Keta demora atu hetan batizmu

1. Saida mak razaun diʼak balu atu hetan batizmu?

ITA hadomi Jeová ka lae, Maromak neʼebé fó prezente diʼak hotu, inklui Ita-nia moris? Ita hakarak hatudu Ita-nia domin ba nia ka lae? Dalan diʼak liu atu halo nuneʼe mak hodi dedika Ita-nia an ba nia no hetan batizmu. Kuandu Ita halo nuneʼe, Ita sei sai parte ba Jeová nia família. Rezultadu mak Ita-nia Aman no Belun sei dirije no tau matan Ita tanba Ita mak ninian. (Sal 73:24; Isa 43:​1, 2) Dedikasaun no batizmu mós loke dalan ba Ita atu moris haksolok ba nafatin.—1 Ped 3:21.

2. Iha lisaun neʼe, ita sei aprende kona-ba saida?

² Iha buat ruma neʼebé hanetik Ita atu hetan batizmu ka lae? Se nuneʼe, Ita la mesak. Iha ema barak neʼebé uluk presiza halo mudansa ba sira-nia hanoin no hahalok atu bele hetan batizmu. Maibé agora sira serbí Jeová ho haksolok no laran-manas. Saida mak Ita bele aprende husi ema balu neʼebé hetan batizmu iha apóstolu sira-nia tempu? Iha lisaun neʼe, ita sei haree kona-ba susar balu neʼebé sira hasoru no aprende husi sira-nia ezemplu.

EMA SAMARIA HETAN BATIZMU

3. Karik ema Samaria balu presiza halo mudansa saida deʼit?

³ Ema Samaria mak grupu relijiaun ida iha Jesus nia tempu. Sira barak hela iha sidade Siquém no Samaria antigu neʼebé iha norte husi rai-Judeia. Antes ema Samaria hetan batizmu, sira presiza aumenta koñesimentu kona-ba Maromak nia Liafuan. Sira fiar deʼit ba livru primeiru lima husi Bíblia, neʼe mak Génesis toʼo Deuteronómio, no karik mós livru Josué. Maibé sira mós hein ba Mesias neʼebé atu mai hodi bazeia ba promesa iha Deuteronómio 18:​18, 19. (João 4:25) Atu hetan batizmu, sira presiza simu Jesus nuʼudar Mesias neʼebé promete nanis ona. No “ema Samaria barak” halo nuneʼe duni. (João 4:39) Liután neʼe, tanba ema Kristaun barak mak ema Judeu, karik ema Samaria balu presiza troka sira-nia hanoin atu la diskrimina ema Judeu.—Lc 9:​52-54.

4. Tuir Apóstolu 8:​5, 6, 14, bainhira Filipe haklaken, ema Samaria barak hatudu reasaun oinsá?

⁴ Saida mak ajuda ema Samaria atu hetan batizmu? Bainhira Filipe haklaken kona-ba “Kristu”, ema Samaria balu ‘simu Maromak nia liafuan’. (Lee Apóstolu 8:​5, 6, 14.) Filipe mak ema Judeu, maibé ema Samaria la dada an atu rona ba nia. Karik sira hanoin-hetan eskritura neʼebé hatete katak Maromak la todan ba sorin. (Deut 10:​17-19) Sira “simu buat neʼebé Filipe hatoʼo” kona-ba Kristu, no haree mós Filipe halo milagre barak hodi kura ema moras no duni sai anju aat. (Após 8:7) Tan neʼe, sira rekoñese evidénsia neʼebé hatudu katak Maromak mak haruka Filipe ba sira.

5. Ita bele aprende saida husi ema Samaria nia ezemplu?

⁵ Ema Samaria sira-neʼe bele deʼit la simu Filipe nia hanorin tanba nia mak ema Judeu ka tanba ninia hanorin mak buat foun. Maibé sira la halo nuneʼe. Sira la demora atu hetan batizmu bainhira sira fiar ona katak neʼe mak lia-loos. Bíblia konta: “Bainhira Filipe haklaken liafuan diʼak kona-ba Maromak nia Ukun no kona-ba Jesus Kristu nia naran, sira fiar nia, no mane no feto sira hetan batizmu.” (Após 8:12) Ita fiar ka lae katak Maromak nia Liafuan mak lia-loos, no Testemuña ba Jeová hatudu domin ba malu nuʼudar sinál ba ema Kristaun? (João 13:35) Se nuneʼe, keta dada an atu hetan batizmu. Fiar bá katak Jeová sei haraik bensaun ba Ita.

