Sé mak Maria Madalena?
Bíblia nia resposta
Maria Madalena mak Jesus Kristu nia dixípulu ida neʼebé laran-metin. Ninia naran, Madalena, karik refere ba sidade Magdala (ka karik Magadan), neʼebé besik Tasi Galileia. Karik Maria Madalena uluk hela iha neʼebá.
Maria Madalena, no feto sira seluk fó apoiu ba Jesus no ninia dixípulu bainhira sira halo viajen. (Lucas 8:1-3) Nia haree ho matan rasik bainhira ema oho Jesus, no nia mós haree Jesus bainhira Jesus foin moris-hiʼas fali.—Marcos 15:40; João 20:11-18.
Maria Madalena mak feto-aat ida ka lae?
Bíblia la dehan katak Maria Madalena mak feto-aat ida. Kona-ba ninia moris, Bíblia fó sai deʼit katak Jesus duni sai anju aat hitu husi nia.—Lucas 8:2.
Tanbasá mak ema barak fiar katak nia mak feto-aat ida antes nia sai Jesus nia dixípulu? Bíblia temi kona-ba feto ida, karik feto-aat, neʼebé hamoos Jesus nia ain ho ninia matan-been no hamaran ho ninia fuuk. Tinan atus ba atus depois Maria Madalena mate tiha, ema komesa hatete katak nia mak feto ida-neʼe. (Lucas 7:36-38) Maibé, la iha eskritura iha Bíblia neʼebé fó razaun mai ita atu fiar ida-neʼe.
Maria Madalena mak “apóstolu ida husi apóstolu sira” ka lae?
Lae. Igreja Katólika hanaran Maria “Santa Maria Madalena” no mós “apóstolu ida husi apóstolu sira” tanba nia mak ema ida husi ema primeiru sira neʼebé lori mensajen ba apóstolu sira kona-ba Jesus nia moris-hiʼas. (João 20:18) Maibé neʼe la dehan katak nia mak apóstolu ida. No mós, Bíblia la dehan katak nia mak apóstolu ida.—Lucas 6:12-16.
Bíblia halo kompletu maizumenus besik tinan 100 Era Comum. Maibé liutiha tinan 500 liu mak ulun-naʼin iha igreja deside rasik atu foti Maria Madalena nuʼudar santa ida. Iha livru antigu balu neʼebé laʼós parte ba Bíblia, hatete katak Jesus nia apóstolu balu sai laran-moras ba Maria. Istória sira neʼe mak inventa deʼit no laʼós parte husi Bíblia.
Maria Madalena mak Jesus nia feen ka lae?
Lae. Bíblia esplika ho klaru katak Jesus nafatin klosan.a
a Haree informasaun “Jesus kaben ka lae? Jesus iha alin sira ka lae?”