Oinsá se haʼu iha toman atu haree pornografia?
Saida mak Ita bele halo
Komprende kona-ba saida mak pornografia. Pornografia mak hahalok neʼebé la hatudu respeitu ba buat sagradu neʼebé Maromak kria ona. Komprende didiʼak oinsá mak Maromak hanoin kona-ba pornografia sei ajuda ita atu “odi buat neʼebé aat”.—Salmo 97:10.
Hanoin kona-ba konsekuénsia. Pornografia hatún dignidade husi ema neʼebé envolve sira-nia an. Neʼe mós hatún morál husi ema neʼebé haree. Tan razaun neʼe, Bíblia hatete: “Ema neʼebé matenek haree perigu no subar nia an.”—Provérbios 22:3.
Halo aliansa. Job, ema fiar naʼin ida dehan: “Haʼu halo ona aliansa ho haʼu-nia matan. Entaun oinsá mak haʼu bele hateke fali ba feto virjen ida?” (Job 31:1) Tuirmai mak ‘aliansa balu’ neʼebé ita bele halo:
Haʼu sei la uza internét kuandu haʼu mesak.
Haʼu sei taka kedas sítiu naran deʼit neʼebé hatudu dezeñu la morál.
Haʼu sei koʼalia ba belun maduru ida kuandu haʼu-nia toman neʼe mosu fali.
Se ita haree beibeik ba pornografia, neʼe sei halo susar ba ita atu hasees an
Halo orasaun. Ema neʼebé hakerek Salmo harohan ba Maromak Jeová: “Keta husik haʼu hateke nafatin ba buat neʼebé folin-laek.” (Salmo 119:37) Maromak hakarak ita susesu, no se ita halo orasaun ba Jeová, nia sei fó kbiit mai ita atu halo buat neʼebé loos!—Filipe 4:13.
Koʼalia ba ema ruma. Hili atu koʼalia ba ema neʼebé ita bele tau fiar, mak hakat ida atu hapara ita-nia toman.—Provérbios 17:17.
Hanoin hetan: Tempu ida-idak neʼebé ita hasees an husi pornografia, ita manán ona luta. Fó hatene Jeová kona-ba luta neʼebé ita manán ona, no hatoʼo agradese tanba nia fó kbiit ba ita. Hodi hasees an husi pornografia, ita halo Jeová nia laran haksolok!—Provérbios 27:11.