Hanesan Sansão, sadere ba Jeová

1-2. Tanbasá diʼak atu aprende kona-ba Sansão nia istória?

BAINHIRA Ita rona naran Sansão, saida mak mosu iha Ita-nia hanoin? Karik Ita hanoin kona-ba mane neʼebé iha forsa boot. Neʼe loos. Maibé Sansão mós halo desizaun neʼebé sala no lori rezultadu la diʼak ba nia. Maski nuneʼe, Jeová fokus ba buat diʼak hotu neʼebé Sansão halo hodi serbí nia, no temi Sansão nia istória iha Bíblia nuʼudar ezemplu mai ita.

² Jeová uza Sansão atu kumpre buat barak hodi bele ajuda Ninia povu Izraél. Tinan atus ba atus depois Sansão mate, Jeová dirije apóstolu Paulo atu temi Sansão nia naran iha lista kona-ba mane fiar-naʼin sira. (Ebr 11:​32-34) Sansão nia ezemplu bele anima ita. Nia tau fiar ba Jeová, maski hasoru susar oioin. Iha lisaun neʼe, ita sei koʼalia kona-ba saida mak ita bele aprende husi Sansão no oinsá ninia ezemplu bele anima ita.

SANSÃO TAU FIAR BA JEOVÁ

3. Jeová fó knaar saida ba Sansão?

³ Bainhira Sansão moris, ema Filístia mak ukun nasaun Izraél no hanehan povu. (Juís 13:1) Ema Filístia nia ukun lori susar oioin ba ema Izraél. Jeová hili Sansão atu “salva ema Izraél husi ema Filístia nia liman”. (Juís 13:5) Neʼe mak knaar neʼebé susar! Atu bele kumpre knaar neʼe, Sansão presiza tau fiar ba Jeová.

4. Oinsá mak Jeová ajuda Sansão atu livre husi ema Filístia? (Juís 15:​14-16)

⁴ Haree toʼok ezemplu kona-ba oinsá Sansão tau fiar ba Jeová no sadere ba Jeová atu apoia nia. Loron ida, tropa Filístia mai atu kaer Sansão iha Lehi, karik iha Judá. Mane Judá sira sai taʼuk, tan neʼe sira deside atu entrega Sansão ba inimigu. Mane sira-neʼe kesi metin Sansão ho tali foun rua no lori Sansão ba ema Filístia. (Juís 15:​9-13) Maibé “Jeová nia espíritu fó kbiit” ba Sansão no nia halo tali iha ninia liman namkore. Tuirmai, “nia hetan kuda-burru aman neʼebé foin mate nia hasan-ruin”, no nia foti no uza ida-neʼe atu oho ema Filístia naʼin-1.000!—Lee Juís 15:​14-16.

5. Oinsá Sansão hatudu katak nia tau fiar ba Jeová?

⁵ Tanbasá mak Sansão uza kuda-burru nia hasan-ruin? Neʼe laʼós ekipamentu neʼebé baibain ema uza hodi halo funu! Sansão fiar metin katak Jeová sei ajuda nia kontra ema Filístia hodi uza buat naran deʼit. Sin, nia uza buat neʼebé iha atu kumpre Jeová nia hakarak. Klaru katak Sansão manán ninia inimigu sira tanba nia tau fiar ba Jeová.

6. Saida mak ita bele aprende husi Sansão?

⁶ Jeová mós bele ajuda ita atu kumpre ita-nia knaar sira, maski neʼe haree hanesan imposivel. Maromak bele ajuda ita iha dalan neʼebé ita la imajina. Hanesan Sansão, Ita bele fiar katak se Ita sadere ba Jeová, nia sei ajuda Ita atu kumpre ninia hakarak.—Prov 16:3.

7. Ezemplu saida mak hatudu katak importante atu buka Jeová nia matadalan?

⁷ Irmaun-irmán barak neʼebé ajuda iha serbisu konstrusaun hatudu katak sira tau fiar ba Jeová. Iha tempu uluk, baibain irmaun sira mak halo dezeñu no harii Reuniaun-Fatin foun no mós eskritóriu sira. Maibé Jeová nia povu aumenta barak liután, tan neʼe organizasaun presiza halo mudansa. Irmaun sira neʼebé dirije organizasaun halo orasaun hodi husu Jeová nia matadalan no koko métodu foun, hanesan sosa edifísiu neʼebé harii ona no hadiʼa fali ida-neʼe. Irmaun Robert neʼebé ajuda ho projetu konstrusaun iha mundu tomak durante tinan barak, hatete: “Foufoun, la fasil ba ema balu atu halo tuir matadalan foun neʼe. Neʼe mak mudansa boot husi buat neʼebé halo ba tempu kleur ona. Maibé irmaun sira prontu atu adapta, no ita bele haree ho klaru katak Jeová haraik bensaun ba mudansa neʼe.” Neʼe mak ezemplu ida deʼit kona-ba oinsá Jeová dirije ninia povu atu kumpre ninia hakarak. Dala ruma ita hotu presiza husu ba ita-nia an: ‘Haʼu buka Jeová nia matadalan no prontu atu halo mudansa bainhira serbí nia ka lae?’

