PERGUNTA HUSI JOVEN SIRA

Haʼu presiza hetan batizmu ka lae?—Parte 1: Batizmu nia signifikadu

Tinan-tinan joven barak neʼebé sai boot ho inan-aman neʼebé Testemuña ba Jeová, hetan ona batizmu. Ita mós hanoin hela atu hetan batizmu ka lae? Se nuneʼe, importante ba Ita atu komprende uluk signifikadu neʼebé loos husi batizmu no dedikasaun.

Batizmu katak sá?

Tuir Bíblia, batizmu katak hatama ema ida nia isin-lolon tomak ba bee laran, laʼós deʼit hisik bee. No batizmu reprezenta buat neʼebé importante tebes.

Bainhira Ita-nia isin tama ba bee laran, Ita hatudu sai katak Ita sei la moris tan tuir deʼit Ita rasik nia hakarak.
Bainhira Ita-nia isin saʼe husi bee laran, Ita hatudu katak husi momentu neʼe, Ita sei uza Ita-nia moris atu halo Maromak kontente.

Bainhira Ita hetan batizmu, Ita hatudu sai iha ema barak nia oin katak Ita rekoñese katak Jeová mak iha direitu atu deside kona-ba saida mak loos no sala. Ita mós hatudu sai katak Ita promete ona atu sempre halo tuir Maromak nia hakarak.

Hanoin toʼok: Tuir loloos, tanbasá mak Ita hakarak atu hetan batizmu? Haree 1 João 4:19 no Apokalipse 4:11.

Dedikasaun katak sá?

Antes Ita hetan batizmu, Ita presiza dedika Ita-nia moris ba Jeová. Oinsá atu halo ida-neʼe?

Halo orasaun mesamesak no promete ba Jeová katak Ita sei serbí nia ba nafatin no katak Ita prontu atu halo tuir ninia hakarak iha situasaun hotu no la depende ba ema seluk nia desizaun.

Kuandu Ita hetan batizmu, Ita hatudu sai iha ema barak nia oin katak Ita halo ona dedikasaun privadu ba Jeová. Ema seluk mós bele haree katak Ita la moris ona ba Ita-nia an rasik, maibé Ita moris ba Jeová.—Mateus 16:24.

Hanoin toʼok: Tanbasá mak Ita-nia moris sei sai diʼak liu kuandu Ita moris ba Jeová? Haree Isaias 48:17, 18 no Ebreu 11:6.

Tanbasá importante atu hetan batizmu?

Jesus haruka ninia dixípulu sira atu hetan batizmu. (Mateus 28:19, 20) Tan neʼe, toʼo ohin loron ema Kristaun mós tenke hetan batizmu. Tuir loloos, Bíblia hatete katak batizmu mak importante atu bele hetan salvasaun.—1 Pedro 3:21.

Maski nuneʼe, razaun importante liu atu Ita hetan batizmu mak tanba Ita hadomi Jeová no hafolin Ita-nia relasaun diʼak ho nia. Ita hakarak atu iha hanoin neʼebé hanesan ho ema neʼebé hakerek salmo tuirmai neʼe: “Saida mak haʼu sei fó hodi selu fali Jeová tanba buat diʼak hotu neʼebé nia halo ona ba haʼu? . . . Haʼu sei bolu Jeová nia naran. Haʼu sei kumpre haʼu-nia juramentu ba Jeová.”—Salmo 116:12-14.

Hanoin toʼok: Saida deʼit mak Jeová halo ona ba Ita, no oinsá mak Ita bele selu fali ida-neʼe? Haree Deuteronómio 10:12, 13 no Roma 12:1.

Hanoin neʼebé sala no hanoin neʼebé loos

HANOIN NEʼEBÉ SALA — Ema adultu no maduru deʼit mak bele hetan batizmu.

HANOIN NEʼEBÉ LOOS — Idade labele determina ema ida mak maduru ka lae, maibé buat neʼebé halo nia maduru mak ninia domin ba Jeová no se nia prontu ka lae atu halo tuir Jeová. Uluk, bainhira José, Samuel no Josias sei joven, sira hatudu liuhusi sira-nia hahalok no liafuan katak sira mak ema maduru. Ohin loron, joven barak mós halo buat neʼebé hanesan.

Bíblia hatete: “Ema bele hatene se labarik ida iha hahalok loos no moos liuhusi ninia hahalok.”—Provérbios 20:11.

HANOIN NEʼEBÉ SALA — Ita tenke hetan batizmu tanba ita-nia kolega sira batizmu ona.

HANOIN NEʼEBÉ LOOS — Ema ida-idak tenke halo desizaun rasik kona-ba dedikasaun no batizmu. Ita hetan batizmu tanba Ita-nia hakarak rasik laʼós tanba hakarak hatudu ba ema katak Ita boot ona, laʼós tanba Ita-nia kolega sira seluk batizmu ona ka tanba hakarak halo ema seluk kontente.

Bíblia hatete: “[Maromak] nia povu sei fó sira-nia an ho hakarak rasik.”—Salmo 110:3.

HANOIN NEʼEBÉ SALA — Se Ita seidauk hetan batizmu, neʼe katak Ita livre atu halo buat oioin tuir Ita-nia hakarak.

HANOIN NEʼEBÉ LOOS — Ita presiza hatán ba Jeová kona-ba ita-nia hahalok sira hahú husi tempu neʼebé Ita foin aprende kona-ba saida mak loos no sala tuir ninia haree, laʼós husi tempu neʼebé Ita hetan batizmu.

Bíblia hatete: “Se ema ida hatene oinsá atu halo buat neʼebé loos maibé la halo, nia halo ona sala.”—Tiago 4:17.

SUJESTAUN: Se Ita hanoin katak dedika an no hetan batizmu nuʼudar ema Kristaun mak responsabilidade neʼebé todan, diʼak atu buka-hatene tanbasá Ita sente nuneʼe no saida mak bele ajuda Ita. Ita bele halo nuneʼe liuhusi lee kapítulu 37 husi livru Pergunta Husi Joven Sira—Resposta neʼebé bele ajuda, Volume 2.