Moras todan​—Bíblia bele ajuda Ita ka lae?

Bíblia nia resposta

Sin. Maromak hanoin ninia atan sira neʼebé moras. Ba ninia atan sira neʼebé laran-metin, Bíblia hatete: “Jeová sei tau matan ba nia durante nia moras.” (Salmo 41:3) Se Ita iha moras todan, iha dalan tolu neʼebé bele ajuda Ita tahan ho situasaun neʼe:

1. Halo orasaun hodi husu forsa atu tahan. Ita bele simu “Maromak nia dame neʼebé aas liu ema nia hanoin hotu”, tanba ida-nee bele hamenus Ita-nia laran-taridu no ajuda Ita atu tahan maski hasoru situasaun susar sira-neʼe.​—Filipe 4:6, 7.

2. Hanoin pozitivu. Bíblia hatete: “Laran neʼebé kontente mak ai-moruk neʼebé diʼak, maibé laran-triste halakon ema nia forsa.” (Provérbios 17:22) Keta sériu demais maibe haburas sentimentu kontente iha laran, tanba neʼe bele ajuda Ita hasoru problema sira no mós lori benefísiu ba Ita-nia saúde.

3. Tau esperansa ba futuru neʼebé Maromak promete. Esperansa bele ajuda Ita atu nafatin kontente maski moras todan. (Roma 12:12) Bíblia fó-hatene nanis ona katak loron ida “la iha ema ida iha rai mak sei dehan: ‘Haʼu moras.’” (Isaias 33:24) Maromak sei kura moras todan sira neʼebé agora daudaun siénsia labele rezolve. Porezemplu, Bíblia hatete katak ema neʼebé idade ona sei sai joven fali no iha saúde diʼak, hodi dehan: “Husik ninia isin sai forte liu fali tempu joven nian, husik nia fila fali ba loron sira neʼebé nia sei iha forsa joven nian.”​—Job 33:25.

Atensaun: Ami Testemuña ba Jeová fiar ba Maromak nia ajuda, maibé ami mós buka hetan tratamentu médiku ba problema saúde. (Marcos 2:17) Maibé ami la promove tratamentu espesífiku ruma ba lee-naʼin sira, tanba ami fiar katak ema ida-idak tenke halo desizaun rasik kona-ba tratamentu neʼebé ema ida-idak hetan.