Haʼu haree Jeová nia povu hatudu fiar

Haʼu hamnasa tanba haʼu sente haʼu-nia kolega laʼós ema relijiozu. Haʼu hatete: “Ó hatene saida kona-ba Bíblia?” Nia la hatán kedas. Ikusmai, nia hatete katak ninia amá mak Testemuña, no ninia amá esplika buat balu ba nia. Tanba hakarak hatene, haʼu husu nia atu esplika liután.

Ami koʼalia durante kalan tomak. Haʼu-nia kolega hatete katak tuir Bíblia, Satanás mak ukun mundu. (João 14:30) Karik Ita hatene ida-neʼe kleur ona, maibé ba haʼu ideia neʼe mak foun no interese. Haʼu sempre rona katak Maromak neʼebé laran-diʼak mak ukun mundu. Maibé neʼe la lójiku tanba situasaun sira iha mundu neʼe. Maski haʼu tinan 26 deʼit, haʼu haree ona buat oioin neʼebé halo haʼu hanoin barak.

Haʼu-nia apá mak pilotu ba tropa Estadus Unidus. Tan neʼe husi kiʼik kedas, haʼu hatene katak funu nukleár bele akontese tanba militár sira prontu atu tiru bomba neʼe iha tempu naran deʼit. Haʼu tuir universidade iha Kalifórnia kuandu mosu funu iha rai-Vietname. Haʼu protesta hamutuk estudante sira. Polísia kaer ai-tonka hodi duni ami, no ami halai. Polísia tiru gás no susar ba ami atu haree no dada iis. Situasaun runguranga no ema kontra makaʼas. Ema oho polítiku-naʼin balu, no ema mós protesta no halo violénsia. Ema iha opiniaun la hanesan kona-ba saida mak sira presiza halo. Neʼe runguranga tebes.

Iha tinan 1970, haʼu hetan serbisu iha parte norte husi Alaska no manán osan barak. Tuirmai haʼu saʼe aviaun ba Londres, haʼu sosa motór no halo viajen maski la hatene atu bá neʼebé. Fulan balu liutiha, haʼu toʼo iha Áfrika. Iha dalan, haʼu hasoru ema neʼebé hakarak atu halai husi sira-nia problema ka situasaun susar.

Bíblia hanorin katak anju aat ida mak kontrola mundu, neʼe lójiku ba haʼu tanba situasaun sira neʼebé haʼu haree no rona ona. Maibé se Maromak la ukun mundu, entaun saida mak nia halo? Haʼu hakarak hatene.

Fulan barak tuirmai, haʼu hetan resposta. Neineik-neineik, haʼu mós koñese no hadomi ema oioin neʼebé hatudu fiar ba Maromak iha situasaun hotu.

IRLANDA PARTE NORTE MAK “FATIN BA BOMBA NO KILAT-MUSAN”

Kuandu haʼu fila fali ba Londres, haʼu kontaktu haʼu-nia kolega nia amá, no nia fó haʼu Bíblia ida. Kuandu haʼu bá Amsterdaun iha rai-Olanda, Testemuña ida haree haʼu lee hela iha estrada ninin no nia ajuda haʼu atu aprende liután. Depois neʼe, haʼu bá Dublín iha rai-Irlanda no hetan sukursál ba Testemuña ba Jeová. Haʼu dere sira-nia odamatan no haʼu hasoru irmaun Arthur Matthews neʼebé matenek no iha esperiénsia barak. Haʼu husu nia atu estuda Bíblia ho haʼu.

Haʼu komesa badinas atu estuda no lee publikasaun sira husi Testemuña. Haʼu mós lee Bíblia. Neʼe kona duni haʼu-nia laran. Iha reuniaun, haʼu bele haree katak labarik deʼit mós bele hatán ba pergunta sira neʼebé ema barak husu durante tinan barak: ‘Tanbasá buat aat akontese? Sé mak Maromak neʼebé loos? Saida mak akontese kuandu ita mate?’ Haʼu ransu deʼit ho Testemuña sira. Fasil atu halo nuneʼe tanba haʼu la koñese ema seluk. Sira ajuda haʼu atu hadomi Jeová no hakarak atu halo ninia hakarak.

