nia esperansa nuʼudar ita hein ho pasiénsia atu Maromak kumpre ninia promesa?—Tgo 5:7, 8.

12. Tuir Ebreu 11:1, 6, oinsá esperansa liga ho fiar?

¹² Ita sei kontinua iha esperansa neʼebé metin se ita nafatin hakbesik ba Jeová tanba nia mak halo ita-nia esperansa sai loos. Atu bele iha esperansa, ita presiza fiar katak Jeová iha duni no nia “sei fó kolen ba sira neʼebé buka nia ho laran”. (Lee Ebreu 11:1, 6.) Se ita fiar duni katak Jeová iha, ita sei iha konfiansa liután katak nia sei kumpre ninia promesa sira. Mai ita aprende dalan balu atu hametin liután ita-nia relasaun diʼak ho Jeová no mós ita-nia esperansa.

13. Oinsá ita bele hakbesik ba Maromak?

¹³ Halo orasaun ba Jeová no lee Bíblia. Maski ita labele haree Jeová, maibé ita bele hakbesik ba nia. Ita bele koʼalia ba nia liuhusi orasaun no fiar katak nia sei rona ba ita. (Jer 29:11, 12) Ita bele rona ba Maromak liuhusi lee no hanoin kleʼan kona-ba Bíblia. Bainhira ita lee kona-ba oinsá uluk Jeová tau matan ba ninia atan sira, ita-nia esperansa sei sai metin liután. Buat hotu iha Bíblia “hakerek hodi hanorin ita. Neʼe fó ita esperansa tanba Eskritura sira-neʼe ajuda ita atu tahan no fó kmaan mai ita”.—Rom 15:4.

14. Tanbasá ita presiza hanoin kona-ba buat neʼebé Jeová halo ona ba ema seluk?

¹⁴ Hanoin kleʼan kona-ba oinsá Jeová kumpre ninia promesa. Hanoin toʼok buat neʼebé Maromak halo ba Abraão no Sara. Sira ferik-katuas, tan neʼe sira labele iha oan. Maibé Maromak promete ba sira katak sira sei iha oan. (Gén 18:10) Abraão sente oinsá? Bíblia hatete: “Nia fiar katak nia bele sai aman ba nasaun barak.” (Rom 4:18) Maski Abraão la hatene Maromak sei kumpre promesa neʼe iha dalan oinsá, maibé nia fiar katak Jeová sei kumpre duni ninia promesa. No Jeová halo nuneʼe duni. (Rom 4:19-21) Istória husi fiar-naʼin sira bele ajuda ita atu fiar katak Jeová sempre kumpre ninia promesa, maski karik ita sente neʼe imposivel.

15. Tanbasá importante atu hanoin kona-ba buat neʼebé Maromak halo ona mai ita?

¹⁵ Hanoin kona-ba buat neʼebé Jeová halo ona ba Ita. Hanoin kona-ba oinsá Ita rasik hetan ona benefísiu husi promesa sira iha Bíblia neʼebé sai loos ona. Porezemplu, Jesus promete katak ninia Aman sei tau matan ba Ita-nia presiza. (Mt 6:32, 33) Jesus mós hatete katak Jeová sei fó ba Ita espíritu santu bainhira Ita husu ida-neʼe ba nia. (Lc 11:13) Jeová kumpre duni ninia promesa sira-neʼe. Karik Ita bele hanoin kona-ba promesa seluk neʼebé Jeová kumpre no lori benefísiu mai Ita. Porezemplu, nia promete atu fó perdua ba Ita, fó kmaan ba Ita, no fó ai-han espirituál ba Ita. (Mt 6:14; 24:45; 2 Kor 1:3) Bainhira Ita hanoin kleʼan kona-ba buat neʼebé Maromak halo ona ba Ita, Ita-nia esperansa kona-ba buat neʼebé Maromak sei halo iha futuru sai metin liután.

HAKSOLOK HO ITA-NIA ESPERANSA

16. Tanbasá esperansa mak prezente folin-boot?

¹⁶ Esperansa kona-ba moris ba nafatin mak prezente folin-boot husi Maromak. Ita hein namanas ba futuru kapás neʼebé sei akontese duni. Esperansa mak hanesan ankor neʼebé bele ajuda ita tahan bainhira hasoru susar sira, ema fó-terus, ka ita-nia moris iha perigu laran. Esperansa mós hanesan kapasete tanba bele proteje ita-nia hanoin atu ita bele halo buat neʼebé loos no la monu ba sala. Esperansa husi Bíblia ajuda ita hakbesik liután ba Maromak no hatudu katak nia hadomi tebes ita. Ita hetan benefísiu boot bainhira ita kontinua hametin ita-nia esperansa.

17. Tanbasá esperansa lori ksolok mai ita?

¹⁷ Iha apóstolu Paulo nia karta ba kongregasaun Roma, nia anima sira: “Haksolok tanba imi-nia esperansa.” (Rom 12:12) Paulo sente haksolok tanba nia iha konfiansa katak se nia laran-metin nafatin, nia sei hetan moris rohan-laek iha lalehan. Ita mós bele haksolok ho ita-nia esperansa tanba fiar metin katak Jeová sei kumpre ninia promesa sira. Ema ida neʼebé hakerek Salmo hatete: “Ksolok ba ema neʼebé . . . tau esperansa ba ninia Maromak Jeová . . . Ida neʼebé sempre laran-metin.”—Sal 146:5, 6.