Oinsá atu kontrola Ita-nia neon atu la hanoin barak demais
Hanoin barak demais bele estraga Ita-nia saúde no emosaun. No neʼe bele aumenta liután problema neʼebé uluk halo ita hanoin barak.
Sujestaun atu la hanoin barak
Labele lee ka nonton beibeik notísias negativu. Ita la presiza hatene buat hotu kona-ba krize. Se Ita buka-hatene demais notísias kona-ba dezastre ruma, neʼe sei halo Ita sente taʼuk no laran-kraik liután.
Bíblia nia prinsípiu: “Laran-triste halakon ema nia forsa.”—Provérbios 17:22.
“Fasil atu sai toman hodi buka-hatene notísias foun kona-ba buat aat neʼebé akontese, maibé neʼe la ajuda. Bainhira haʼu hamenus tempu atu nonton ka lee notísias, neʼe halo haʼu ladún hanoin barak.”—John.
Hanoin toʼok: Haʼu presiza haree beibeik ba notísias foun ka lae?
Tuir oráriu. Koko atu hadeer, han, halo serbisu no toba tuir oras. Hodi tuir oráriu, neʼe sei ajuda Ita moris iha dalan neʼebé la runguranga no la hanoin barak.
Bíblia nia prinsípiu: “Ema badinas nia planu sei hetan duni susesu.”—Provérbios 21:5.
“Bainhira pandemia COVID-19 hahú, haʼu la tuir oráriu ida no ikusmai haʼu gasta tempu barak atu halimar deʼit. Haʼu hakarak uza didiʼak haʼu-nia tempu, entaun haʼu halo oráriu neʼebé ajuda haʼu atu kumpre serbisu loron-loron.”—Joseph.
Hanoin toʼok: Ita iha oráriu neʼebé ajuda Ita atu kumpre serbisu loron-loron no halo Ita sente kontente ka lae?
Hanoin kona-ba buat pozitivu. Se Ita imajina beibeik kona-ba situasaun aat neʼebé seidauk akontese, ida-neʼe sei halo Ita hanoin barak liután. Entaun, diʼak liu atu hanoin kona-ba buat rua ka tolu neʼebé Ita bele agradese.
Bíblia nia prinsípiu: “Sempre hatudu agradese bá.”—Koloso 3:15.
“Lee Bíblia ajuda haʼu atu fokus ba buat neʼebé pozitivu no la buka informasaun neʼebé negativu. Maski neʼe rona simples, maibé neʼe ajuda duni!”—Lisa.
Hanoin toʼok: Ita iha toman atu hanoin deʼit kona-ba buat negativu iha Ita-nia moris no haluha kona-ba buat neʼebé pozitivu ka lae?
Hanoin kona-ba ema seluk. Se Ita sempre hanoin barak, neʼe sei halo Ita hakarak mesak deʼit no lakohi ransu ho ema seluk. Duké sai hanesan neʼe, koko toʼok atu hanoin oinsá Ita bele ajuda ema seluk neʼebé presiza buat ruma.
Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.
“Ajuda ema seluk halo haʼu sente kontente. Haʼu mós halo sira sente kontente, no iha tempu hanesan, haʼu mós la hanoin barak tan. Loloos kuandu haʼu okupadu ajuda ema seluk, neʼe halo haʼu la iha tempu atu hanoin barak.”—Maria.
Hanoin toʼok: Hanoin kona-ba Ita-nia kolega sira. Sé mak presiza ajuda, no saida mak Ita bele halo atu ajuda sira?
Tau matan ba saúde. Halo ezersísiu beibeik no deskansa. Han ai-han neʼebé diʼak ba saúde. Hodi tau matan ba Ita-nia saúde, neʼe sei ajuda Ita atu iha hanoin pozitivu kona-ba Ita-nia moris no la hanoin barak.
Bíblia nia prinsípiu: “Halo ezersísiu lori buat diʼak.”—1 Timóteo 4:8, nota-rodapé.
“Haʼu no haʼu-nia oan labele halo ezersísiu iha liʼur, entaun ami sai toman atu halo ezersísiu iha uma laran. Neʼe ajuda ami atu sente kontente no hatudu laran-diʼak ba malu liután.”—Catherine.
Hanoin toʼok: Ita presiza halo mudansa ba ai-han neʼebé Ita han no halo ezersísiu atu Ita bele iha saúde neʼebé diʼak ka lae?
Ema barak hetan benefísiu liután hodi aprende kona-ba promesa iha Bíblia laran, kona-ba futuru neʼebé sei sai diʼak. Haree informasaun “Saida mak Maromak nia Reinu sei halo?”