Haraik an hodi rekoñese katak iha buat barak neʼebé ita la hatene

1. Jeová fó ita abilidade saida deʼit, no tanbasá?

JEOVÁ kria ita ho abilidade atu hanoin, atu aprende buat foun, atu komprende ho didiʼak, no atu aplika buat neʼebé ita aprende. Tanbasá Jeová kria ita iha dalan hanesan neʼe? Nia hakarak ita atu “hetan koñesimentu kona-ba Maromak” no deside rasik atu serbí nia.—Prov 2:​1-5; Rom 12:1.

2. (a) Ita presiza rekoñese saida? (Job 37:​23, 24) (Haree mós dezeñu.) (b) Ita hetan benefísiu saida se ita rekoñese katak iha buat barak neʼebé ita la hatene?

² Jeová kria ita ho abilidade atu aprende, maibé iha mós buat barak neʼebé ita la hatene. (Lee Job 37:​23, 24.) Hanoin toʼok kona-ba Job. Jeová husu pergunta barak atu ajuda Job komprende katak iha buat barak neʼebé nia la hatene. Neʼe ajuda Job atu haraik an no hadiʼa ninia hanoin. (Job 42:​3-6) Ita mós sei hetan benefísiu se rekoñese katak iha buat barak neʼebé ita la hatene. Neʼe halo ita haraik an no tau fiar katak Jeová sei hatudu sai buat neʼebé ita presiza duni atu hatene hodi bele halo desizaun neʼebé matenek.—Prov 2:6.

3. Iha lisaun neʼe, ita sei koʼalia kona-ba saida?

³ Iha lisaun neʼe, ita sei koʼalia kona-ba buat balu neʼebé ita la hatene no tanbasá neʼe bele lori susar mai ita. Ita mós sei haree tanbasá diʼak atu la hatene buat sira-neʼe. Hodi koʼalia kona-ba pontu sira-neʼe sei hametin ita-nia fiar katak Jeová, “Maromak neʼebé hatene buat hotu”, sei fó-hatene ita saida mak ita presiza duni atu hatene.—Job 37:16.

ITA LA HATENE BAINHIRA MAK MUNDU NIA ROHAN SEI MAI

4. Tuir Mateus 24:​36, saida mak ita la hatene?

⁴ Lee Mateus 24:36. Ita la hatene bainhira mak mundu aat neʼe sei lakon. Kuandu iha rai, Jesus rasik mós la hatene kona-ba “loron no oras”.a Nia fó-hatene apóstolu sira katak “Aman deʼit mak iha direitu atu deside” kona-ba tempu no oras ba akontesimentu balu. (Após 1:​6, 7) Jeová deside ona tempu ba mundu nia rohan, maibé ita labele hatene ho loloos bainhira mak neʼe sei akontese.

5. Tanba la hatene bainhira mak mundu nia rohan, neʼe bele halo ita sente oinsá?

⁵ Tanba ita la hatene toʼo bainhira mak ita presiza hein ba mundu neʼe nia rohan, neʼe bele halo ita laran-kraik ka lakon pasiénsia, liuliu se ita hein ba tempu kleur ona. Ka karik ita sente susar atu tahan hasoru família ka ema seluk neʼebé goza ita. (2 Ped 3:​3, 4) Karik ita hanoin katak se ita hatene ho loloos bainhira mak mundu nia rohan sei mai, ita bele pasiénsia liután no fasil liu atu tahan hasoru ema neʼebé goza ita.

6. Tanbasá diʼak atu la hatene bainhira mak mundu nia rohan sei mai?

⁶ Tanba Jeová la fó-hatene ita bainhira mak mundu nia rohan sei mai, neʼe fó ita oportunidade atu hatudu katak ita serbí nia tanba domin no tau fiar ba nia. Ita hakarak serbí Jeová ba nafatin, laʼós deʼit toʼo mundu nia rohan. Ita lakohi tau prazu ba ita-nia fiar. Duké fokus ba bainhira mak “Jeová nia loron” sei mai, diʼak liu fokus ba buat diʼak neʼebé sei akontese depois loron neʼe. Neʼe sei ajuda ita atu hakbesik liután ba Jeová no halo buat hotu neʼebé ita bele atu halo nia kontente.—2 Ped 3:​11, 12.

