Autoridade saúde nian fó avizu katak média sosiál bele fó impaktu aat ba joven sira—Saida mak Bíblia dehan?

Iha 23 Maiu 2023, autoridade saúde nian iha Estadus Unidus fó avizu ba povu katak média sosiál fó impaktu aat ba labarik no joven sira.

• “Média sosiál lori benefísiu balu ba labarik no joven sira, maibé iha mós evidénsia barak neʼebé hatudu katak média sosiál iha risku boot ba labarik no joven sira-nia saúde mentál no fíziku.”—Social Media and Youth Mental Health: The U.S. Surgeon General’s Advisory, 2023.

Iha peskiza balu neʼebé esplika razaun tanbasá ita presiza hanoin kona-ba neʼe.

• Joven ho tinan 12 toʼo 15 “neʼebé uza média sosiál ba oras tolu liu iha loron ida nia laran, iha risku dala rua atu iha problema ho saúde mentál, neʼe inklui sintoma depresaun no laran-taridu”.

• Bainhira labarik sira neʼebé tinan 14 “uza média sosiál barak liu, neʼe bele halo sira ladún toba diʼak, hetan asédiu online, la fiar an ho sira-nia isin-lolon, sente la iha folin no depresaun. No neʼe dala barak kona joven feto sira duké joven mane”.

Oinsá inan-aman bele proteje sira-nia oan husi perigu sira-neʼe? Bíblia fó matadalan sira neʼebé diʼak.

Buat neʼebé inan-aman bele halo

Tau atensaun. Nuʼudar inan-aman, hanoin kona-ba risku sira no deside se Ita-nia oan presiza uza média sosiál ka lae.

• Bíblia nia prinsípiu: “Hanorin labarik atu laʼo iha dalan neʼebé diʼak ba nia.”—Provérbios 22:6.

• Atu aprende liután, lee informasaun ho títulu “Haʼu-nia oan presiza uza média sosiál ka lae?”

Se Ita fó lisensa ba Ita-nia oan atu uza média sosiál, matan-moris ba perigu sira no tau matan ba buat neʼebé oan sira halo iha média sosiál. Oinsá?

Proteje Ita-nia oan husi informasaun neʼebé perigu. Treinu Ita-nia oan atu hatene no hasees an husi informasaun neʼebé perigu.

• Bíblia nia prinsípiu: “Iha imi-nia leet keta temi hahalok sala seksuál, hahalok oioin neʼebé la moos, ka hahalok kaan-teen, . . . no imi mós labele halo hahalok neʼebé lori moe, ka koʼalia buat neʼebé beik, ka konta istória neʼebé foʼer.”—Éfeso 5:3, 4.

• Atu hetan matadalan sira neʼebé diʼak, lee informasaun ho títulu “Hanorin Ita-nia oan joven oinsá atu uza média sosiál ho seguru”.

Tau limite. Porezemplu, tau lei kona-ba bainhira no durante oras hira mak Ita-nia oan bele uza média sosiál.

• Bíblia nia prinsípiu: “Kontinua haree didiʼak oinsá imi halaʼo imi-nia moris . . . nuʼudar ema matenek, uza didiʼak imi-nia tempu.”—Éfeso 5:15, 16.

• Uza vídeo Istória husi pintór ho títulu Uza sítiu belun nian ho matenek atu ajuda Ita-nia oan komprende tanbasá presiza uza média sosiál ho kuidadu.