Oinsá se haʼu baruk bá eskola?

Mestre neʼebé siʼak. Hetan susar husi kolega sira. Estrese tanba ezame, no iha TPC barak loos. Se Ita dehan katak Ita la gosta eskola, karik tanba Ita iha razaun ruma.a Feto joven ida naran Rachelb hatete:

“Haʼu gosta bá fatin naran deʼit maibé laʼós bá eskola. Haʼu gosta liu bá tasi ka halimar ho haʼu-nia belun sira ka ajuda haʼu-nia inan-aman atu teʼin ka hamoos!”

Se Ita mós sente hanesan Rachel, karik Ita-nia tempu iha eskola halo Ita sente hanesan tama komarka no presiza tahan deʼit toʼo gradua mak foin livre. Iha ka lae dalan neʼebé diʼak liu atu hanoin pozitivu kona-ba Ita-nia tempu eskola?

Ita hatene ka lae? Kuandu Ita haburas hanoin neʼebé loos kona-ba eskola, Ita bele kontrola Ita-nia situasaun no para atu hanoin katak eskola mak fatin neʼebé koko deʼit Ita-nia hahalok tahan. Tuir loloos, eskola mak fatin ida neʼebé bele ajuda Ita atu aumenta liután Ita-nia abilidade neʼebé Ita sei presiza bainhira Ita sai boot.

Atu iha hanoin neʼebé loos kona-ba eskola, koko tau fokus ba buat tuirmai neʼe:

Ita-nia edukasaun. Nuʼudar Ita aprende liután, Ita sei sai prontu liután atu rezolve problema oioin iha futuru kona-ba serbisu ka situasaun seluk, duké sadere deʼit ba ema seluk. Husu Ita-nia an: ‘Maski iha buat balu neʼebé haʼu la gosta kona-ba eskola, maibé benefísiu saida mak haʼu bele hetan husi eskola?’

Bíblia nia prinsípiu: “Proteje matenek no kbiit atu hanoin.”—Provérbios 3:21.

Ita-nia toman. Toman diʼak neʼebé Ita haburas iha eskola bele hanorin Ita atu maneja Ita-nia tempu, dixiplina an, no sai serbisu-naʼin neʼebé badinas. Ita sei presiza hahalok sira-neʼe kuandu Ita sai boot. Husu Ita-nia an: ‘Oinsá mak atividade iha eskola ajuda daudaun haʼu atu sai ema neʼebé dixiplina an no sai serbisu-naʼin neʼebé diʼak? Mudansa saida mak haʼu bele halo atu haburas liután hahalok sira-neʼe?’

Bíblia nia prinsípiu: “Serbisu makaʼas hotu sei lori buat diʼak.”—Provérbios 14:23.

Ita-nia relasaun ho ema seluk. Ransu ho Ita-nia kolega eskola bele ajuda Ita atu haburas hahalok hanoin ema seluk no hatudu respeitu ba sira. Mane joven ida naran Joshua hatete: “Aprende oinsá atu komunika ho ema seluk mós importante hanesan ho aprende istória no siénsia. Neʼe mak abilidade ida neʼebé Ita sei uza iha Ita-nia moris tomak.” Husu Ita-nia an: ‘Lisaun saida mak haʼu aprende iha eskola kona-ba ransu ho ema seluk maski sira-nia fiar, kultura, ka rasa la hanesan?’

Bíblia nia prinsípiu: “Buka dame ho ema hotu.”—Ebreu 12:14.

Ita-nia futuru. Eskola bele ajuda Ita atu hatene Ita-nia abilidade no halo planu tuir Ita-nia abilidade. Feto joven ida naran Brooke hatete: “Karik Ita mós bele tuir treinamentu espesífiku ruma, hanesan haʼu, atu nuneʼe kuandu Ita remata eskola, Ita bele hetan serbisu.” Husu Ita-nia an: ‘Oinsá mak haʼu bele tau matan haʼu-nia an rasik kuandu haʼu remata eskola? Oinsá mak haʼu bele hili edukasaun neʼebé sei apoia haʼu-nia serbisu iha futuru?’

Bíblia nia prinsípiu: “Halo tetuk dalan ba ó-nia ain.”—Provérbios 4:26.