7. Saida mak ita hatene?

⁷ Importante atu fokus ba buat neʼebé ita hatene. Ita hatene katak loron ikus sira hahú ona iha tinan 1914. Jeová fó sai ona profesia sira iha Bíblia neʼebé prova ida-neʼe. No Jeová mós fó-hatene ita mundu nia situasaun durante loron ikus sira. Tanba profesia sira-neʼe sai loos daudaun, neʼe halo ita fiar metin katak “Jeová nia loron boot besik ona”. (Sof 1:14) Ita mós hatene serbisu neʼebé Jeová hakarak ita atu halo, neʼe mak haklaken “liafuan diʼak kona-ba Maromak nia Ukun” ba ema barak liután. (Mt 24:14) Ita haklaken ona maizumenus iha rai 240 ho língua 1.000 liu. Sin, ita la presiza hatene kona-ba “loron no oras” atu bele haklaken ho laran-manas.

ITA LA HATENE SAIDA MAK JEOVÁ SEI HALO

8. Liafuan “Maromak loos nia serbisu” refere ba saida? (Eclesiastes 11:5)

⁸ Ita la hatene buat hotu kona-ba “Maromak loos nia serbisu”. (Lee Eclesiastes 11:5.) Liafuan neʼe refere ba buat neʼebé Jeová halo ka buat neʼebé Jeová husik atu akontese hodi bele kumpre ninia hakarak. Ita labele hatene ho loloos tanbasá Jeová husik buat ruma akontese, ka saida mak nia sei halo atu ajuda ita. (Sal 37:5) Ita “la hatene Maromak loos nia serbisu”, neʼe kompara hanesan ita la hatene oinsá bebé sai boot iha inan nia kabun. Neʼe mak prosesu neʼebé sientista sira deʼit mós seidauk komprende ho didiʼak.

9. Tanba la hatene oinsá Jeová ajuda ita, neʼe bele halo ita sente oinsá?

⁹ Tanba la hatene oinsá Jeová ajuda ita, neʼe bele halo ita dada an atu halo desizaun balu. Karik ita dada an atu halo sakrifísiu ruma hodi bele aumenta ita-nia serbisu ba Jeová, hanesan halo simples ita-nia moris ka muda ba fatin neʼebé presiza liután haklaken-naʼin. Ka karik ita mós hanoin katak Jeová la kontente ho ita se ita la konsege kumpre ita-nia planu espirituál, la hetan rezultadu diʼak iha serbisu haklaken, ka hasoru susar ruma kuandu halaʼo ita-nia knaar.

10. Tanba la hatene loloos saida mak Jeová sei halo, neʼe ajuda ita atu haburas hahalok importante saida?

¹⁰ Tanba ita la hatene loloos saida mak Jeová sei halo, neʼe bele ajuda ita atu haburas hahalok importante hanesan haraik an. Ita rekoñese katak Jeová nia hanoin no ninia dalan sira mak aas liu fali ita-nian. (Isa 55:​8, 9) Ita mós aprende oinsá atu tau fiar liután ba Jeová, no sadere ba nia atu hetan susesu. Bainhira ita hetan rezultadu diʼak iha serbisu haklaken ka projetu teokrátiku ruma, ita sei fó hahiʼi ba Jeová. (Sal 127:1; 1 Kor 3:7) Se buat ruma akontese la tuir ita-nia hakarak, ita presiza hanoin-hetan katak Jeová hatene buat hotu. (Isa 26:12) Ita halo ita-nia parte, no kontinua tau fiar katak Jeová sei halo ninia parte. Ita fiar metin katak Jeová sei dirije no tau matan ita, maski nia la halo ida-neʼe liuhusi milagre hanesan nia halo iha tempu uluk.—Após 16:​6-10.

