LISAUN ESTUDU 34
KNANANUK 3 Ami-nia forsa no esperansa
Fiar bá katak Jeová perdua Ita
“Ita fó perdua ona ba haʼu-nia sala sira.”—SAL 32:5.
OBJETIVU
Aprende tanbasá ita presiza fiar katak Jeová perdua ita no oinsá Bíblia ajuda ita atu fiar metin katak Jeová perdua ema neʼebé arrepende an.
1-2. Bainhira ita rekoñese katak Jeová perdua ita, neʼe halo ita sente oinsá? (Haree mós dezeñu.)
LIURAI David sente laran-susar tebes kona-ba sala sériu neʼebé nia halo ona. (Sal 40:12; 51:3; introdusaun) Maibé nia arrepende an ho laran, no Jeová perdua nia. (2 Sam 12:13) Rezultadu mak David sente kontente tanba rekoñese katak Jeová perdua ona nia.—Sal 32:1.
2 Ita mós bele sente kontente bainhira simu Jeová nia laran-sadiʼa. Maski ita halo ona sala sériu, ita sente kmaan tanba hatene katak Jeová prontu atu perdua ita se ita arrepende an ho laran, fó sai ita-nia sala, no hakaʼas an atu la repete tan sala neʼe! (Prov 28:13; Após 26:20; 1 João 1:9) No ita sente kontente tebes tanba Jeová sei la hanoin tan sala neʼebé nia perdua ona!—Eze 33:16.
Liurai David halo knananuk barak neʼebé fó sai kona-ba Jeová nia perdua (Haree parágrafu 1-2)
3-4. Saida mak Jennifer sente depois hetan tiha batizmu, no iha lisaun neʼe, ita sei buka-hatene kona-ba saida?
3 Maibé, dala ruma ita sente susar atu fiar katak Jeová perdua duni ita. Hanoin toʼok kona-ba irmán ida naran Jennifer neʼebé boot iha lia-loos. Bainhira joven, nia halo hahalok neʼebé la diʼak no moris ho oin rua. Tinan barak liu tiha, nia fila fali ba Jeová, dedika an no hetan batizmu. Nia hatete: “Uluk haʼu halo sala seksuál, hemu lanu, hirusdór, no fokus deʼit atu buka rikusoin. Iha haʼu-nia neon, haʼu hatene katak Jeová perdua ona haʼu liuhusi Jesus nia sakrifísiu. Maibé iha haʼu-nia laran, haʼu duvida se Jeová perdua duni haʼu ka lae.”
4 Karik dala ruma Ita sente katak Jeová nafatin hirus kona-ba sala neʼebé uluk Ita halo. Maibé, Jeová hakarak ita sente kmaan no seguru tanba ninia laran-sadiʼa, hanesan David sente. Iha lisaun neʼe, ita sei buka-hatene tanbasá ita presiza fiar katak Jeová perdua duni ita no saida mak bele ajuda ita atu fiar ida-neʼe.
TANBASÁ ITA PRESIZA FIAR KATAK JEOVÁ PERDUA DUNI ITA?
5. Satanás hakarak ita fiar kona-ba saida? Fó toʼok ezemplu.
5 Hodi fiar katak Jeová perdua duni ita, ita bele kontra hasoru Satanás nia lasu ida. Hanoin-hetan katak Satanás sei halo buat naran deʼit atu hapara ita serbí Jeová. Atu kumpre ida-neʼe, Satanás koko halo ita fiar katak Jeová sei nunka perdua sala neʼebé ita halo ona. Hanoin toʼok kona-ba mane ida iha Korinto neʼebé kongregasaun hasai tanba halo sala seksuál. (1 Kor 5:1, 5, 13) Ikusmai nia arrepende an, maibé Satanás hakarak ema iha kongregasaun atu la fó perdua no la simu fali nia. Iha tempu hanesan, Satanás mós hakarak mane neʼe sente katak Jeová sei nunka perdua nia, hodi nuneʼe nia sei “mout tanba triste demais” toʼo para atu serbí Jeová. Neʼe mak dalan neʼebé Satanás uza toʼo ohin loron. Maibé “ita hatene ninia lasu sira”.—2 Kor 2:5-11.
