Haʼu iha hakarak omoseksuál, neʼe katak sei sai ema omoseksuál ka lae?

Lae duni!

Faktu: Tuir loloos, hakarak omoseksuála bele mosu ba tempu uitoan deʼit.

Feto ida naran Lisette neʼebé tinan 16, uluk nia gosta feto ida. Maibé nia dehan: “Bainhira haʼu aprende kona-ba biolojia iha eskola, haʼu aprende katak durante tempu foin-saʼe, ema nia ormona bele troka beibeik. Haʼu hanoin se joven sira komprende diʼak kona-ba sira-nia isin, sira bele komprende katak hakarak omoseksuál bele mosu ba tempu uitoan deʼit, tan neʼe sira la presiza estrese kona-ba sai ema omoseksuál.”

Maibé oinsá se ita-nia hakarak omoseksuál kontinua no la para? Se Maromak fó matadalan atu hasees husi hahalok omoseksuál, ida-neʼe haterus ema ka lae?

Se ita-nia resposta mak sin, hanoin lai. Laʼós katak ema hotu tenke halo tuir sira-nia hakarak seksuál naran deʼit. Tuir Bíblia nia hanorin, ita ema iha kbiit duni atu kontrola ita-nia hakarak seksuál neʼebé la loos.​—Koloso 3:5.

Bíblia nia hanorin la demais liu. Bíblia nia matadalan mak hanesan ba ema neʼebé iha hakarak omoseksuál ka hakarak seksuál seluk neʼebé la loos, sira tenke “hasees an husi sala seksuál.” (1 Korinto 6:18) Loloos, ema rihun ba rihun neʼebé laʼós omoseksuál neʼebé hakarak halo tuir Bíblia nia mandamentu tenke kontrola an bainhira hasoru tentasaun sira. Ema neʼebé iha hakarak omoseksuál mós bele kontrola an se sira hakarak halo Maromak kontente.​—Deuteronómio 30:19.