Iha dame maski hasoru susar

1. “Maromak nia dame” katak sá no ita hetan benefísiu saida husi ida-neʼe? (Filipe 4:6, 7)

EMA barak iha mundu la hatene kona-ba “Maromak nia dame”. Dame neʼe mak sentimentu kalma neʼebé ita hetan tanba iha relasaun diʼak ho Maromak. Bainhira ita iha Maromak nia dame, ita sente seguru. (Lee Filipe 4:6, 7.) Ita kontente tanba iha relasaun diʼak ho ema seluk neʼebé hadomi Jeová. No ita mós kontente tanba bele habelun ho “Maromak neʼebé fó dame”. (1 Tes 5:23) Bainhira ita hatene, tau fiar no halo tuir Aman Jeová, ninia dame sei halo ita kalma bainhira ita hasoru susar.

2. Tanbasá ita bele fiar katak ita bele iha Maromak nia dame?

² Ita bele hetan duni Maromak nia dame maski hasoru daudaun susar hanesan moras-peste, dezastre, funu, no ema fó-terus ita ka lae? Maski neʼe bele halo ita sente taʼuk, maibé Jesus fó konsellu hodi dehan: “Keta husik imi-nia laran sente susar no keta husik imi-nia laran sente taʼuk.” (João 14:27) Irmaun-irmán sira halo tuir konsellu neʼe. Ho Jeová nia ajuda, sira bele sente dame maski hasoru susar sira.

HETAN DAME BAINHIRA MOSU MORAS-PESTE

3. Oinsá mak epidemia ka pandemia bele halakon ita-nia dame?

³ Epidemia ka pandemia bele lori impaktu boot ba ita. Porezemplu, COVID-19 afeta ema barak. Peskiza ida hatudu katak ema porsentu 50 liu susar atu toba iha kalan durante pandemia. Durante pandemia, ema barak sente laran-taridu, depresaun, hemu tua demais, uza droga, no koko atu oho an no violénsia doméstika mós aumenta liután. Se moras-peste mosu iha Ita-nia área, oinsá Ita bele hamenus Ita-nia laran-taridu no iha Maromak nia dame?

4. Tanbasá hatene Jesus nia profesia kona-ba loron ikus sira, lori dame mai ita?

⁴ Jesus fó-hatene nanis katak durante loron ikus sira, sei mosu moras-peste “iha fatin oioin”. (Lc 21:11) Oinsá hatene ida-neʼe bele lori dame ba ita? Ita sei la hakfodak bainhira moras-peste ida mosu. Ita hatene katak Jesus nia liafuan sira sai loos duni. Tan neʼe diʼak atu halo tuir Jesus nia konsellu neʼebé nia fó ba sira neʼebé hela iha sistema neʼe nia rohan: “Kuidadu bá katak imi la sai taʼuk.”​—Mt 24:6.

5. (a) Oinsá Filipe 4:8, 9 ajuda ita deside buat neʼebé ita bele temi iha ita-nia orasaun? (b) Oinsá gravasaun Bíblia bele ajuda ita?

⁵ Bainhira mosu pandemia, neʼe bele halo ita hanoin barak no sente taʼuk. Neʼe akontese ba irmán Desi.b Depois ninia tiu, primu no doutór mate tanba COVID-19, nia taʼuk katak nia mós sei hetan no lori virus neʼe ba ninia inan neʼebé idade ona. Tanba pandemia, nia mós taʼuk katak nia sei lakon ninia serbisu. Tan neʼe nia hanoin barak kona-ba oinsá nia bele sosa hahán no mós selu aluga. Sentimentu taʼuk neʼe komesa sai makaʼas liután toʼo nia labele toba iha kalan. Maibé Desi hetan fali dame. Oinsá? Nia halo orasaun espesífiku ba Jeová atu ajuda nia sente kalma no hanoin pozitivu. (Lee Filipe 4:8, 9.) Nia rona Jeová koʼalia ba nia liuhusi gravasaun Bíblia. Nia hatete: “Lee-naʼin nia lian halo haʼu kalma no fó-hanoin haʼu kona-ba Jeová nia laran-sadiʼa.”​—Sal 94:19.

