PERGUNTA HUSI JOVEN SIRA

Saida mak haʼu bele halo se haʼu-nia inan-aman atu divórsiu?

Situasaun ida neʼebé bele halo joven sira sente estrese liu mak bainhira sira-nia inan-aman soe-malu ka divórsiu. Saida mak Ita bele halo atu tahan hasoru situasaun neʼe?

Iha informasaun neʼe

Buat tolu neʼebé Ita labele halo

1. Fó sala ba an

“Uluk haʼu-nia amá hatete mai haʼu katak problema komesa mosu entre haʼu-nia amá ho apá mak bainhira haʼu moris mai, entaun haʼu hanoin katak haʼu mak hamosu problema iha haʼu-nia inan-aman nia moris kaben.”—Diana.

Hanoin kona-ba neʼe: Laʼós tanba Ita mak Ita-nia inan-aman soe malu. Sira soe malu tanba sira iha problema iha sira-nia moris kaben. Laʼós Ita mak hamosu problema iha sira-nia moris kaben no Ita mós labele rezolve sira-nia problema. Sira mak iha responsabilidade atu rezolve sira-nia problema.

“Ema ida-idak sei lori ninia todan rasik.”—Galásia 6:5.

2. Rai hirus

“Haʼu hirus tebes haʼu-nia apá tanba la hatudu laran-metin ba haʼu-nia amá. Susar tebes mai haʼu atu tau fiar fali ba nia.”—Rianna.

Hanoin kona-ba neʼe: Karik Ita sente hirus no la kontente tanba buat neʼebé akontese ba Ita-nia inan-aman, no Ita iha razaun atu sente nuneʼe. Maibé la diʼak atu rai hirus. Neʼe bele lori perigu ba Ita-nia emosaun no fíziku. Rai hirus mak hanesan Ita hemu venenu no hein katak ema seluk mak sei hetan moras.a

“Husik tiha hirus no soe tiha laran-nakali.”—Salmo 37:8.

3. Duvida katak Ita sei la hetan moris kaben nian neʼebé kontente

“Haʼu taʼuk katak haʼu mós sei halo buat neʼebé haʼu-nia apá halo. Haʼu taʼuk katak se haʼu kaben no iha oan, haʼu sei repete fali sala neʼebé haʼu-nia inan-aman halo toʼo divórsiu.”—Jessica.

Hanoin kona-ba neʼe: Tanba Ita-nia inan-aman nia moris kaben nian la susesu, neʼe la dehan katak Ita-nia moris kaben mós sei la susesu. Tuir loloos, Ita bele aprende lisaun importante husi Ita-nia inan-aman nia esperiénsia. Porezemplu, Ita bele haree didiʼak ba hahalok neʼebé importante ba Ita husi ema neʼebé Ita atu kaben. Ita-nia inan-aman nia divórsiu bele mós motiva Ita atu haburas hahalok diʼak sira neʼebé bele ajuda Ita atu sai feen ka laʼen neʼebé diʼak liu.

“Ema ida-idak tenke buka-hatene ninia hahalok rasik.”—Galásia 6:4.

Mane joven ida tuur iha sofá no ninia ain tau hela jesu, nuʼudar nia uza hela laptop. — Atu sai diʼak husi sentimentu triste tanba inan-aman divórsiu mak hanesan ruin tohar neʼebé iha prosesu atu rekupera. Laran-kanek neʼebé Ita sente agora neineik sei sai diʼak tuir tempu

Buat tolu neʼebé Ita bele halo

1. Koʼalia ba malu. Ema neʼebé subar deʼit sira-nia sentimentu, karik bele halo buat neʼebé lori susar ba sira, hanesan hemu tua barak ka uza droga. Duké halo buat sira-neʼe, koko toʼok halo buat sira tuirmai neʼe:

Koʼalia ho Ita-nia inan-aman. Se Ita-nia inan ka aman koko atu envolve Ita atu apoia sira ida, hatudu kalma no esplika ho klaru katak oinsá ida-neʼe afeta Ita. Se susar ba Ita atu koʼalia oin ba oin ho sira, Ita bele hakerek karta ba sira ida ka sira naʼin-rua.