6. Ita bele aprende saida husi Ruben nia ezemplu?

⁶ Ruben husi Alemaña sai boot iha família Testemuña ba Jeová. Maibé nuʼudar nia sai joven, nia komesa duvida kona-ba Jeová iha ka lae. Oinsá mak nia manán ninia dúvida neʼe? Nia rekoñese katak nia ladún iha koñesimentu kona-ba lia-loos, tan neʼe nia deside atu aprende liután. Nia hatete: “Iha haʼu-nia estuda mesak, haʼu presiza fokus atu halakon haʼu-nia dúvida. Haʼu presiza estuda beibeik tópiku kona-ba teoria evolusaun.” Nia lee livru Apakah Ada Pencipta yang Mempedulikan Anda? Livru neʼe ajuda tebes nia atu hametin ninia fiar ba Maromak. Nia hatete ba nia an: ‘Wow! Jeová iha duni.’ No bainhira nia vizita sede-jerál, nia hafolin liután domin no unidade entre irmaun-irmán sira iha mundu tomak. Bainhira nia fila ba Alemaña, nia hetan batizmu ho tinan 17. Se Ita iha dúvida kona-ba buat neʼebé Ita aprende, importante atu halo peskiza husi ita-nia publikasaun sira. Se Ita hetan “koñesimentu neʼebé loos”, neʼe bele ajuda Ita atu halakon Ita-nia dúvida. (Éf 4:​13, 14) No kuandu Ita rona esperiénsia kona-ba unidade entre Jeová nia povu iha mundu tomak no haree evidénsia iha Ita-nia kongregasaun rasik, Ita-nia domin ba irmaun-irmán sira sei sai metin liután.

SAUL HUSI TARSU HETAN BATIZMU

7. Saul presiza halo mudansa saida deʼit?

⁷ Hanoin toʼok ezemplu kona-ba Saul husi Tarsu. Uluk nia hetan edukasaun boot kona-ba ema Judeu nia lei no iha posibilidade atu sai ema importante ida. (Gal 1:​13, 14; Flp 3:5) Iha tempu neʼebá, ema Judeu barak hanoin katak ema Kristaun mak apóstata, tan neʼe Saul fó-terus ba ema Kristaun sira. Nia hanoin sala katak nia halo tuir Maromak nia hakarak. (Após 8:3; 9:​1, 2; 26:​9-11) Se Saul tau fiar ba Jesus no hetan batizmu nuʼudar ema Kristaun, nia presiza prontu atu hetan terus husi kontradór sira.

8. (a) Saida mak ajuda Saul atu hetan batizmu? (b) Tuir Apóstolu 22:​12-16, oinsá mak Ananias ajuda Saul? (Haree mós dezeñu.)

⁸ Saida mak ajuda Saul atu hetan batizmu? Bainhira Jesus koʼalia ba Saul husi lalehan, naroman nabilan halo Saul nia matan aat. (Após 9:​3-9) Ba loron tolu, Saul halo jejún no hanoin kleʼan kona-ba buat neʼebé foin akontese. Saul fiar metin ona katak Jesus mak Mesias no Jesus nia dixípulu sira halaʼo relijiaun neʼebé loos. Karik Saul mós sente triste tebes tanba nia hola parte iha Estevão nia mate! (Após 22:20) Depois neʼe, dixípulu ida naran Ananias ho laran-diʼak hakbesik ba Saul, kura nia, no anima nia atu la demora hodi hetan batizmu. (Lee Apóstolu 22:​12-16.) Saul ho haraik an simu Ananias nia ajuda no hetan batizmu.—Após 9:​17, 18.

9. Ita bele aprende saida husi Saul nia ezemplu?

⁹ Ita bele aprende lisaun barak husi Saul. Nia la husik hahalok foti an ka taʼuk ba ema atu hapara nia hodi hetan batizmu. Saul ho haraik an halo mudansa iha ninia moris bainhira simu lia-loos kona-ba Kristu. (Após 26:​14, 19) Saul prontu sai ema Kristaun maski hatene katak ema sei fó-terus ba nia. (Após 9:​15, 16; 20:​22, 23) Depois hetan tiha batizmu, nia kontinua sadere ba Jeová nia ajuda atu tahan hasoru susar sira. (2 Kor 4:​7-10) Kuandu Ita hetan batizmu nuʼudar Testemuña ba Jeová, karik Ita sei hasoru situasaun neʼebé koko Ita-nia fiar ka hasoru susar, maibé fiar metin bá katak Maromak no Kristu sei sempre ajuda Ita atu kontinua laran-metin.—Flp 4:13.