6. Oinsá estuda mesak no tuir reuniaun ajuda Ita?

⁶ Bainhira mosu moras-peste, karik neʼe bele afeta Ita-nia atividade sira, maibé keta husik ida-neʼe hanetik Ita atu estuda mesak ka tuir reuniaun. Esperiénsia husi ita-nia publikasaun no mós vídeo sira fó-hanoin Ita katak irmaun-irmán sira mós kontinua serbí Jeová ho laran-metin maski hasoru problema neʼebé hanesan ho Ita. (1 Ped 5:9) Reuniaun sira sei ajuda Ita atu hanoin kona-ba eskritura neʼebé anima Ita. Ita mós bele anima ema seluk no hetan anima. (Rom 1:11, 12) Kuandu Ita hanoin kona-ba oinsá Jeová apoia ninia atan sira neʼebé moras, taʼuk ka sente mesamesak, Ita-nia fiar mós sei sai metin no Ita iha konfiansa katak nia mós sei apoia Ita.

7. Ita bele aprende saida husi apóstolu João?

⁷ Hakaʼas an atu komunika ho irmaun-irmán sira. Kuandu mosu moras-peste, karik ita presiza halo distánsia fíziku bainhira hamutuk ho maluk sira. Karik ita mós sente hanesan buat neʼebé apóstolu João sente. Nia hakarak hasoru ninia kolega Gaio oin ba oin. (3 João 13, 14) Maibé nia hatene katak ba tempu balu nia labele hasoru malu ho Gaio. Entaun João halo buat neʼebé nia bele halo. Nia hakerek karta ida ba Gaio. Se Ita labele vizita irmaun-irmán sira, koko atu telefone sira, vídeo call, ka haruka mensajen. Bainhira Ita nafatin kontaktu malu ho maluk Kristaun sira, Ita sei sente dame no seguru. Kontaktu katuas sira se Ita sente laran-taridu tebes no Ita bele hetan anima husi sira.​—Isa 32:1, 2.

HETAN DAME IHA TEMPU DEZASTRE

8. Oinsá dezastre bele halakon Ita-nia dame?

⁸ Se Ita hetan ona susar tanba akontese bee-saʼe, rai-nakdoko, ka ahi han uma, karik neʼe bele halo Ita sente laran-taridu ba tempu kleur. Se ema neʼebé Ita hadomi mate ka Ita lakon uma no sasán, karik Ita sente triste, lakon esperansa, ka hirus. Neʼe la dehan katak Ita hafolin liu osan no sasán, ka ladún iha fiar. Ita hasoru situasaun neʼebé susar tebes, no la sala atu hanoin negativu hanesan neʼe. (Job 1:11) Maibé Ita bele nafatin iha dame. Oinsá?

9. Oinsá Jesus ajuda ita prepara ba dezastre sira?

⁹ Hanoin-hetan Jesus nia profesia. Ema balu karik nunka espera atu hasoru dezastre. Maibé ita hatene katak sei mosu dezastre barak no karik ita mós sei hasoru dezastre sira-neʼe. Jesus fó-hatene ba ninia dixípulu sira katak sei akontese “rai-nakdoko makaʼas” no dezastre seluk antes mundu nia rohan toʼo mai. (Lc 21:11) Nia mós fó sai nanis katak ‘hahalok aat sei aumenta ba beibeik’ no neʼe akontese duni ohin loron. Porezemplu, krime, violénsia, no terrorizmu. (Mt 24:12) Jesus nunka hatete katak susar sira-neʼe sei kona deʼit ema sira neʼebé la serbí Jeová. Tuir loloos, Jeová nia atan barak sai ona vítima ba dezastre sira-neʼe. (Isa 57:1; 2 Kor 11:25) Jeová sei la halo milagre ruma hodi proteje ita husi dezastre hotu, maibé nia sei fó buat neʼebé ita presiza atu nafatin kalma no iha dame.

10. Tanbasá prepara an agora ba dezastre hatudu katak ita iha fiar? (Provérbios 22:3)

¹⁰ Fasil liu atu nafatin kalma iha situasaun emerjénsia se ita prepara an nanis. Maibé neʼe katak ita ladún tau fiar ba Jeová ka lae? Laʼós hanesan neʼe. Tuir loloos, hodi prepara an ba dezastre hatudu katak ita fiar Jeová iha kbiit atu tau matan ita. Oinsá? Bíblia anima ita atu prepara an ba dezastre neʼebé sei mosu. (Lee Provérbios 22:3.) Liuhusi revista sira, reuniaun sira no mós avizu sira, Maromak nia organizasaun anima ita beibeik atu prepara an ba situasaun emerjénsia.c Ita tau fiar ba Jeová ka lae? Se nuneʼe, ita sei halo tuir konsellu sira-neʼe agora, antes dezastre ruma mosu.

