Ema Kristaun tenkesér hatudu hahalok saida?​—Saida mak Bíblia dehan?

Ema barak ho orgullu temi sira-nia an nuʼudar ema Kristaun, maibé sira hatudu hahalok la diʼak ba ema seluk. Ema balu hanoin an deʼit, la hatudu hahalok onestu, no la hatudu laran-diʼak ba ema seluk. Iha mós ema neʼebé la laran-metin ba sira-nia kaben. Neʼe bele halo Ita hanoin: ‘Tuir loloos, ema Kristaun tenkesér hatudu hahalok saida?’

“Ema Kristaun” katak sá?

Fasil atu hatete “Haʼu ema Kristaun”, maibé neʼe deʼit la toʼo. Tuir Bíblia, ema Kristaun signifika katak Jesus Kristu nia dixípulu. (Apóstolu 11:26) Jesus rasik hatete: “Se imi sempre halo tuir haʼu-nia liafuan, imi mak haʼu-nia dixípulu duni.” (João 8:31) Klaru katak la iha ema ida mak bele halo tuir Jesus nia liafuan ho perfeitu. Maibé ema Kristaun sei hakaʼas an atu halo tuir Jesus nia hanorin no hatudu ida-neʼe liuhusi dalan neʼebé sira halaʼo sira-nia moris loroloron. Haree toʼok ezemplu balu.

Ema Kristaun hatudu domin ba ema seluk

Saida mak Jesus hatete: “Haʼu fó ba imi ukun-fuan foun ida, katak imi hadomi malu. Hanesan haʼu hadomi ona imi, imi mós tenke hadomi malu. Se imi hadomi malu, ema hotu sei hatene katak imi mak haʼu-nia dixípulu.”—João 13:34, 35.

Saida mak Jesus halo: Jesus hatudu domin ba ema hotu, hodi la haree ba ema nia rikusoin ka pozisaun. Nia kura ema neʼebé moras no fó hahán ba ema neʼebé hamlaha, no nia mós fó ninia moris rasik atu salva ema.—Mateus 14:14-21; 20:28.

Ema Kristaun hatudu hahalok saida: Ema Kristaun hatudu domin ba ema seluk liuhusi hahalok laran-luak, la todan ba sorin, no fó perdua. Sira mós ajuda ema neʼebé iha susar laran, no prontu atu halo sakrifísiu ba ema seluk.—1 João 3:16.

Ema Kristaun hatudu hahalok onestu

Saida mak Jesus hatete: “Haʼu mak . . . lia-loos.”—João 14:6.

Saida mak Jesus halo: Jesus sempre hatudu hahalok onestu liuhusi liafuan no hahalok. Nia nunka koko atu lohi ka bosok ema seluk hodi bele kumpre ninia hakarak. Ema seluk hatene katak nia mak onestu, no nia nafatin hatudu onestu maski neʼe bele lori susar ba ninia an.—Mateus 22:16; 26:63-67.

Ema Kristaun hatudu hahalok saida: Ema Kristaun la bosok. Sira selu taxa ho loloos, la naʼok, no sira mós halo serbisu ho badinas hodi tuir oras. (Roma 13:5-7; Éfeso 4:28) Sira la hamatak ema, la nyontek, no la tau informasaun falsu bainhira prenxe dokumentu ruma.—Ebreu 13:18.

Ema Kristaun hatudu laran-diʼak

Saida mak Jesus hatete: “Mai besik haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi. Lori haʼu-nia ai-leba no aprende husi haʼu, tanba haʼu laran-maus no haraik an, no imi sei sente kmaan. Tanba haʼu-nia ai-leba fasil atu lori, no haʼu-nia naha kmaan.”—Mateus 11:28-30.

Saida mak Jesus halo: Jesus hatudu laran-diʼak ba ema seluk no neʼe halo fasil ba ema seluk atu hakbesik ba nia. Nia kontente atu ransu ho labarik sira, fó kmaan ba ema neʼebé iha susar laran, no hatudu respeitu ba ema seluk.—Marcos 10:13-15; Lucas 9:11.

Ema Kristaun hatudu hahalok saida: Ema Kristaun koʼalia ho laran-diʼak ba ema seluk, no la uza liafuan kasar ka hatún ema. (Éfeso 4:29, 31, 32) Ema Kristaun mós hanoin ema seluk nia diʼak no buka oportunidade atu ajuda sira.—Galásia 6:10.

Ema Kristaun hatudu laran-metin ba sira-nia kaben

Saida mak Jesus hatete: “Buat neʼebé Maromak tau hamutuk, ema keta haketak.”—Marcos 10:9.

Saida mak Jesus halo: Maski Jesus nunka kaben, nia anima kaben-naʼin sira atu laran-metin ba malu. (Mateus 19:9) Nia mós fó avizu kona-ba hahalok sira neʼebé bele estraga moris kaben nian.—Mateus 5:28.

Ema Kristaun hatudu hahalok saida: Ema Kristaun hasees an husi hahalok neʼebé la hatudu respeitu ba sira-nia kaben nian. (Ebreu 13:4) Feen no laʼen sei hatudu domin no respeitu ba malu.—Éfeso 5:28, 33.