Pergunta Husi Lee-naʼin
Iha Salmo 61:8, David hatete katak nia sei hahiʼi Maromak nia naran “ba nafatin”. David hanoin nia sei nunka mate ka lae?
Lae. David nia liafuan mak loos.
Hanoin toʼok David nia liafuan iha versíkulu neʼe no mós versíkulu seluk neʼebé atu hanesan. “Haʼu sei kanta knananuk hahiʼi nian ba Ita-nia naran ba nafatin no kumpre haʼu-nia juramentu sira loron ba loron.” “Oh Jeová, haʼu-nia Maromak, haʼu hahiʼi Ita ho haʼu-nia laran tomak, no haʼu sei fó glória ba Ita-nia naran ba nafatin.” “Haʼu sei hahiʼi Ita-nia naran tinan ba tinan ba nafatin.”—Sal 61:8; 86:12; 145:1, 2.
David la hanoin katak nia sei nunka mate. Nia hatene Jeová hatete ona katak ema sei mate tanba halo sala, no David mós hatene katak nia mak ema sala-naʼin. (Gén 3:3, 17-19; Sal 51:4, 5) Nia hatene katak mane sira neʼebé fiar metin hanesan Abraão, Isaac no Jacob mós mate. Nia hatene katak nia mós sei mate. (Sal 37:25; 39:4) Salmo 61:8 hatudu katak nia hakarak tebes no deside metin atu hahiʼi Maromak ba nafatin, ka durante ninia moris tomak.—2 Sam 7:12.
Dala ruma, David hakerek kona-ba ninia esperiénsia rasik hanesan iha introdusaun ba Salmo 18, 51 no 52. David mak bibi-atan ida no iha Salmo 23, David mós kompara Jeová ho bibi-atan neʼebé fó matadalan, fó kmaan no protesaun. Neʼe book David atu serbí Maromak ‘iha ninia moris tomak’.—Sal 23:6.
Jeová mak dirije David atu hakerek informasaun hotu. David mós hakerek profesia sira kona-ba futuru. Porezemplu, iha Salmo 110, David hakerek kona-ba tempu neʼebé ninia Naʼi sei “tuur iha [Maromak nia] liman-loos” iha lalehan no simu kbiit boot. Kbiit atu halo saida? Atu domina Maromak nia inimigu sira no “tesi-lia hasoru nasaun sira” iha mundu. David mak Jesus nia beiʼala. No ikusmai Jesus sai nuʼudar Mesias. Mesias sei ukun husi lalehan no sai nuʼudar “amlulik ba nafatin”. (Sal 110:1-6) Jesus hatete katak profesia iha Salmo 110 mak kona-ba nia no profesia neʼe mós sei sai loos iha futuru.—Mt 22:41-45.
Sin, Jeová dirije David atu hakerek kona-ba David nia tempu no mós tempu neʼebé David sei hetan moris-hiʼas iha futuru no bele fó hahiʼi ba Jeová ba nafatin. Tan neʼe, Salmo 37:10, 11, 29 bele aplika ba David nia tempu no mós ba futuru. Versíkulu sira-neʼe sai loos ona iha Izraél antigu no mós sei sai loos iha futuru bainhira Maromak kumpre ninia promesa sira.—Haree parágrafu 8 husi informasaun ho títulu “Ó sei hamutuk ho haʼu iha Paraízu” iha Livru Haklaken neʼe.
Salmo 61:8 no versíkulu sira seluk neʼebé atu hanesan hatudu katak David hakarak fó hahiʼi ba Jeová iha Izraél antigu toʼo nia mate. Versíkulu sira-neʼe mós hatudu buat neʼebé David sei halo iha futuru bainhira Jeová fó moris-hiʼas ba nia.