Bíblia bele ajuda Ita atu sai livre husi droga ka lae?

Tinan-tinan, ema millaun ba millaun mate tanba uza ai-moruk iha dalan neʼebé sala, neʼe inklui uza droga. Durante pandemia COVID-19, problema neʼe sai boot liután. Matadalan diʼak husi Bíblia ajuda ona ema barak sai livre husi toman aat neʼe. Se Ita hasoru daudauk problema neʼe, Ita mós bele hetan ajuda husi Bíblia nia matadalan.a

Iha informasaun neʼe

Tanbasá mak ita presiza buka ajuda husi Bíblia?

Matenek-naʼin sira dehan katak dala barak problema ho droga akontese kuandu ema sente mesamesak, estrese, hanoin barak, no depresaun. Bíblia bele ajuda Ita atu haburas fiar hodi nuneʼe Ita bele hetan forsa atu tahan hasoru sentimentu oioin neʼebé bele book Ita atu uza droga. Bíblia hanorin oinsá mak Ita bele haburas relasaun diʼak ho Maromak. (Salmo 25:14) Hodi simu Maromak nia ajuda, Ita bele manán problema oioin neʼebé Ita labele rezolve ho Ita rasik nia forsa.—Marcos 11:22-24.

Hakat haat atu sai livre husi droga

1. Aprende kona-ba Maromak Jeová.b (João 17:3) Nia mak Kriadór no ninia forsa la iha limite. Laʼós neʼe deʼit, nia mak Ita-nia Aman iha lalehan neʼebé nakonu ho domin. Nia hakarak sai Ita-nia belun no uza ninia forsa atu ajuda Ita. (Isaias 40:29-31; Tiago 4:8) Nia promete futuru neʼebé kapás ba Ita se Ita hakbesik ba nia hodi hetan benefísiu husi ninia domin.—Jeremias 29:11; João 3:16.
2. Husu Jeová nia ajuda. Halo orasaun ba Maromak no husu ninia ajuda atu Ita bele manán toman aat hodi nuneʼe Ita bele sai “santu [ka, moos] no Maromak simu”. (Roma 12:1) Maromak sei uza ninia espíritu santu, ka forsa neʼebé makaʼas, atu fó Ita “kbiit neʼebé la hanesan baibain”. (2 Korinto 4:7; Lucas 11:13) Kbiit neʼe sei ajuda Ita atu la uza tan droga no haburas “hahalok foun” neʼebé halo Maromak kontente.—Koloso 3:9, 10.
3. Enxe Ita-nia neon ho Maromak nia hanoin. (Isaias 55:9) Nia sei ajuda Ita atu “hafoun imi-nia dalan atu hanoin” ka troka Ita-nia atitude, no neʼe sei ajuda Ita atu sai livre husi problema neʼe. (Éfeso 4:23) Ita bele buka-hetan Maromak nia hanoin iha Bíblia laran, tan neʼe importante tebes atu lee Bíblia beibeik. (Salmo 1:1-2) Ema barak hetan ona ajuda atu komprende Bíblia nia hanorin no hetan benefísiu. (Apóstolu 8:30, 31) Testemuña ba Jeová oferese kursu Bíblia interativu neʼebé gratuitu. Ami mós konvida Ita atu asiste ami-nia reuniaun tanba reuniaun sira sei ajuda ita atu hatene didiʼak Bíblia nia hanorin no oinsá atu aplika iha ita-nia moris.
4. Hili kolega neʼebé diʼak. Kolega sira sei fó influénsia boot ba Ita iha dalan neʼebé diʼak no la diʼak, liuliu kuandu Ita hakaʼas an atu halakon Ita-nia toman aat. (Provérbios 13:20) Maromak hakarak Ita atu ransu ho kolega diʼak sira neʼebé adora nia, no hetan ajuda husi sira. (Salmo 119:63; Roma 1:12) Importante mós hili didiʼak buat neʼebé Ita halimar, tanba buat neʼebé Ita haree, rona, ka lee, neʼe hanesan Ita ransu hamutuk ho sira. Hasees an husi buat naran deʼit neʼebé hanetik Ita atu kaer metin ba Ita-nia desizaun atu halo buat neʼebé loos.—Salmo 101:3; Amós 5:14.

Eskritura sira kona-ba manán hasoru toman aat

Salmo 27:10: “Maski karik haʼu-nia inan-aman rasik husik tiha haʼu, maibé Jeová sei tau matan ba haʼu.”

“Haʼu la hatene haʼu-nia aman, neʼe halo haʼu sente falta buat ruma. Maibé bainhira haʼu aprende kona-ba Maromak Jeová nuʼudar ida neʼebé hadomi duni haʼu, haʼu-nia moris komesa iha objetivu no haʼu konsege halakon haʼu-nia toman aat.”—Wilby, husi Haití.

Salmo 50:15: “Bolu haʼu iha ó-nia tempu susar. Haʼu sei salva ó.”

“Dala barak ona, eskritura neʼe fó forsa ba haʼu atu kontinua hakaʼas an, maski kuandu haʼu monu fali ba tentasaun. Jeová kumpre duni ninia promesa.”—Serhiy, husi Ukránia.

Provérbios 3:5, 6: “Tau fiar ba Jeová ho ó-nia laran tomak, no labele sadere ba ó-nia matenek rasik. Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.”

