Xave hitu atu halo ai-han seguru no dieta saudavel

• Oinsá buat neʼebé ita han bele kona ita-nia saúde

• Xave haat atu prepara no rai ai-han iha dalan neʼebé saudavel

• Xave tolu atu han ai-han neʼebé saudavel

• Hanoin neʼebé sala kona-ba ai-han

Oinsá buat neʼebé ita han bele kona ita-nia saúde

Dala barak, ita-nia saúde depende ba buat neʼebé ita han. Se ita rai ai-han iha dalan neʼebé moos no iha dieta neʼebé saudavel, ita bele iha saúde diʼak. Maibé, hahán neʼebé la moos no la diʼak bele halo problema sériu ho ita-nia saúde, hanesan mina neʼebé la moos bele estraga motór. Karik problema la mosu kedas, maibé ikusmai problema sei mosu.—Galásia 6:7.

Organizasaun Mundiál Saúde (WHO) dehan katak “rai ida-idak iha mundu tomak iha problema ho malnutrisaun”. Malnutrisaun inklui kondisaun kuandu ema la iha hahán neʼebé diʼak ba saúde, no mós kuandu isin sai todan tebes no sai bokur demais. Dala barak kuandu han no hemu buat neʼebé la diʼak bele aumenta risku atu hetan moras fuan, estrok, diabetes, no kankru. Tuir Estudu ida, foin daudauk ai-han neʼebé la diʼak ba saúde kauza ema millaun 11 liu atu mate. WHO hanoin katak loroloron ema naʼin-1.000 liu mate no ema rihun ba rihun sai moras tanba hahán neʼebé la moos.

Bíblia anima ita atu hanoin didiʼak kona-ba problema sira-neʼe. Bíblia hanorin katak Maromak mak “hun ba moris”. (Salmo 36:9) Moris mak prezente, no ita hatudu katak ita hafolin neʼe hodi tau matan ba ita no ita-nia família nia saúde. Hanoin kona-ba oinsá ita bele atu halo ida-neʼe.

Xave haat atu prepara no rai ai-han iha dalan neʼebé saudavel

1. Prepara ai-han iha dalan neʼebé moos.

Tanbasá? Baktériaa neʼebé perigu iha ai-han no bee bele tama ita-nia isin no halo ita moras.

Rekomendasaun husi matenek-naʼin kona-ba saúde:

• Antes ita prepara ai-han, fase liman ho sabaun no bee.b Kose liman hamutuk ba segundu 20. Fase ita-nia liman nia kotuk no mós entre liman-fuan no iha liman-kukun okos. Fase fali ho bee no hamaran didiʼak ita-nia liman.

• Uza sabaun no bee atu fase bikan, ai-kabelak neʼebé uza atu koʼa, no sasán seluk neʼebé uza kuandu prepara ai-han. Liután neʼe, uza ai-kabelak ida ba ai-han neʼebé sei matak no ida seluk ba ai-han neʼebé la presiza teʼin.

• Fase ai-fuan no modo hotu, liuliu se ita hela iha fatin neʼebé ema uza bee neʼebé foʼer atu rega toʼos.

2. Haketak ai-han neʼebé teʼin tiha ona husi ai-han neʼebé sei matak

Tanbasá? Baktéria husi ai-han neʼebé sei matak no nia been sei hafoʼer ai-han seluk.

Rekomendasaun husi matenek-naʼin kona-ba saúde:

• Kuandu kompras ka haloot ai-han, haketak ai-han hotu neʼebé sei matak, liuliu naan, husi ai-han neʼebé teʼin tiha ona.

• Depois tetak naan matak, fase didiʼak liman, tudik, no ai-kabelak antes koʼa ai-han seluk.

3. Teʼin didiʼak ai-han

Tanbasá? Baktéria sei mate só deʼit se teʼin ai-han iha temperatura neʼebé manas liu.

Rekomendasaun husi matenek-naʼin kona-ba saúde:

• Teʼin ai-han ho temperatura neʼebé manas liu. Presiza hamanas ai-han, no naan nia laran, toʼo temperatura 70°C ba segundu 30.

• Daʼan sopa ka hahán neʼebé ho been toʼo nakali.

• Kuandu han ai-han neʼebé uluk ita teʼin tiha ona presiza hamanas fali toʼo suar saʼe.

4. Rai hahán iha temperatura neʼebé diʼak.

Tanbasá? Se ita rai ai-han ho temperatura entre 5°C toʼo 60°C ba minutu 20 deʼit, baktéria iha ai-han neʼe bele aumenta ba dala rua. Se ita rai naan matak ho temperatura neʼebé la loos, baktéria balu bele halo kímiku perigu no maski teʼin naan neʼe kímiku sei iha.

Rekomendasaun husi matenek-naʼin kona-ba saúde:

• Rai ai-han ho temperatura manas ka malirin, laʼós morna deʼit, hodi baktéria labele aumenta.

• Nunka husik ai-han iha meza ba oras rua liu, ka oras ida liu se temperatura liu 32°C.

• Depois teʼin, keta husik neʼe sai morna antes han.

Xave tolu atu han ai-han neʼebé saudavel

1. Loroloron han ai-fuan no modo oioin.

Ai-fuan no modo iha vitamina, no buat seluk neʼebé importante ba saúde. WHO dehan katak loroloron ita presiza han ai-fuan no modo lima. Hahán neʼe la inklui ai-han hanesan fehuk ka ai-farina.

2. Hamenus han buat neʼebé bokur no mina.

WHO rekomenda katak diʼak atu hamenus han ai-han neʼebé sona, ai-han neʼebé halo husi fábrika, no ai-han neʼebé tunu tanba dala barak ai-han sira-neʼe iha mina barak neʼebé la diʼak ba ita-nia saúde. Se bele, teʼin uza deʼit mina husi modo tanba iha lemak tak jenuh ka insaturados.c Mina neʼe mak diʼak liu fali mina seluk.

1. Han masin no masin-midar uitoan deʼit.

WHO rekomenda katak ema adultu sira presiza hamenus han masin uitoan deʼit, la toʼo kanuru kiʼik ida loroloron. WHO mós rekomenda katak presiza hamenus masin-midar, maizumenus mililitru 60 (kanuru kiʼik 12).d Baibain fábrika neʼebé halo ai-han no hemu uza masin midar barak. Porezemplu, Bebida husi lata ida neʼebé mililitru 355 iha maizumenus masin-midar kanuru kiʼik 10. Bebida refresku sira ka soft drinks iha enerjia barak, maibé baibain la iha vitamina ka buat seluk neʼebé diʼak.

Bíblia dehan: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.” (Provérbios 22:3) Se ita hatudu matenek iha dalan neʼebé ita han no halo mudansa diʼak, neʼe hatudu katak ita agradese ba Maromak ba ita-nia moris no saúde.

Hanoin neʼebé sala kona-ba ai-han

Hanoin neʼebé sala: “Haʼu baibain tiha ona han ai-han neʼebé la saudavel, entaun maski haʼu troka agora neʼe sei la ajuda haʼu.”

Hanoin neʼebé loos: Matenek-naʼin balu dehan katak sei ita han ai-han neʼebé saudavel neʼe sei hamenus risku atu mate sedu no ita sei hetan benefísiu tan nuʼudar ita kontinua dieta neʼebé diʼak.