6. Bainhira ita halo sala no sente la diʼak, oinsá mak ita bele sente kmaan?
6 Hodi fiar katak Jeová perdua duni ita, ita bele sente kmaan. Baibain ita sente la diʼak kona-ba sala neʼebé ita halo ona. (Sal 51:17) No neʼe diʼak tanba ita-nia konxiénsia bele book ita atu hadiʼa ita-nia hahalok. (2 Kor 7:10, 11) Maibé, se ita nafatin sente la diʼak maski arrepende an ona, neʼe bele halo ita rende an. Bainhira ita fiar katak Jeová perdua duni ita, ita sei la fó-sala tan ba ita-nia an. Tuirmai, ita bele serbí Jeová ho konxiénsia neʼebé moos no haksolok. Neʼe mak buat neʼebé Jeová hakarak. (Kol 1:10, 11; 2 Tim 1:3) Maibé, oinsá mak ita bele fiar katak Jeová perdua duni ita?
SAIDA MAK AJUDA ITA ATU FIAR KATAK JEOVÁ PERDUA DUNI ITA?
7-8. Jeová hatete saida kona-ba ninia an, no ita bele fiar saida? (Éxodo 34:6, 7)
7 Hanoin didiʼak saida mak Jeová hatete kona-ba ninia an. Hanoin toʼok Jeová nia liafuan ba Moisés iha Foho Sinai.a (Lee Éxodo 34:6, 7.) Maski Jeová iha hahalok furak barak, maibé nia temi uluk katak nia mak “Maromak neʼebé laran-sadiʼa no laran-diʼak”. Entaun, bainhira ninia atan ida halo sala no arrepende an, Jeová sei fó perdua ba nia ka lae? Jeová sei perdua duni! Se Jeová la fó perdua, neʼe katak nia la laran-sadiʼa no la laran-luak.
8 Jeová nunka bosok kona-ba ninia an, tanba nia mak Maromak lia-loos nian. (Sal 31:5) Tan neʼe, ita bele tau fiar ba ninia liafuan. Se Ita nafatin hanoin barak kona-ba sala uluk nian, husu Ita-nia an: ‘Haʼu fiar ka lae katak Jeová mak laran-sadiʼa no laran-diʼak no sempre fó perdua ba ema naran deʼit neʼebé arrepende an? Se nuneʼe, haʼu mós fiar ka lae katak nia perdua duni haʼu?’
9. Salmo 32:5 hanorin saida kona-ba dalan neʼebé Jeová fó perdua?
9 Hanoin kleʼan kona-ba eskritura sira neʼebé esplika oinsá Jeová fó perdua. Porezemplu, haree toʼok oinsá Jeová dirije David atu fó sai kona-ba Ninia perdua. (Lee Salmo 32:5.) David hatete: “Ita fó perdua ona ba haʼu-nia sala sira.” Liafuan Ebraiku neʼebé tradús nuʼudar “fó perdua” iha versu neʼe bele signifika “hiʼit sai”, ka “lori dook”. Bainhira Jeová perdua David, neʼe hanesan Jeová hiʼit sai ninia naha todan no lori dook tiha. Neʼe halo David sente kmaan tanba nia la lori tan todan neʼe. (Sal 32:2-4) Nuneʼe mós ho ita, bainhira ita arrepende an ho laran, ita la presiza kontinua lori todan husi ita-nia sala tanba Jeová hiʼit sai no lori dook tiha husi ita.
