Desizaun neʼebé ita hotu hasoru

Se Ita halo viajen ba fatin ruma neʼebé Ita nunka bá, saida mak Ita sei halo?

1. 1. Hili deʼit dalan neʼebé Ita hanoin mak loos.

2. 2. Laʼo tuir deʼit ema seluk no fiar katak sira sei hatene dalan.

3. 3. Buka matadalan neʼebé Ita bele tau fiar, porezemplu haree mapa ka husu belun neʼebé hatene dalan.

Se ita hili opsaun primeiru ka segundu, karik ita sei bá fali fatin seluk. Maibé se ita hili opsaun terseiru, ita bele fiar katak ita sei toʼo ba fatin neʼebé ita hakarak atu bá.

Ita-nia moris mak hanesan halo viajen, no ita espera katak neʼe sei lori ita ba futuru neʼebé kontente. Maibé atu bele toʼo neʼebá, ida-neʼe depende ba matadalan saida mak ita halo tuir bainhira ita foti desizaun.

Desizaun barak neʼebé ita halo ladún fó impaktu ba ita-nia moris, maibé iha duni desizaun balu neʼebé importante. Ita-nia desizaun kona-ba saida mak loos ka sala, neʼe sei hatudu sai ita-nia fiar no buat neʼebé ita hafolin. Desizaun sira-neʼe sei fó impaktu diʼak ka la diʼak ba ita-nia futuru no mós ba ema neʼebé ita hadomi. Desizaun sira-neʼe balu mak kona-ba:

• Relasaun seksuál no kaben

• Hahalok laran-moos, serbisu, no osan

• Oinsá atu haboot oan

• Hahalok neʼebé ita hatudu ba ema seluk

Oinsá Ita hatene katak desizaun sira neʼebé Ita halo kona-ba tópiku sira-neʼe sei lori kontente ba Ita no Ita-nia família?

Ita ida-idak presiza husu ba ita-nia an: Saida mak sei ajuda haʼu atu halo desizaun neʼebé diʼak?

Revista neʼe sei esplika tanbasá ita bele tau fiar ba Bíblia nia matadalan no oinsá neʼe bele ajuda ita.