Iha tinan 1972, haʼu hetan batizmu. Tinan ida liutiha, haʼu komesa serbí nuʼudar pioneiru no tuir kongregasaun kiʼik ida iha Newry, Irlanda Norte. Haʼu aluga uma kiʼik ida iha área izoladu. Iha neʼebá, iha karau sira no haʼu treinu hatoʼo diskursu iha sira-nia oin. Haree hanesan sira rona didiʼak nuʼudar sira nata duʼut. Maski sira labele fó konsellu, maibé sira ajuda haʼu aprende atu hateke ba rona-naʼin. Iha tinan 1974, haʼu simu knaar atu serbí nuʼudar pioneiru espesiál hamutuk ho irmaun Nigel Pitt neʼebé sai haʼu-nia belun diʼak.

Iha tempu neʼebá, akontese violénsia barak iha Irlanda Norte. Ema balu bolu Irlanda Norte nuʼudar “fatin ba bomba no kilat-musan”. Ema sempre baku malu iha dalan, tiru malu no tau bomba iha karreta. Problema mosu tanba asuntu polítiku no mós relijiaun. Maibé Protestante no mós Katólika rekoñese katak Testemuña sira neutrál kona-ba buat polítika, tan neʼe ami bele haklaken ho livre no seguru. Baibain uma-naʼin sira hatene bainhira no iha neʼebé mak sei mosu violénsia no sira mós fó avizu ba ami atu nuneʼe ami bele hadook an husi perigu.

Maski nuneʼe, dala ruma ami hasoru perigu. Loron ida, irmaun pioneiru ida naran Denis Carrigan haklaken ho haʼu iha sidade ida. La iha Testemuña iha neʼebá no neʼe mak dala segundu ami vizita sidade neʼe. Feto ida duun katak ami mak espiaun husi soldadu Inglaterra, karik neʼe tanba ami la koʼalia logat Irlanda. Ami taʼuk tebes. Se ita hasé deʼit soldadu Inglaterra, ema Irlanda sei tiru mate ita ka tiru ita-nia ain-tuur. Kuandu ami hamriik mesamesak hodi hein bís, ami haree karreta para iha restaurante nia oin, fatin neʼebé feto ida duun ami. Feto neʼe sai mai hodi koʼalia ho mane naʼin-rua neʼebé iha karreta laran, no nia hatudu mai ami naʼin-rua. Mane sira-neʼe lori karreta hakbesik ami no husu pergunta balu kona-ba bís nia oráriu. Kuandu bís toʼo, sira koʼalia ba xofér. Ami labele rona buat neʼebé sira koʼalia. Bís mamuk, tan neʼe haʼu hanoin katak sira halo planu atu oho ami iha sidade nia liʼur. Maibé neʼe la akontese. Kuandu haʼu tun, haʼu husu xofér: “Mane naʼin-rua neʼe husu pergunta kona-ba ami ka?” Nia hatán: “Haʼu fó-hatene sira katak haʼu koñese imi. Keta hanoin barak, imi seguru.”

Iha reuniaun boot iha tinan 1976 iha Dublín, haʼu hasoru Pauline Lomax neʼebé mai vizita. Nia mak pioneiru espesiál ida husi rai-Inglaterra. Nia laran-metin, haraik an no laran-diʼak. Nia no ninia alin-mane Ray hatene lia-loos husi kiʼik. Tinan ida liutiha, haʼu no Pauline kaben no ami kontinua serbí nuʼudar pioneiru espesiál iha Ballymena, Irlanda Norte.

