Nia hakfodak tebes ho rezultadu neʼebé nia hetan

Inan ida neʼebé haboot oan mesak naran Desicar hakarak halo buat barak liután iha serbisu haklaken hodi sai pioneiru regulár. Nia hela iha Venezuela, rai neʼebé iha problema ekonomia barak. Maibe, nia deside metin ona atu komesa pioneiru, no nia kumpre duni planu neʼe. Nia kontente atu halo knaar neʼe maibé lakleur pandemia COVID-19 komesa.

Bainhira pandemia COVID-19 komesa, susar ba Desicar atu haklaken tuir dalan foun hanesan hakerek karta. No susar ba nia mós atu uza vídeo konferénsia bainhira haklaken tanba internet karun tebes iha ninia área. Nia hatete: “Haʼu sai laran-tun. Derrepente deʼit haʼu labele haklaken ona hanesan uluk. Haʼu sente haʼu laʼós pioneiru neʼebé diak.”

Tuirmai, iha Janeiru 2021, sukursál husi Testemuña ba Jeová iha Venezuela aprova atu halao kampaña espesiál. Irmaun sira arranja atu durante semana lima iha fulan neʼe nia laran, estasaun rádiu maizumenus 60 no programa televizaun 7 fó sai diskursu públiku kona-ba Bíblia neʼebé irmaun sira hili ona. Testemuña sira hetan anima atu konvida ema seluk atu haree no rona ba diskursu sira-neʼe. Sukursál mós prepara pergunta no eskritura neʼebé liga ho diskursu ida-idak, hodi irmaun-irmán sira bele uza bainhira haklaken liuhusi karta no telefone. No mós, sukursál anima haklaken-naʼin sira atu haklaken hodi haruka mensajen liuhusi telemovel. Ba Testemuña barak iha Venezuela, neʼe mak dalan foun atu haklaken.

Desicar laran-manas atu hola parte iha kampaña neʼe. Maski nia nunka uza mensajen atu haklaken, nia deside atu koko halo ida-neʼe. Maibé, nia presiza ajuda. Desicar hatete: “Haʼu la matenek kona-ba teknolojia.” Entaun, nia husu ninia oan-feto atu hanorin nia. Lakleur deʼit, Desicar prontu atu hola parte iha kapmaña espesiál neʼe.

Hodi haruka mensajen liuhusi telefone, Desicar konvida ninia kolega barak atu rona diskursu sira. Nia hakfodak tebes ho rezultadu neʼebé nia hetan. Ema barak neʼebé nia konvida rona ba diskursu sira no husu pergunta. Sira balu la konsege rona ba diskursu, maibé sira husu Desicar atu esplika kona-ba diskursu sira-neʼe. Desicar hatete: “Haʼu halo nota ba diskursu sira, no haʼu hili pontu balu neʼebé haʼu bele fahe ba sira. Baibain, haʼu-nia relatóriu kona-ba vizita fali nunka liu lima, maibé iha kampaña nia rohan, haʼu halo vizita fali 112!”a

Desicar mós konvida ninia biin neʼebé laʼós Testemuña, neʼebé hela iha ninia uma sorin atu rona ba diskursu sira iha rádiu. Desicar hatete: “Haʼu hakfodak tanba haʼu-nia biin hakarak. Domingu-domingu, tuku 8 dadeer, haʼu ba biin nia apartamentu no ami rona diskursu hamutuk. Nia husu pergunta barak durante no depois diskursu remata.” Desicar nia biin mós asiste Memoriál ba Jesus nia mate liuhusi vídeo konferénsia, no nia fó lisensa ba Desicar atu uza ninia internet atu haklaken.

Desicar hatete: “Haʼu agradese tebes ba Jeová. Haʼu mós agradese tebes ba Katuas sira iha haʼu-nia kongregasaun tanba sempre enkoraja haʼu. Sira ajuda haʼu atu hetan fali ksolok iha serbisu haklaken.” (Jeremias 15:16) Desicar kontinua pioneiru no nafatin hanorin sira neʼebé hatudu interese bainhira nia haklaken liuhusi mensajen.