Koʼalia ho belun neʼebé Ita bele tau fiar. Se ema ida bele rona didiʼak ba Ita, neʼe sei ajuda tebes Ita. Bíblia hatete: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

Koʼalia ho Ita-nia Kriadór. Maromak Jeová, ida neʼebé “rona ba orasaun” nia sempre rona ba Ita. (Salmo 65:2) Bíblia hatete katak Ita bele ‘entrega Ita-nia laran-susar hotu ba nia, tanba nia hanoin Ita’.—1 Pedro 5:7.

Husi Ita-nia inan ka aman, ida-neʼebé mak fasil liu atu koʼalia ho kalma?
Belun diʼak ida-neʼebé (tinan hanesan ka idade liu) mak bele ajuda no apoia Ita?
Ita hakarak halo orasaun ba problema espesífiku saida?

2. Adapta an

Depois Ita-nia inan-aman divórsiu tiha, karik Ita sei adapta an ho uma, eskola, situasaun ekonomia, ka ho belun neʼebé la hanesan. Klaru katak Ita bele sente estrese no Ita-nia moris tomak troka derrepente deʼit. Saida mak bele ajuda Ita? Hanoin toʼok dalan saida mak Ita bele adapta an ho situasaun foun.

Depois Ita-nia inan-aman divórsiu tiha, mudansa boot saida mak Ita presiza halo?
Saida mak Ita bele halo atu ajuda Ita ho mudansa neʼe?

“Haʼu aprende ona atu sai kontente ho buat neʼebé haʼu iha.”—Filipe 4:11.

3. Buka-hatene Ita-nia hahalok diʼak sira

Klaru katak bainhira inan-aman divórsiu, neʼe bele halo Ita hanoin barak tebes. Maibé, neʼe mós bele ajuda Ita atu rekoñese hahalok diʼak sira neʼebé Ita iha ona. Jeremy, neʼebé ninia inan-aman soe malu bainhira nia tinan 13, hatete: “Bainhira haʼu-nia inan-aman divórsiu, neʼe obriga haʼu atu sai ema neʼebé kaer responsabilidade liután. Tanba haʼu mak oan primeiru, haʼu tenke ajuda beibeik amá no tau matan ba haʼu-nia alin-mane.”

Feto joven ida ajuda ninia alin feto halo TPC nuʼudar sira-nia amá prepara hela hahán iha dapur. — Ita-nia inan-aman nia divórsiu bele book Ita atu kaer responsabilidade liután iha família laran

Bainhira Ita-nia inan-aman divórsiu tiha, Ita foin rekoñese hahalok diʼak saida husi Ita-nia an?
Hahalok saida deʼit mak Ita hakarak hatudu liután?

“Eskritura hotu mai husi Maromak no neʼe diʼak . . . atu halo loos buat hotu.”—2 Timóteo 3:16.

a Atu hatene liután, haree informasaun “Oinsá mak haʼu bele kontrola haʼu-nia hirus?”

Ita-nia kolega hanoin saida

“Foin lalais mak haʼu simu katak haʼu-nia inan-aman divórsiu. Foufoun, haʼu la komprende saida mak akontese ho haʼu-nia inan-aman. Kuandu haʼu sei joven, haʼu sai hirus ba sira. Agora, haʼu tinan 18, haʼu bele ona simu realidade no la fokus tan ba problema neʼe.”—Elena.

“Haʼu-nia inan-aman divórsiu bainhira haʼu tinan hitu. Kuandu haʼu tinan 21, haʼu koʼalia ho haʼu-nia apá no hatete ba nia katak haʼu hakarak koʼalia kona-ba buat hotu neʼebé akontese. Ba oras rua, ami koʼalia kona-ba buat saida deʼit mak halo haʼu-nia inan-aman divórsiu, no saida mak haʼu sente bainhira sira soe malu. Haʼu la gosta duni sira divórsiu. Maibé, haʼu hadomi haʼu-nia apá no bele komprende ninia sentimentu. Haʼu simu buat neʼebé akontese ona no haʼu-nia neon mós sente kalma.”—Katelyn.