11. Ita aprende saida husi irmán Margaret?

¹¹ Haree toʼok irmán Margaret nia esperiénsia. Autoridade sira haruka nia atu sai husi ninia uma tanba ahi hahú han área neʼebé nia hela. Maibé tanba ema barak koko atu evakua an iha tempu neʼebé hanesan, karreta nakonu iha estrada. Suar metan mós komesa taka área neʼe no Margaret labele sai husi ninia karreta. Maski nuneʼe, nia bele salva ninia moris tanba nia prepara an nanis. Nia rai mapa ida iha ninia karteira no nia loke mapa neʼe atu buka dalan seluk. Antes neʼe, nia mós lori karreta liu dalan neʼe hodi bele hatene didiʼak dalan neʼe. Tanba prepara an, Margaret bele salva ninia moris.

12. Tanbasá ita halo tuir matadalan kona-ba seguransa?

¹² Atu proteje ita no mós ema seluk, karik autoridade sira sei haruka ita atu halo tuir matadalan kona-ba tempu neʼebé ema hotu presiza fila ba uma, presiza evakua an ka matadalan seluk tan. Ema balu neineik atu halo tuir ka demora tanba sira lakohi husik hela sira-nia uma no sasán. Saida mak ema Kristaun presiza halo? Bíblia hatete: “Halo tuir Naʼi nia hakarak hodi hakruʼuk ba ema hotu neʼebé iha podér, hakruʼuk ba liurai tanba nia aas liu fali imi, no hakruʼuk ba ukun-naʼin sira tanba liurai hili sira.” (1 Ped 2:13, 14) Maromak nia organizasaun mós fó ita matadalan atu proteje ita. Ita hetan beibeik anima atu fó ita-nia númeru kontaktu foun ba katuas sira hodi sira bele kontaktu ita bainhira mosu situasaun emerjénsia. Ita halo ona ka lae? Karik ita mós simu matadalan husi organizasaun kona-ba labele sai husi uma, evakua ba fatin seluk, oinsá atu hetan ajuda ka kona-ba oinsá no bainhira mak ita bele ajuda ema seluk. Se ita la halo tuir, ita-nia moris no katuas sira-nia moris bele iha perigu laran. Hanoin-hetan katak katuas sira kontinua tau matan ba ita. (Ebr 13:17) Margaret hatete: “Haʼu fiar metin katak halo tuir matadalan husi katuas no organizasaun salva haʼu-nia moris.”

13. Tanbasá ema Kristaun neʼebé lakon buat hotu bele sente ksolok no dame?

¹³ Irmaun-irmán barak neʼebé lakon hela-fatin tanba dezastre ka funu, hakaʼas an atu sai toman ho sira-nia situasaun foun no kontinua serbí Jeová. Sira kontinua “haklaken liafuan diʼak” hanesan ema Kristaun iha apóstolu sira-nia tempu neʼebé presiza muda ba fatin seluk tanba ema fó-terus. (Após 8:4) Haklaken ajuda sira tau fokus ba Maromak nia Ukun duké ba sira-nia problema. Rezultadu mak sira kontinua sente haksolok no iha dame.

HETAN DAME BAINHIRA EMA FÓ-TERUS

14. Oinsá ita-nia dame bele lakon bainhira ema fó-terus ita?

¹⁴ Bainhira ema fó-terus ita, ita bele lakon buat barak neʼebé ajuda ita atu sente kalma. Ita sente kontente bainhira ita livre atu hasoru malu, haklaken ho livre, no halo buat neʼebé baibain ita halo no la sente taʼuk katak polísia sei kaer ita. Se ita labele tan halo buat sira-neʼe, karik ita sai laran-taridu no taʼuk kona-ba saida mak sei akontese tuirmai. Sentimentu neʼe mak normál. Maibé ita tenke kuidadu. Jesus fó-hatene katak bainhira ema fó-terus ninia dixípulu sira, neʼe bele halo sira sidi. (João 16:1, 2) Entaun oinsá ita bele mantein ita-nia dame bainhira ema fó-terus ita?