10-11. Liafuan “prontu atu fó perdua” hanorin saida kona-ba Jeová? (Salmo 86:5)
10 Lee Salmo 86:5. David hakerek katak Jeová “prontu atu fó perdua”. Neʼe katak Jeová la hirus lalais no nia sempre hakarak atu fó perdua ba ema neʼebé arrepende an. Tanbasá? Parte tuirmai husi versu neʼe esplika: “Ita nakonu ho domin neʼebé laran-metin ba ema hotu neʼebé bolu Ita.” Iha lisaun antes neʼe, ita aprende katak Jeová hatudu domin neʼebé laran-metin ba ema neʼebé hadomi nia. Domin neʼe book nia atu “fó perdua ho laran-luak” ba ema hotu neʼebé arrepende an. (Isa 55:7) Se Ita sente susar atu fiar katak Jeová perdua duni Ita, husu Ita-nia an: ‘Haʼu fiar ka lae katak Jeová prontu fó perdua ba ema hotu neʼebé arrepende an no husu ninia laran-sadiʼa? Se nuneʼe, haʼu mós fiar ka lae katak nia perdua ona haʼu kuandu haʼu husu ninia laran-sadiʼa?’
11 Ita sente kmaan tanba hatene katak Jeová komprende didiʼak ita mak ema sala-naʼin. (Sal 139:1, 2) Mai ita haree David nia liafuan seluk tan husi livru Salmo neʼebé ajuda ita fiar katak Jeová perdua duni ita.
JEOVÁ HANOIN-HETAN SAIDA KONA-BA ITA?
12-13. Tuir Salmo 103:14, Jeová hanoin-hetan saida, no neʼe book nia atu halo saida?
12 Lee Salmo 103:14. David hatete: ‘Jeová hanoin-hetan katak ita mak rai-rahun deʼit.’ David esplika razaun ida tanbasá Jeová prontu atu fó perdua ba ninia atan sira neʼebé arrepende an. Nia hatene katak ita la perfeitu. Atu komprende ida-neʼe, mai ita aprende liután kona-ba David nia liafuan sira.
13 David hatete katak Jeová “hatene ho didiʼak nia kria ita husi saida”. Nia kria Adão “husi rai-rahun” no hatene katak ema perfeitu mós iha limitasaun. Porezemplu, ema presiza han, toba, no dada iis. (Gén 2:7) Maibé bainhira Adão no Eva halo sala, ema nia limitasaun aumenta. Tanba ita mak sira-nia bei-oan, ita moris mai nuʼudar sala-naʼin no tenke luta hasoru hakarak neʼebé sala. Jeová laʼós deʼit hatene katak ita mak sala-naʼin, maibé nia mós “hanoin-hetan” ida-neʼe. Tan neʼe, Jeová komprende katak dala ruma ita monu ba sala. No kuandu ita arrepende an ho laran, nia hakarak hatudu laran-sadiʼa no fó perdua.—Sal 78:38, 39.
14. (a) Saida tan mak David hatete kona-ba dalan neʼebé Jeová fó perdua? (Salmo 103:12) (b) Saida mak ita aprende husi dalan neʼebé Jeová fó perdua ba David? (Haree kaixa “Jeová perdua no la hanoin-hetan tan”.)
14 Saida tan mak ita bele aprende kona-ba dalan neʼebé Jeová fó perdua? (Lee Salmo 103:12.) David hatete katak bainhira Jeová fó perdua, Nia tau ita-nia sala sira dook loos “hanesan lorosaʼe dook husi loromonu”. Loro-matan saʼe mak dook tebes husi loro-matan monu; parte rua neʼe nunka bele hasoru malu. Neʼe hanorin saida mai ita? Livru ida neʼebé esplika kona-ba eskritura neʼe hatete katak Maromak lori ita-nia sala dook tebes husi ita, neʼe hanesan sala nia iis deʼit mós lakon totál no ema labele horon tan. Tan neʼe, bainhira Jeová fó perdua, nia sei la hanoin-hetan tan, ka fó-hanoin fali ita, ka kastigu ita kona-ba sala neʼe.—Eze 18:21, 22; Após 3:19.