10. Ita bele aprende saida husi Anna nia ezemplu?

¹⁰ Anna sai boot iha Europa Leste. Depois ninia amá hetan tiha batizmu, Anna husu lisensa ba ninia apá atu estuda Bíblia, no nia komesa estuda husi tinan 9. Maibé, ninia família neʼebé besik komesa kontra nia. Tuir sira-nia hanoin, Anna sei hamoe família se nia husik sira-nia beiʼala nia relijiaun. Bainhira Anna tinan 12, nia husu lisensa ba ninia apá atu hetan batizmu. Ninia apá hakarak hatene se neʼe mak ninia desizaun rasik ka ema seluk mak obriga nia. Tan neʼe Anna hatán: “Haʼu hadomi Jeová.” Ikusmai, ninia apá fó lisensa ba nia atu hetan batizmu. Depois hetan tiha batizmu, Anna nia família kontinua trata aat no goza nia. Ninia avó-mane hatete ba nia: “Diʼak liu ó fuma no moris la morál, duké ó sai Testemuña ba Jeová.” Oinsá mak Anna tahan situasaun neʼe? Nia hatete: “Jeová fó forsa mai haʼu. Haʼu-nia apá no amá apoia tebes haʼu.” Anna iha toman atu hakerek lista kona-ba oinsá Jeová ajuda ona nia, no nia haree beibeik lista neʼe atu fó-hanoin fali nia. Se Ita taʼuk kona-ba susar husi ema seluk, hanoin-hetan katak Jeová mós sei ajuda Ita.—Ebr 13:6.

CORNÉLIO HETAN BATIZMU

11. Cornélio nia situasaun mak oinsá?

¹¹ Ita mós bele aprende lisaun husi Cornélio nia ezemplu. Nia mak “senturiaun”, neʼe katak nia mak komandante ba tropa Roma naʼin-100. (Após 10:​1, nota) Tan neʼe, nia iha naran-boot iha komunidade no militár. Bíblia mós hatete katak nia “fó ajuda barak ba ema kiak sira”. (Após 10:2) Jeová haruka apóstolu Pedro atu fó sai liafuan diʼak ba nia. Cornélio nia pozisaun hanetik nia atu hetan batizmu ka lae?

12. Saida mak ajuda Cornélio atu hetan batizmu?

¹² Saida mak ajuda Cornélio atu hetan batizmu? Bíblia konta katak nia “hamtaʼuk Maromak no adora Maromak hamutuk ho ninia família tomak”. Nia harohan beibeik ba Maromak. (Após 10:2) Bainhira Pedro haklaken ba Cornélio, Cornélio no ninia família tomak simu Kristu no hetan kedas batizmu. (Após 10:​47, 48) Ita fiar katak Cornélio prontu halo mudansa naran deʼit atu bele serbí Jeová hamutuk ho ninia família.—Jos 24:15; Após 10:​24, 33.

13. Ita bele aprende saida husi Cornélio nia ezemplu?

¹³ Hanesan Saul, Cornélio bele deʼit husik ninia pozisaun hanetik nia atu sai ema Kristaun. Maibé nia la husik ida-neʼe akontese. Ita mós presiza halo mudansa boot iha Ita-nia moris atu bele hetan batizmu ka lae? Se nuneʼe, Jeová sei ajuda Ita. Se Ita hakaʼas an atu halo tuir Bíblia nia prinsípiu sira, Jeová sei haraik bensaun.

14. Ita bele aprende saida husi Tsuyoshi nia ezemplu?

¹⁴ Tsuyoshi husi Japaun presiza halo mudansa kona-ba ninia serbisu hodi bele hetan batizmu. Nia iha pozisaun númeru segundu iha eskola Ikenobo neʼebé famozu tebes kona-ba arranju ai-funan. Bainhira ninia xefe la konsege arranju ai-funan ba funerál, Tsuyoshi mak taka ninia fatin no hola parte iha Budista nia serimónia. Maibé, bainhira nia aprende lia-loos kona-ba ema mate nia kondisaun, nia rekoñese katak se nia kontinua hola parte iha serimónia sira-neʼe, nia sei labele hetan batizmu. Tan neʼe nia deside atu la hola parte tan. (2 Kor 6:​15, 16) Tsuyoshi fó sai ninia desizaun ba ninia xefe. Rezultadu mak saida? Xefe konkorda no Tsuyoshi nafatin bele kontinua serbisu. Depois estuda tiha Bíblia ba tinan ida, nia hetan batizmu.a Se Ita presiza halo mudansa ba Ita-nia serbisu atu bele halo Jeová kontente, fiar bá katak nia sei tau matan ba Ita no Ita-nia família nia presiza.—Sal 127:2; Mt 6:33.