SANSÃO APROVEITA DIDIʼAK BUAT NEʼEBÉ JEOVÁ FÓ BA NIA

8. Bainhira Sansão hamrook tebes, saida mak nia halo?

⁸ Karik Ita hanoin-hetan buat kmanek seluk neʼebé Sansão halo. Nia mesak deʼit mak oho leaun, no mós oho ema naʼin-30 iha ema Filístia nia sidade Askelon. (Juís 14:​5, 6, 19) Sansão rekoñese katak ho Jeová nia ajuda deʼit mak nia bele kumpre buat sira-neʼe. Nia hatudu ida-neʼe bainhira nia sai hamrook tebes kuandu oho tiha ema Filístia naʼin-1.000. Saida mak nia halo? Duké sadere ba ninia an rasik atu buka bee, nia husu Jeová nia ajuda.—Juís 15:18.

9. Oinsá mak Jeová hatán ba Sansão nia orasaun? (Juís 15:19)

⁹ Jeová hatán Sansão nia orasaun hodi halo milagre atu halo bee-matan ida. Bainhira Sansão hemu bee neʼe, “ninia forsa fila fali ba nia no nia sente forte fali”. (Lee Juís 15:19.) Tinan barak liutiha, bee-matan neʼe nafatin iha bainhira Samuel hakerek livru Juís. Kuandu ema Izraél haree bee-matan neʼe, neʼe bele fó-hanoin sira katak se sira sadere ba Jeová, nia sei ajuda sira.

10. Ita presiza halo saida atu simu ajuda husi Jeová? (Haree mós dezeñu.)

¹⁰ Ita mós presiza sadere ba Jeová maski ita iha abilidade ka ita kumpre ona buat barak hodi serbí nia. Ita presiza ho haraik an rekoñese katak ita bele hetan susesu tan deʼit ita sadere ba Jeová. Hanesan Sansão hetan fali forsa bainhira hemu bee neʼebé Jeová fó ba nia, ita-nia fiar mós sei sai metin liután bainhira ita aproveita buat hotu neʼebé Jeová fó mai ita.—Mt 11:28.

11. Oinsá mak ita bele aproveita didiʼak buat neʼebé Jeová fó mai ita? Fó toʼok ezemplu.

¹¹ Hanoin toʼok ezemplu husi irmaun ida iha Rúsia naran Aleksey neʼebé tahan hasoru susar makaʼas. Saida mak ajuda nia atu hamriik metin maski hasoru susar? Nia no ninia feen kontinua estuda Bíblia no halaʼo adorasaun beibeik. Nia hatete: “Haʼu hakaʼas an atu kontinua halo buat espirituál nian, hanesan estuda mesak no lee Bíblia loroloron. Dadeer-dadeer, haʼu no haʼu-nia feen koʼalia hamutuk kona-ba eskritura loroloron nian no halo orasaun ba Jeová.” Saida mak ita aprende? Duké sadere ba ita-nia an rasik, ita presiza sadere ba Jeová. Oinsá? Hakaʼas an atu hametin ita-nia fiar liuhusi estuda mesak no halaʼo atividade espirituál nian beibeik. Jeová sei haraik bensaun barak ba ita-nia hakaʼas an atu serbí nia. Hanesan Sansão, Maromak mós bele hametin ita.

SANSÃO LA RENDE AN

12. Saida mak desizaun sala neʼebé Sansão halo, no oinsá ninia relasaun ho Dalila la hanesan ho feto sira seluk?

¹² Sansão mós la perfeitu hanesan ita, tan neʼe dala ruma nia mós halo desizaun neʼebé sala. Iha situasaun ida, nia halo desizaun neʼebé lori konsekuénsia aat tebes. Bainhira Sansão serbí tiha nuʼudar juís ba tempu barak, nia “laran-monu ba feto ida besik Mota Sorek, no ninia naran Dalila”. (Juís 16:4) Antes neʼe, Sansão hakarak atu kaben ho feto Filístia ida, entaun Jeová dirije Sansão atu halo nuneʼe, hodi nia bele iha “oportunidade atu kontra ema Filístia”. Tuirmai Sansão hela iha feto-aat nia uma iha sidade Gaza iha Filístia. Iha tempu neʼebá, Maromak fó kbiit ba Sansão atu fokit sai no hulan sidade nia portaun, no neʼe halo sidade neʼe la seguru tan. (Juís 14:​1-4; 16:​1-3) Maibé Sansão nia relasaun ho Dalila la hanesan ho feto sira seluk tanba karik Dalila mak ema Izraél no neʼe la fó oportunidade ba Sansão atu kontra hasoru ema Filístia.

13. Saida mak Dalila halo ba Sansão?

¹³ Ema Filístia fó osan barak ba Dalila atu bele lohi Sansão. Karik Sansão hadomi tebes Dalila, tan neʼe nia la rekoñese Dalila nia planu neʼebé aat. Dalila husu beibeik Sansão atu fó sai saida mak halo nia forsa, no ikusmai Sansão fó-hatene ba nia. Triste mak Sansão nia sala halo nia lakon ninia forsa no estraga ninia relasaun ho Jeová ba tempu balu.—Juís 16:​16-20.