“Eskritura neʼe ajuda haʼu atu tau fiar ba Jeová, laʼós ba haʼu-nia an rasik. Ho Jeová nia kbiit, haʼu konsege troka haʼu-nia moris iha dalan kompletu.”—Michele, husi Itália.

Isaias 41:10: “Keta taʼuk, tanba haʼu hamutuk ho ó. Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó, haʼu sei kaer metin ó ho haʼu-nia liman-loos justisa nian.”

“Uluk haʼu sente laran-taridu tebes kuandu haʼu la uza droga. Eskritura neʼe halo haʼu fiar metin katak Maromak sei ajuda haʼu atu manán hasoru haʼu-nia laran-susar, no nia ajuda duni.”—Andy, husi Áfrika Súl.

1 Korinto 15:33: “Keta husik ema seluk lohi imi. Ransu hamutuk ho ema aat sei estraga toman diʼak.”

“Haʼu aprende kona-ba droga oioin husi kolega sira neʼebé la diʼak no ikusmai haʼu sai atan ba droga. Haʼu konsege sai livre husi droga bainhira haʼu la ransu tan ho kolega sira-neʼe no sai belun ho ema neʼebé moris tuir morál neʼebé diʼak.”—Isaac, husi Kénia.

2 Korinto 7:1: “Mai ita hamoos ita-nia an husi buat hotu neʼebé hafoʼer isin no neon.”

“Eskritura neʼe fó forsa mai haʼu atu kontinua hakaʼas an hodi hamoos haʼu-nia isin no husik tiha haʼu-nia toman aat uluk nian neʼebé estraga haʼu.”—Rosa, husi Kolómbia.

Filipe 4:13: “Tanba iha situasaun hotu haʼu hetan forsa liuhusi nia neʼebé fó kbiit mai haʼu.”

“Haʼu hatene katak haʼu-nia kbiit rasik la toʼo atu para uza droga, entaun haʼu halo orasaun hodi husu Maromak nia ajuda. Nia fó haʼu kbiit neʼebé haʼu presiza.”—Patrizia, husi Itália.

Esperiénsia: Hetan Bíblia nia ajuda hodi sai livre husi droga

Joseph Ehrenbogen sai boot iha fatin neʼebé nakonu ho violénsia, no nia sai atan ba tua, tabaku, marijuana (ganja), no heroína. Dala balu, nia besik atu mate tanba uza droga barak demais. Bíblia nia liafuan ida mak ajuda nia atu fiar metin katak nia bele halo mudansa. Lee ninia esperiénsia “Haʼu aprende atu respeitu feto sira no haʼu-nia an rasik”.

Dmitry Korshunov sai atan ba tua, no dala barak nia koko atu husik ninia toman kona-ba hemu tua, maibé nia la konsege. Haree vídeo ‘Haʼu baruk ona ho haʼu-nia moris uluk’ hodi hatene saida mak ajuda nia atu hetan susesu.

Bíblia bandu tratamentu médiku atu sai livre husi droga ka lae?

Lae. Bíblia dehan: “Ema neʼebé isin-diʼak la presiza doutór, maibé ema moras presiza.” (Mateus 9:12) Hanesan neʼe mós, Instituto Nacional de Abuso de Drogas iha Estadus Unidus dehan: “Toman atu uza droga mak hanesan moras komplikadu ida, no atu sai livre husi toman neʼe, baibain ema presiza simu ajuda husi ema seluk tanba nia rasik nia hakarak deʼit la toʼo.” Klaru katak Maromak nia ajuda mak iha forsa boot liu hotu. Ema barak konsege husik sira-nia toman aat tanba halo tuir Bíblia nia konsellu. Maibé sira mós rekoñese katak sira presiza ajuda husi tratamentu médiku nian.c Porezemplu, mane ida naran Allen dehan: “Bainhira haʼu hakaʼas an atu la hemu tan tua, haʼu-nia isin moras makaʼas. Iha tempu neʼebá mak haʼu rekoñese katak haʼu presiza simu tratamentu médiku, hamutuk ho Bíblia nia ajuda.”

Bíblia bandu kona-ba uza ai-moruk ruma atu halo tratamentu médiku ka lae?

Lae. Loloos, Bíblia fó sai katak bele uza tua ba tratamentu médiku ka atu ajuda hamenus moras ba ema neʼebé besik mate. (Provérbios 31:6; 1 Timóteo 5:23) Maibé, hanesan tua, se ema ida uza ai-moruk balu atu hamenus moras, neʼe halo susar ba nia atu para uza ai-moruk neʼe. Tan neʼe, importante atu hanoin nanis perigu neʼebé sei akontese no kuidadu atu uza ai-moruk neʼebé hamenus moras.—Provérbios 22:3.

a Maski informasaun neʼe fokus ba oinsá atu sai livre husi droga, maibé Bíblia nia prinsípiu sira-neʼe bele mós ajuda ema neʼebé luta hasoru toman aat seluk, hanesan problema ho tua, tabaku, hahán, joga osan, pornografia, ka média sosiál.

b Jeová mak Maromak nia naran rasik. (Salmo 83:18) Haree informasaun “Sé mak Jeová?”

c Iha organizasaun, ospitál, no programa oioin neʼebé bele ajuda ema atu husik droga. Ema ida-idak presiza hanoin didiʼak opsaun sira-neʼe no deside tratamentu neʼebé diʼak.—Provérbios 14:15.