Ami serbí nuʼudar katuas área ba tempu balu no vizita irmaun-irmán sira iha Belfast, Londonderry, no iha área perigu sira seluk. Ami hetan anima husi irmaun-irmán neʼebé fiar metin no husik tiha relijiaun falsu nia doutrina, hahalok odi no rasizmu atu bele serbí Jeová. Jeová haraik bensaun ba sira no proteje sira!

Haʼu hela iha Irlanda ba tinan 10. No iha tinan 1981, ami hetan konvite atu tuir Eskola Gilead klase 72. Depois gradua, ami hetan knaar atu serbí iha rai-Serra Leoa, Áfrika parte Oeste.

IRMAUN-IRMÁN SIRA IHA SERRA LEOA FIAR-METIN MASKI KIAK

Ami hela iha uma ba misionáriu sira hamutuk ho irmaun-irmán naʼin-11. Iha dapur ida, sentina tolu, hariis-fatin rua, telefone uma nian ida, mákina fase roupa ida no mákina hamaran roupa ida. Eletrisidade mate beibeik. Iha laho barak iha uma kakuluk, no iha mós samea kobra.

Maski situasaun moris la fasil, maibé ami gosta tebes haklaken. Ema respeitu Bíblia no rona didiʼak. Ema barak estuda Bíblia no ikusmai sai Testemuña. Ema Serraleonés bolu haʼu “Señór Robert” no bolu Pauline “Señora Robert”. Maibé bainhira haʼu serbí iha sukursál no ladún haklaken, ema komesa bolu Pauline “Señora Pauline” no bolu haʼu “Señór Pauline”. Pauline gosta ida-neʼe!

Irmaun-irmán barak mak kiak, maibé Jeová sempre tau matan ba sira-nia presiza, dala ruma iha dalan neʼebé úniku loos. (Mt 6:33) Loron ida, irmán ida iha osan natoon deʼit atu sosa hahán ba nia no ninia oan sira, maibé nia fó hotu osan neʼe ba irmaun neʼebé la iha osan atu sosa ai-moruk malária. Iha loron neʼebé hanesan, feto ida selu irmán neʼe atu hadiʼa feto neʼe ninia fuuk. Iha esperiénsia barak hanesan neʼe.

APRENDE KULTURA FOUN IHA RAI-NIJÉRIA

Ami hela iha Serra Leoa durante tinan sia. Tuirmai muda ba Betel neʼebé boot iha rai-Nijéria. Haʼu halo serbisu neʼebé hanesan iha Serra Leoa, maibé neʼe mak mudansa boot no susar liu ba Pauline. Uluk, nia uza oras 130 fulan-fulan atu haklaken no iha estudante Bíblia barak neʼebé laʼo ba oin. Maibé nia hetan knaar foun atu suku roupa. Loroloron nia presiza hadiʼa roupa neʼebé naklees. Presiza tempu balu atu nia bele sai toman ho mudansa neʼe, maibé nia rekoñese katak ema seluk sente agradese tebes ho ninia serbisu no nia tau fokus atu anima ema Betel.

Nijéria nia kultura mak foun mai ami no ami presiza aprende buat barak. Loron ida, irmaun ida fó koñese ba haʼu irmán ida neʼebé foin mak serbí iha Betel. Bainhira haʼu hakbesik atu kaer-liman, nia hakneʼak no hakruʼuk toʼo rai. Haʼu hakfodak! Haʼu hanoin-hetan kedas eskritura rua: Apóstolu 10:25, 26 no Apokalipse 19:10. Haʼu hanoin: ‘Haʼu presiza korrije nia ka lae?’ Maibé haʼu mós rekoñese katak Betel simu ona nia, neʼe katak nia hatene ona Bíblia nia hanorin.

Haʼu ladún sente kmaan bainhira koʼalia hamutuk. Tuirmai haʼu halo riset. Haʼu aprende katak irmán neʼe halo tuir kostume neʼebé ema iha área balu iha nasaun neʼe halo. Mane sira mós halo buat neʼebé hanesan. Neʼe mak sira-nia dalan atu hatudu respeitu. Neʼe laʼós adorasaun. Bíblia temi ezemplu balu kona-ba neʼe. (1 Sam 24:8) Haʼu kontente tanba haʼu la koʼalia buat ruma neʼebé bele hamoe irmán neʼe.

