MATAN-MORIS BÁ NAFATIN!
Planeta mundu sai aat ba daudaun—Saida mak Bíblia dehan?
“Ita hasoru dezastre barak liután tanba mudansa kona-ba klima. Sidade boot oioin hetan inundasaun. Mundu nia temperatura aumenta manas liután. Anin boot akontese iha fatin oioin. Fatin barak la iha bee. Ai-horis no animál espésie millaun ba millaun mak la eziste tan. No neʼe laʼós istória neʼebé inventa deʼit. Neʼe mak buat neʼebé sei akontese nuʼudar rezultadu husi ita-nia desizaun agora kona-ba prodús enerjia.”—Komentáriu husi António Guterres, sekretáriu jerál husi Nasoins Unidas, bainhira koʼalia kona-ba reportajen husi enkontru kona-ba mudansa ba klima neʼebé fó sai iha loron 4 Abríl 2022.
“Sientista sira fó avizu daudaun katak iha tinan balu nian laran, jardín nasionál hotu iha Estadus Unidus hamutuk 423 sei hetan estragu tanba mudansa ba klima, tanba jardín sira-neʼe la tahan ho mudansa ba mundu nia temperatura. Neʼe atu hanesan ho buat neʼebé Bíblia fó sai kona-ba tempu Tesi-Lia nian: ahi no rai-nabeen, jelu nabeen, tasi saʼe, no anin manas.”—“Flooding Chaos in Yellowstone, a Sign of Crises to Come”, jornál The New York Times, 15 Juñu 2022.
Problema kona-ba mundu nia ambiente sei bele rezolve ka lae? Se bele, sé mak sei hadiʼa problema neʼe? Haree toʼok saida mak Bíblia dehan.
Iha futuru ita-nia planeta mundu sei sai diʼak
Bíblia hatete katak Maromak sei “halakon sira neʼebé estraga daudaun mundu”. (Apokalipse 11:18) Versíkulu neʼe hanorin ita kona-ba buat tolu:
1. Buat neʼebé ema halo sei estraga planeta mundu.
2. Problema kona-ba mundu nia ambiente sei lakon.
3. Maromak mak sei rezolve problema kona-ba mundu nia ambiente.
Iha futuru ita-nia planeta mundu sei sai diʼak
Bíblia hatete katak “mundu iha ba nafatin”. (Eclesiastes 1:4) Neʼe katak sei iha nafatin kriatura neʼebé hela iha mundu.
“Ema laran-loos sira sei simu rai nuʼudar sira-nian, no sira sei moris ba nafatin iha rai.”—Salmo 37:29.
Ita-nia planeta mundu nia kondisaun sei sai diʼak iha dalan neʼebé kompletu.
“Rai-fuik no rai neʼebé maran-dekor sei haksolok, no rai-tetuk maran sei haksolok no sai nakonu ho ai-funan asafraun.”—Isaias 35:1.