11. Buat importante saida mak ita hatene?

¹¹ Ita hatene katak Jeová mak domin, justisa, no matenek. Ita hatene katak nia hafolin tebes buat neʼebé ita halo ba nia no ba irmaun-irmán sira. No ita hatene katak Jeová sempre fó kolen ba ema neʼebé laran-metin ba nia.—Ebr 11:6.

ITA LA HATENE SAIDA MAK SEI AKONTESE IHA LORON ABAN

12. Tuir Tiago 4:​13, 14, saida mak ita la hatene?

¹² Lee Tiago 4:​13, 14. Ita la hatene saida mak sei akontese ba ita iha loron aban. Iha mundu neʼe, ita bele deʼit hasoru “tempu susar no situasaun neʼebé mosu derrepente”. (Ecle 9:11) Rezultadu mak ita la hatene ita-nia planu sei susesu ka lae, ka ita sei moris atu kumpre ita-nia planu ka lae.

13. Tanba ita la hatene kona-ba futuru, oinsá neʼe bele afeta ita?

¹³ Tanba ita la hatene kona-ba futuru, karik neʼe halo susar mai ita. Oinsá? Karik ita hanoin barak kona-ba saida mak sei akontese, no neʼe bele halakon ita-nia ksolok. Kuandu ita-nia moris troka iha dalan neʼebé ita la espera, ka buat aat akontese derrepente deʼit, neʼe bele halo ita sente triste no estrese. No bainhira buat neʼebé ita espera la sai loos, ita bele sai laran-kraik no laran-kanek.—Prov 13:12.

14. Ita-nia kontente depende ba saida? (Haree mós dezeñu.)

¹⁴ Kuandu ita tahan susar oioin, ita bele prova katak ita serbí Jeová tanba domin, laʼós tanba buka diʼak ba ita-nia an. Istória iha Bíblia hatudu katak ita labele espera Jeová atu proteje ita husi susar hotu no nia la fó destinu ba ita-nia moris. Nia hatene katak ita-nia kontente la depende ba ita-nia koñesimentu kona-ba saida mak sei akontese iha futuru. Maibé, ita-nia kontente depende ba ita buka Jeová nia matadalan no halo tuir nia. (Jer 10:23) Hodi sadere ba Jeová bainhira halo desizaun, hanesan ho Tiago, ita bele dehan: “Se neʼe mak Jeová nia hakarak, ita sei moris no halo ida-neʼe ka ida neʼebá.”—Tgo 4:15.

15. Saida mak ita hatene kona-ba futuru?

¹⁵ Ita la hatene saida mak sei akontese iha loron ida-idak, maibé ita hatene Jeová nia promesa kona-ba moris ba nafatin, maski ita-nia esperansa mak iha lalehan ka iha rai. Ita hatene katak Jeová nunka bosok no la iha buat ida mak bele hanetik nia atu kumpre ninia promesa. (Tito 1:2) Jeová deʼit mak bele ‘fó-hatene nanis buat neʼebé sei mosu no fó sai buat sira neʼebé seidauk akontese’. Jeová nia liafuan hotu sai loos iha tempu uluk, no sei sai loos iha futuru. (Isa 46:10) Ita hatene katak la iha buat ida mak bele haketak ita husi Jeová nia domin. (Rom 8:​35-39) Nia sei fó ita matenek, kmaan, no kbiit neʼebé ita presiza atu tahan hasoru susar naran deʼit. Ita bele fiar duni katak Jeová sei ajuda no haraik bensaun mai ita.—Jer 17:​7, 8.