Ami hasoru ema Nijerianu barak neʼebé hatudu laran-metin durante tinan barak. Ezemplu ida mak Isaiah Adagbona.a Nia aprende lia-loos kuandu joven hela, maibé tuirmai nia hetan moras-lepra. Tan neʼe nia presiza hela iha komunidade moras-lepra nian no só nia deʼit mak Testemuña. Maski ema kontra nia, nia ajuda ona ema moras-lepra naʼin-30 liu atu simu lia-loos no forma kongregasaun iha komunidade neʼe.

IRMAUN-IRMÁN IHA RAI-KÉNIA HATUDU PASIÉNSIA MAI HAʼU

Iha tinan 1996, ami hetan knaar atu serbí iha sukursál Kénia. Neʼe mak dala primeiru haʼu vizita fali nasaun neʼe. Ami hela iha Betel. Iha lekirauk barak iha ami-nia hela-fatin. Dala barak sira naʼok ai-fuan husi irmán sira. Loron ida, irmán ida iha Betel haluha atu taka janela. Bainhira nia fila ba uma, nia haree lekirauk balu han hela ninia hahán. Nia hakilar no halai sai. Lekirauk sira hakfodak no haksoit sai husi janela.

Haʼu no Pauline tuir kongregasaun língua Suahili. Liutiha tempu balu, haʼu hetan knaar atu dirije Reuniaun Estudu Livru (agora hanaran Estudu Bíblia iha Kongregasaun). Maibé haʼu seidauk bele koʼalia língua Suahili ho moos. Haʼu prepara sedu atu nuneʼe haʼu bele lee pergunta sira. Maibé se komentáriu ladún hanesan buat neʼebé hakerek iha publikasaun, haʼu sei la komprende. Haʼu sente la kmaan! Haʼu sente triste ba irmaun-irmán sira. Haʼu admira sira-nia pasiénsia no haraik an atu husik haʼu dirije reuniaun.

FIAR METIN MASKI MORIS IHA ESTADUS UNIDUS NEʼEBÉ RIKU

Ami serbí iha rai-Kénia la toʼo tinan ida. Tuirmai iha tinan 1997, ami hetan konvite atu serbí iha Betel Brooklyn, Novaiorke. Iha Estadu Unidus, ema barak iha sasán no rikusoin barak, no neʼe bele hamosu problema seluk tan. (Prov 30:8, 9) Maski nuneʼe, irmaun-irmán sira hatudu fiar metin. Sira uza sira-nia tempu no sasán laʼós atu sai riku, maibé atu apoia serbisu neʼebé Jeová nia organizasaun halo.

Durante tinan barak, ami haree ona oinsá irmaun-irmán sira hatudu fiar maski sira-nia situasaun moris la hanesan. Iha rai-Irlanda, sira hatudu fiar maski mosu violénsia makaʼas. Iha Áfrika, sira hatudu fiar maski kiak no moris iha área izoladu. Iha Estadus Unidus, sira hatudu fiar maski moris iha nasaun neʼebé riku. Ita bele fiar katak Jeová sente kontente tebes bainhira nia haree ema sira neʼebé hatudu sira-nia domin ba nia iha situasaun naran deʼit!

Tinan sira liu lalais deʼit, “lalais liu fali ai neʼebé ema muda bá-mai atu soru hena”. (Job 7:6) Ohin loron, ami serbisu hamutuk ho ema seluk iha sede-jerál iha Warwick, Novaiorke no ami sente haksolok atu serbisu hamutuk ho ema neʼebé hadomi malu. Ami kontente no agradese atu halo buat neʼebé ami bele atu apoia ita-nia Liurai, Kristu Jesus neʼebé lakleur tan sei haraik bensaun ba ema sira neʼebé fiar metin.​—Mt 25:34.