15. Se ita kontinua sente la diʼak kona-ba sala neʼebé uluk ita halo, ita presiza hanoin kona-ba saida?
15 Oinsá mak David nia liafuan iha Salmo 103 ajuda ita fiar katak Jeová perdua duni ita? Se Ita kontinua sente la diʼak kona-ba sala neʼebé uluk Ita halo, hanoin kona-ba Jeová nia sentimentu ba Ita. Nia hanoin-hetan katak Ita mak sala-naʼin. No Jeová perdua ema hotu neʼebé arrepende sala, inklui Ita. No kuandu Jeová perdua ona Ita, neʼe katak nia deside atu la hanoin-hetan tan, ka fó-hanoin fali Ita, ka fó kastigu Ita kona-ba sala neʼe. Jeová la fokus ba sala neʼebé Ita halo ona, tan neʼe Ita mós lakohi hanoin demais kona-ba neʼe. (Sal 130:3) Bainhira ita fiar katak Jeová perdua duni ita, ita mós sei la fó-sala tan ba ita-nia an no kontinua serbí Jeová ho haksolok.
16. Se ita hanoin beibeik kona-ba sala neʼebé uluk ita halo, neʼe lori perigu saida? Fó toʼok ezemplu. (Haree mós dezeñu.)
16 Hanoin toʼok ezemplu tuirmai. Se ita hanoin beibeik kona-ba sala neʼebé uluk ita halo, neʼe hanesan ita lori karreta maibé kontinua hateke ba espellu atu haree ba kotuk. Dala ruma diʼak atu haree ba kotuk, tanba bele ajuda ita matan-moris kona-ba perigu husi kotuk. Maibé atu bele bá oin ho seguru, ita tenke fokus ba oin. Nuneʼe mós, dala ruma diʼak atu hanoin fali sala neʼebé uluk ita halo, tanba ita bele aprende husi ida-neʼe no deside metin atu la halo tan sala neʼebé hanesan. Maibé, se ita kontinua fokus ba sala uluk nian, ita sei lakon ita-nia ksolok no karik labele serbí Jeová iha dalan neʼebé diʼak liután. Tan neʼe, mai ita kontinua fokus ba oin. Ita laʼo daudaun iha dalan neʼebé lori ita ba mundu foun, no iha neʼebá ita “sei la hanoin tan” memória neʼebé aat.—Isa 65:17; Prov 4:25.
Ema neʼebé lori karreta presiza fokus ba oin duké hateke beibeik ba espellu atu haree ba kotuk. Nuneʼe mós, ita presiza fokus ba bensaun sira iha futuru duké ba sala neʼebé uluk ita halo (Haree parágrafu 16)
KONTINUA HAMETIN ITA-NIA LARAN
17. Tanbasá ita presiza hametin ita-nia laran atu fiar katak Jeová hadomi ita no perdua ita?
17 Ita presiza hametin ita-nia laran atu fiar katak Jeová hadomi no perdua ita. (1 João 3:19) Tanbasá? Tanba Satanás kontinua koko atu halo ita sente katak Jeová la hadomi ita no nunka perdua ita. Neʼe mak dalan neʼebé Satanás uza atu hapara ita serbí Jeová. Satanás sei koko makaʼas liután atu halo ida-neʼe, tanba nia hatene katak ninia tempu hela uitoan deʼit ona. (Apok 12:12) Ita labele husik nia manán!
18. Saida mak Ita bele halo atu hametin Ita-nia fiar ba Jeová nia domin no ninia perdua?
18 Atu hametin Ita-nia fiar ba Jeová nia domin, halo tuir sujestaun sira iha lisaun antes neʼe. Atu hametin Ita-nia fiar katak Jeová perdua duni Ita, hanoin kona-ba saida mak Jeová hatete kona-ba ninia an. Hanoin kleʼan kona-ba eskritura sira neʼebé esplika oinsá Jeová fó perdua. Keta haluha katak Jeová hatene Ita mak ema sala-naʼin no nia sei hatudu laran-sadiʼa ba Ita. No hanoin-hetan katak bainhira Jeová fó perdua, nia halo ida-neʼe iha dalan neʼebé kompletu. Tuirmai, hanesan David, Ita mós bele tau fiar ba Jeová nia laran-sadiʼa no hatete: “Obrigadu Jeová, tanba Ita perdua ona ‘haʼu-nia sala sira’!”—Sal 32:5.
KNANANUK 1 Jeová nia hahalok
a Haree informasaun “Mendekatlah kepada Allah—Ketika Yehuwa Memperkenalkan Diri-Nya” iha Menara Pengawal 1 Maiu 2009.