Maromak iha naran ka lae?

Bíblia nia resposta

Ema ida-idak iha naran rasik. Se nuneʼe, Maromak mós iha naran rasik ka lae? Iha naran no uza naran rasik mak buat neʼebé importante atu sai ema nia belun. Neʼe mós importante atu sai belun ho Maromak loos ka lae?

Iha Bíblia, Maromak hatete: “Haʼu mak Jeová. Neʼe mak haʼu-nia naran.” (Isaias 42:8) Maski nia iha títulu barak, hanesan “Maromak neʼebé Kbiit Boot Liu Hotu”, “Naʼi Ukun-Naʼin Boot Liu” no “Kriadór”, maibé ho haraik an, Maromak husu ba ema neʼebé adora nia atu uza ninia naran rasik.—Génesis 17:1; Apóstolu 4:24; 1 Pedro 4:19.

Iha tradusaun Bíblia barak bele hetan Maromak nia naran rasik iha Éxodo 6:3. Eskritura neʼe hatete: “Haʼu mosu beibeik ba Abraão, Isaac no Jacob nuʼudar Maromak neʼebé Kbiit Boot Liu Hotu, maibé haʼu la hatudu sai buat hotu kona-ba haʼu-nia naran Jeová ba sira.”

Jeová mak Maromak nia naran iha lian Portugés neʼebé ema uza kleur ona. Maski matenek-naʼin barak gosta liu uza “Yahweh,” maibé Jeová mak naran neʼebé ema hatene liu. Parte primeiru husi Bíblia hakerek ho lian Ebraiku, língua neʼebé ema lee husi loos ba karuk. Iha lian Ebraiku, Maromak nia naran hakerek ho letra יהוה. Letra haat neʼe naran Tetragrama neʼebé tradús fali sai YHWH.