Tuir loloos, sé mak hakerek Bíblia?

Bíblia nia resposta

Ema barak dehan katak ita labele hatene ho loloos sé mak hakerek Bíblia. Maibé Bíblia temi beibeik hakerek-naʼin sira-nia naran. Livru balu hahú ho fraze hanesan ‘liafuan husi Neemias’, “Isaias haree vizaun”, no ‘Jeová fó sai liafuan tuirmai neʼe ba Joel’.—Neemias 1:1; Isaias 1:1; Joel 1:1.

Sira barak neʼebé hakerek Bíblia fó sai katak Maromak loos mesak deʼit naran Jeová mak dirije sira atu hakerek Ninia hanoin. Profeta sira neʼebé hakerek Eskritura Lian Ebraiku hakerek fraze “Jeová dehan nuneʼe” dala 300 liu. (Amós 1:3; Miqueias 2:3; Naum 1:12) Iha mós hakerek-naʼin balu neʼebé simu Maromak nia mensajen liuhusi anju sira.—Zacarias 1:7, 9.

Maizumenus mane naʼin-40 mak hakerek Bíblia durante tinan 1.600. Maromak uza sira balu atu hakerek livru rua ka liu. Tuir loos, Bíblia mak hanesan biblioteka kiʼik neʼebé iha livru 66 iha laran. Bíblia fahe ba parte rua, parte ida mak Eskritura Lian Ebraiku hamutuk livru 39 neʼebé baibain bolu Testamentu Tuan, no tuirmai mak Eskritura Lian Gregu hamutuk livru 27 neʼebé baibain bolu Testamentu Foun.