14. Konsekuénsia saida mak Sansão hetan tanba fiar liu ba Dalila?

¹⁴ Sansão simu konsekuénsia neʼebé aat tebes tanba nia fiar liu Dalila duké Jeová. Ema Filístia kaer Sansão no losu sai ninia matan rua. Sira hatama nia ba komarka iha Gaza, neʼe mak fatin neʼebé uluk nia hamoe ema Filístia no agora nia halo serbisu atu dulas trigu iha komarka laran. Tuirmai ema Filístia hamoe nia iha sira-nia selebrasaun ida. Sira hasaʼe sakrifísiu ba maromak falsu Dagon tanba sira fiar katak maromak neʼe ajuda sira atu kaer Sansão. Sira lori Sansão husi komarka ba iha selebrasaun neʼe “atu bele goza nia”.—Juís 16:​21-25.

15. Oinsá mak Sansão hatudu katak nia tau fiar fali ba Jeová? (Juís 16:​28-30) (Haree dezeñu iha livru oin.)

¹⁵ Sansão halo sala neʼebé sériu, maibé nia la rende an atu serbí Jeová. Nia buka oportunidade atu kumpre ninia knaar husi Jeová hodi bele kontra ema Filístia. (Lee Juís 16:​28-30.) Sansão husu ba Jeová: “Husik haʼu selu fali ema Filístia.” Jeová hatán Sansão nia orasaun no fó fali forsa neʼebé espesiál ba nia. Rezultadu mak Sansão oho ema Filístia barak liu fali akontesimentu sira antes neʼe.

16. Saida mak ita bele aprende husi Sansão nia sala?

¹⁶ Maski Sansão hetan konsekuénsia neʼebé aat husi ninia sala, maibé nia kontinua hakaʼas an atu halo tuir Jeová nia hakarak. Se ita halo sala no hetan konsellu ka lakon knaar, keta rende an. Hanoin-hetan, Jeová prontu atu fó perdua ba ita. (Sal 103:​8-10) Maski ita halo sala, Jeová bele fó ita kbiit atu halo ninia hakarak, hanesan buat neʼebé nia halo ona ba Sansão.

17-18. Oinsá mak Michael nia esperiénsia hametin ita? (Haree mós foto.)

¹⁷ Hanoin toʼok ezemplu husi irmaun joven ida naran Michael. Nia okupadu atu halaʼo atividade espirituál, nia serbí nuʼudar atan ba kongregasaun no pioneiru regulár. Triste mak nia halo sala no lakon ninia knaar. Nia hatete: “Haʼu halo buat barak tebes atu serbí Jeová. Maibé derrepente deʼit haʼu sente hanesan la iha buat ida neʼebé haʼu bele halo ba Jeová. Haʼu fiar katak Jeová sei nunka husik hela haʼu, maibé haʼu duvida se haʼu-nia relasaun ho nia bele sai diʼak fali no haʼu bele simu fali knaar hanesan uluk ka lae.”

¹⁸ Michael la rende an. Nia hatete: “Haʼu fokus atu hadiʼa haʼu-nia relasaun ho Jeová hodi halo orasaun ba nia, estuda, no medita beibeik.” Ikusmai Michael simu fali knaar iha kongregasaun. Agora, nia serbí nuʼudar katuas kongregasaun no pioneiru regulár. Nia hatete: “Apoia no anima neʼebé haʼu simu, liuliu husi katuas sira, ajuda haʼu atu rekoñese katak Jeová nafatin hadomi haʼu. Haʼu bele serbí fali iha kongregasaun ho konxiénsia neʼebé moos. No haʼu hatene katak Jeová prontu atu fó perdua ba ema neʼebé arrepende an ho laran.” Ita bele fiar metin katak Jeová sei uza ita no haraik bensaun ba ita maski uluk ita halo sala, naran katak ita troka ita-nia hahalok no kontinua sadere ba nia.—Sal 86:5; Prov 28:13.

19. Oinsá mak Sansão nia ezemplu hametin ita?

¹⁹ Iha lisaun neʼe, ita koʼalia ona kona-ba akontesimentu balu iha Sansão nia moris. Nia la perfeitu, no maski uluk nia halo sala tanba fiar liu ba Dalila, maibé nia la rende an atu serbí Jeová. No Jeová kontinua uza Sansão iha dalan neʼebé kmanek. Jeová nafatin haree nia nuʼudar mane fiar-naʼin no ninia naran temi hamutuk ho fiar-naʼin sira seluk iha Ebreu kapítulu 11. Ita sente kmaan tanba hatene katak ita serbí Aman domin nian neʼebé hakarak atu hametin ita, liuliu bainhira ita sente fraku! Entaun hanesan Sansão, mai ita harohan ba Jeová: “Favór ida hanoin-hetan haʼu, no favór ida fó forsa mai haʼu.”—Juís 16:28.