15. Tanbasá ita la presiza taʼuk bainhira ema fó-terus ita? (João 15:20; 16:33)

¹⁵ Bíblia hatete: “Ema hotu neʼebé hakarak atu moris ho laran-metin ba Maromak nuʼudar Kristu Jesus nia dixípulu sei hetan mós terus.” (2 Tim 3:12) Bainhira governu bandu serbisu haklaken iha rai neʼebé irmaun Andrei hela bá, nia sente susar atu simu realidade katak Jeová nia atan sira hetan terus. Nia hanoin: ‘Iha Testemuña barak iha neʼe. Oinsá mak autoridade sira bele kaer ami hotu?’ Maibé hanoin hanesan neʼe la lori dame ba nia. Nia sai laran-taridu beibeik. Irmaun seluk entrega buat hotu ba Jeová, duké hanoin katak autoridade sei la kaer sira. Sira hatene katak karik polísia sei kaer sira, maibé sira la laran-taridu demais hanesan Andrei. Entaun, Andrei deside atu iha hanoin neʼebé hanesan no tau fiar tomak ba Jeová. Lakleur nia bele sente dame no agora nia sente haksolok maski hasoru susar. Ida-neʼe mós bele akontese ba ita. Jesus fó-hatene nanis katak ema sei fó-terus ita, nia mós fó sai katak ita bele nafatin laran-metin.​—Lee João 15:20; 16:33.

16. Matadalan saida mak ita presiza halo tuir bainhira ema fó-terus ba ita?

¹⁶ Bainhira governu bandu ka hanetik ita-nia atividade, karik ita simu matadalan husi sukursál no katuas sira. Objetivu husi matadalan sira-neʼe mak atu proteje ita, atu ita bele kontinua simu ai-han espirituál no ajuda ita atu kontinua haklaken tuir ita-nia situasaun. Hakaʼas an atu halo tuir matadalan sira neʼebé ita simu, maski karik ita rasik ladún komprende ho didiʼak. (Tgo 3:17) Ita mós sei la fó sai informasaun kona-ba irmaun-irmán sira ka kongregasaun nia atividade ba ema sira neʼebé la iha direitu atu hatene kona-ba neʼe.​—Ecle 3:7.

17. Hanesan apóstolu sira, ita hakarak halo saida?

¹⁷ Razaun tanbasá Satanás ataka makaʼas Maromak nia povu mak tanba sira “halo serbisu atu fó sasin kona-ba Jesus”. (Apok 12:17) Keta husik Satanás no ninia sistema halo ita taʼuk. Ita sei hetan ksolok no dame bainhira ita kontinua haklaken no hanorin maski ema fó-terus ita. Iha apóstolu sira-nia tempu, bainhira ulun-naʼin Judeu sira haruka apóstolu sira atu para haklaken, sira hili atu halo tuir Maromak. Sira kontinua haklaken, no ida-neʼe halo sira sente kontente. (Após 5:27-29, 41, 42) Bainhira autoridade bandu serbisu haklaken, ita tenke haklaken ho kuidadu. (Mt 10:16) Maibé se ita hakaʼas an, ita sei hetan dame tanba halo Jeová kontente no fahe mensajen neʼebé bele salva moris.

“MAROMAK DAME NIAN SEI HAMUTUK HO IMI”

18. Iha neʼebé mak ita hetan dame neʼebé loos?

¹⁸ Fiar bá katak maski hasoru susar oioin, ita bele iha dame. Iha tempu susar sira, ita tenke hanoin-hetan katak ita presiza Maromak nia dame, dame neʼe mai deʼit husi Jeová. Sadere ba nia bainhira mosu moras-peste, akontese dezastre ka kuandu ema fó-terus ita. Nafatin hakbesik ba Jeová nia organizasaun. Hateke ba futuru kapás neʼebé lakleur tan ita sei hetan. Se ita halo nuneʼe, ‘Maromak dame nian sei hamutuk ho ita’. (Flp 4:9) Iha lisaun tuirmai, ita sei aprende kona-ba oinsá ita bele ajuda maluk Kristaun neʼebé hasoru daudaun susar atu bele iha Maromak nia dame.