ITA LA KOMPRENDE OINSÁ JEOVÁ HATENE DIDIʼAK ITA

16. Saida mak Jeová hatene kona-ba ita, no neʼe halo ita sente oinsá? (Salmo 139:​1-6)

¹⁶ Lee Salmo 139:​1-6. Ita-nia Kriadór hatene buat hotu kona-ba ita. Nia hatene ita-nia hanoin, sentimentu, no motivu. Nia hatene saida mak ita hatete no hanoin iha laran, no mós buat hotu neʼebé ita halo no tanbasá ita halo ida-neʼe. Liurai David hatete katak Jeová sempre prontu no bele ajuda ita. Ita admira tebes tanba Maromak Kbiit Boot Liu Hotu iha universu, Kriadór ba lalehan no rai, hanoin tebes ita! David hatete: “Ita hatene didiʼak haʼu, no neʼe kmanek tebes. . . . Neʼe barak liu toʼo haʼu labele komprende.”—Sal 139:​6, nota.

17. Tanbasá dala ruma susar ba ita atu fiar katak Jeová hatene didiʼak ita?

¹⁷ Karik família nia situasaun, kultura, no ita-nia fiar uluk nian halo susar mai ita atu fiar katak Aman Jeová hadomi no hanoin ita. Ka karik sala neʼebé ita halo iha tempu uluk halo ita sente katak Jeová sei nunka simu ita no dook husi ita. David mós dala ruma sente hanesan neʼe. (Sal 38:​18, 21) Ka karik ema ida neʼebé koko makaʼas atu moris tuir Maromak nia matadalan bele hanoin: ‘Se Jeová komprende haʼu, tanbasá nia hakarak haʼu atu halakon haʼu-nia toman neʼebé susar tebes atu halakon?’

18. Tanba Jeová hatene ita ho didiʼak, oinsá neʼe lori benefísiu mai ita? (Haree mós dezeñu.)

¹⁸ Ita bele aprende atu fiar katak Jeová hatene ita diʼak liu fali ita rasik, no nia bele haree buat diʼak iha ita-nia laran neʼebé ita rasik la haree. Nia haree ita-nia fraku sira, maibé nia mós komprende katak ita hakarak halo buat neʼebé loos no nia hadomi ita. (Rom 7:15) Bainhira ita rekoñese katak Jeová sempre haree buat diʼak iha ita-nia laran no buat furak neʼebé ita bele halo iha futuru, neʼe sei fó ita forsa atu serbí nia ho laran-metin no kontente.

19. Saida mak ita hatene kona-ba Jeová?

¹⁹ Ita hatene katak Jeová mak domin. Ita la duvida kona-ba neʼe. (1 João 4:8) Ita hatene katak Jeová fó mandamentu mai ita tanba nia hadomi ita no hakarak ita atu iha moris neʼebé diʼak. Ita hatene katak Jeová hakarak ita atu moris ba nafatin. Nia fó ona Jesus nia sakrifísiu atu ita bele hetan ida-neʼe. Jesus nia sakrifísiu halo ita fiar metin katak maski ita sala-naʼin, ita bele serbí Jeová hodi tuir Ninia hakarak. (Rom 7:​24, 25) No ita hatene katak “Maromak mak boot liu fali ita-nia laran no hatene buat hotu”. (1 João 3:​19, 20) Jeová hatene buat hotu kona-ba ita no nia fiar katak ita bele halo tuir ninia hakarak ho susesu.

20. Saida mak bele ajuda ita atu la hanoin barak kona-ba buat neʼebé ita la hatene?

²⁰ Jeová fó-hatene ita buat hotu neʼebé ita presiza duni atu hatene. Bainhira ita haraik an hodi rekoñese ida-neʼe, ita sei la hanoin barak kona-ba buat neʼebé ita la hatene no bele fokus ba buat neʼebé importante liu. Hodi halo nuneʼe hatudu katak ita tau fiar tomak ba Jeová, “Maromak neʼebé hatene buat hotu-hotu”. (Job 36:4) Maski agora ita la komprende buat balu, Ita hein atu kontinua simu hanorin husi Aman Jeová no aprende buat foun kona-ba nia ba nafatin.—Ecle 3:11.