2022: Tinan neʼebé nakonu ho susar—Saida mak Bíblia dehan?

Durante tinan 2022, ita rona beibeik notísias kona-ba funu, problema ekonomia, no dezastre naturais. Só Bíblia deʼit mak bele esplika akontesimentu sira-neʼe signifika saida.

Signifikadu neʼebé loos husi akontesimentu sira iha tinan 2022

Buat oioin neʼebé akontese iha tinan 2022 hatudu ho klaru liután katak ita moris iha tempu neʼebé Bíblia bolu “loron ikus sira”. (2 Timóteo 3:1) Tempu neʼe hahú iha tinan 1914. Haree toʼok oinsá mak akontesimentu sira-neʼe tuir duni buat neʼebé Bíblia hatete nanis kona-ba ita-nia tempu:

“Funu.”—Mateus 24:6.

• “2022 mak tinan neʼebé hamosu fali ema Europa nia taʼuk kona-ba funu.”a

“Rai-hamlaha.”—Mateus 24:7.

• “2022: Tinan neʼebé problema kona-ba hamlaha sai boot liu.”b

“Moras-peste.”—Lucas 21:11.

• “Moras póliu komesa mosu fali, moras monkeypox aumenta, no COVID-19 kontinua lori susar ba ema. Neʼe hatudu ho klaru katak mundu neʼe nakonu ho moras neʼebé bele daʼet no ema nia isin mak fraku.”c

“Ema sei haree buat neʼebé halo sira taʼuk.”—Lucas 21:11.

• “Rai-manas, rai-maran, ahi han rai, no inundasaun. Durante tempu manas iha tinan 2022, ema rihun ba rihun mak mate no ema millaun ba millaun tenke husik sira-nia hela-fatin tanba klima neʼebé aat.”d

“Konflitu sira.”—Lucas 21:9, nota.

• “Iha tinan 2022 ema barak sai hirus tebes tanba problema ekonomia, liuliu kona-ba sasán nia folin saʼe, tan neʼe manifestasaun hasoru governu mós aumenta.”e

Saida mak sei akontese iha tinan oin?

La iha ema ida mak hatene ho loloos saida mak sei akontese iha tinan 2023. Maibé ita hatene duni katak lakleur tan, Maromak nia Ukun, ka governu ida iha lalehan, sei lori mudansa boot mai mundu. (Daniel 2:44) Governu neʼe sei halakon ema nia susar hotu no kumpre Maromak nia hakarak ba mundu.—Mateus 6:9, 10.

Ami enkoraja Ita atu halo tuir Jesus Kristu nia hanorin no “matan-moris nafatin” kona-ba oinsá akontesimentu sira ohin loron kumpre daudaun Bíblia nia profesia. (Marcos 13:37) Favór kontaktu ami atu aprende liután oinsá Bíblia bele ajuda Ita agora, no oinsá neʼe bele ajuda Ita no Ita-nia família atu hetan esperansa kona-ba futuru.