EMA KORINTO HETAN BATIZMU

15. Tanbasá susar ba ema Korinto atu hetan batizmu?

¹⁵ Sidade Korinto antigu nakonu ho materializmu no hahalok la morál. Ema barak neʼebé hela iha neʼebá halo buat neʼebé Maromak la gosta. Tan neʼe, susar ba sira atu simu liafuan diʼak. Maibé, bainhira apóstolu Paulo haklaken kona-ba Kristu iha sidade neʼe, “ema Korinto barak neʼebé rona hahú sai fiar-naʼin no hetan batizmu”. (Após 18:​7-11) Tuirmai, Naʼi Jesus Kristu fó sai vizaun ba Paulo no hatete: “Ema barak iha sidade neʼe mak haʼu-nian.” Tan neʼe, Paulo kontinua haklaken iha neʼebá ba tinan ida ho balu.

16. Saida mak ajuda ema Korinto atu hetan batizmu? (2 Korinto 10:​4, 5)

¹⁶ Saida mak ajuda ema Korinto atu hetan batizmu? (Lee 2 Korinto 10:​4, 5.) Maromak nia Liafuan no espíritu santu mak ajuda sira atu halo mudansa boot iha sira-nia moris. (Ebr 4:12) Ema Korinto neʼebé simu liafuan diʼak kona-ba Kristu konsege husik sira-nia toman aat hanesan hemu lanu, naʼok, no omoseksuál.—1 Kor 6:​9-11.b

17. Ita bele aprende saida husi ema Korinto nia ezemplu?

¹⁷ Maski ema Korinto balu iha toman neʼebé aat no presiza halo mudansa boot, maibé sira la hanoin katak mudansa sira-neʼe mak susar demais. Sira hakaʼas an tebes atu laʼo tuir dalan kloot neʼebé lori ba moris rohan-laek. (Mt 7:​13, 14) Ita hakaʼas an hela halakon toman neʼebé la diʼak atu bele hetan batizmu? Keta rende an! Husu Jeová nia espíritu santu atu ajuda Ita manán hasoru Ita-nia hakarak neʼebé sala.

18. Ita bele aprende saida husi Monika nia ezemplu?

¹⁸ Monika husi rai-Jeórjia hakaʼas an atu la koʼalia liafuan foʼer no la rona ka haree buat neʼebé la diʼak tanba hakarak hetan batizmu. Nia hatete: “Bainhira joven, haʼu hetan forsa liuhusi orasaun. Jeová hatene katak haʼu hakarak halo buat neʼebé loos, no nia sempre ajuda no dirije haʼu.” Monika hetan batizmu kuandu tinan 16. Iha ka lae toman ruma neʼebé Ita presiza para atu Jeová bele simu Ita? Kontinua husu Jeová atu ajuda Ita. Jeová sei fó duni ninia espíritu santu ho laran-luak.—João 3:34.

ITA-NIA FIAR BELE MUDA FOHO

19. Saida mak bele ajuda Ita atu manán hasoru susar neʼebé boot? (Haree mós foto.)

¹⁹ Fiar metin bá katak Jeová hadomi Ita no hakarak Ita sai parte ba ninia família, maski hasoru susar naran deʼit neʼebé bele hanetik Ita atu hetan batizmu. Jesus hatete ba ninia dixípulu sira: “Se imi-nia fiar boot hanesan mostarda-musan, imi sei hatete ba foho neʼe: ‘Muda husi neʼe hodi bá fali neʼebá’, no foho neʼe sei muda, no la iha buat ida neʼebé imi labele halo.” (Mt 17:20) Ema neʼebé rona Jesus nia liafuan neʼe foin mak sai Jesus nia dixípulu, tan neʼe sira presiza kontinua haburas sira-nia fiar. Entaun Jesus hametin sira katak se sira iha fiar neʼebé metin, Jeová sei ajuda sira atu manán hasoru susar neʼebé boot hanesan foho. No Jeová mós sei ajuda Ita iha dalan neʼebé hanesan!

20. Oinsá mak ezemplu husi ema Kristaun iha apóstolu sira-nia tempu no tempu modernu bele motiva Ita?

²⁰ Se iha buat ruma neʼebé hanetik Ita atu hetan batizmu, keta demora atu halakon ida-neʼe. Hetan kmaan no forsa hodi medita kona-ba ezemplu husi ema Kristaun iha apóstolu sira-nia tempu no tempu modernu. Hein katak sira-nia ezemplu sei anima no motiva Ita atu dedika Ita-nia an ba Jeová no hetan batizmu. Neʼe mak desizaun diʼak liu hotu neʼebé Ita bele halo!