Ema lakon fiar ba polítiku-naʼin sira—Saida mak Bíblia dehan?

Durante tinan 2024 sei iha eleisaun barak liu fali tinan seluk iha mundu tomak. Maibé ema barak la tau fiar ona ba polítiku-naʼin sira.

•  Tuir peskiza, ema Amérika barak dehan katak “polítiku-naʼin barak mak hanoin an deʼit” duké hanoin atu serbí povu.a—Pew Research Center, 19 Setembru 2023.

Joven barak mós lakon fiar ba polítiku-naʼin sira.

•  “Joven sira hanoin kona-ba oinsá atu hetan solusaun ba problema boot oioin, maibé peskiza sira hatudu katak tuir joven sira-nia haree, polítiku-naʼin la iha solusaun ba problema sira-neʼe.”—The New York Times, 29 Janeiru 2024.

•  “Peskiza hatudu katak joven sira fiar liu ba YouTuber sira duké polítiku-naʼin sira.”—The Korea Times, 22 Janeiru 2024.

Ita bele tau fiar ba polítiku-naʼin sira atu lori futuru neʼebé diʼak liu ka lae? Sé mak ita bele tau fiar?

Ita bele tau fiar ba sé?

Se ema ida kuidadu kona-ba ema neʼebé nia bele tau fiar, neʼe katak nia halo buat neʼebé loos. Bíblia dehan: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.”—Provérbios 14:15.

•  Atu hetan matadalan diʼak kona-ba oinsá atu hatene informasaun neʼebé loos no falsu, lee informasaun “Proteje Ita-nia an husi informasaun falsu”.

Liután neʼe, polítiku-naʼin neʼebé laran-moos no iha hakarak neʼebé diʼak mós iha limitasaun kona-ba buat neʼebé sira bele halo. Tan neʼe mak Bíblia dehan:

•  “Imi keta tau fiar ba ulun-naʼin sira ka ema neʼebé labele lori salvasaun.”—Salmo 146:3.

Ukun-naʼin neʼebé Ita bele tau fiar

Bíblia esplika katak Maromak hili ona ulun-naʼin ida neʼebé diʼak liu no merese tau fiar, neʼe mak Jesus Kristu. (Lucas 1:32, 33) Jesus mak Liurai ba Maromak nia Ukun, neʼe mak governu ida neʼebé ukun husi lalehan.—Mateus 6:10.

•  Atu buka-hatene tanbasá Ita bele tau fiar ba Jesus no buat neʼebé nia sei halo atu rezolve problema ohin loron, lee informasaun “Sé mak Liurai ba Maromak nia Reinu?” no “Saida mak Maromak nia Reinu sei halo?”