Tanbasá Holocaust akontese? Tanbasá Maromak la hapara ida-neʼe?

Ema barak neʼebé husu pergunta sira-neʼe hasoru ona situasaun neʼebé susar tebes no sira hakarak atu hetan resposta ba pergunta sira-neʼe no mós hetan kmaan. Ema seluk haree Holocausta nuʼudar tempu neʼebé aat liu iha ema nia istória no sira sente susar atu fiar ba Maromak.

Hanoin neʼebé sala kona-ba Maromak no Holocaust

Hanoin neʼebé sala: Ema labele husu tanbasá Maromak husik Holocaust akontese.

Hanoin neʼebé loos: Ema neʼebé fiar metin mós husu tanbasá Maromak husik buat aat akontese. Porezemplu, profeta Habakuk husu ba Maromak: “Tanbasá mak Ita husik deʼit ema haterus malu? Tanbasá mak iha naʼok no violénsia iha haʼu-nia oin? Tanbasá mak mosu haksesuk malu no problema barak?” (Habakuk 1:3) Duké sai hirus ba Habakuk, Maromak dirije nia atu hakerek pergunta sira-neʼe iha Bíblia atu ita hotu bele lee.

Hanoin neʼebé sala: Maromak la interese bainhira ema hasoru susar.

Hanoin neʼebé loos: Maromak odi hahalok aat no susar neʼebé mosu tanba ema nia hahalok aat. (Provérbios 6:16-19) Iha Noé nia tempu, Maromak “sente laran-kanek tebes” tanba ema hatudu violénsia barak tebes iha mundu. (Génesis 6:5, 6) Entaun ita bele fiar katak Maromak sente triste tebes bainhira nia haree ema hetan susar durante Holocaust.​—Malaquias 3:6.

Hanoin neʼebé sala: Holocaust mak Maromak nia kastigu ba ema Judeu.

Hanoin neʼebé loos: Maromak husik ema Roma atu halakon sidade Jeruzalein iha tinan 70 EC. (Mateus 23:37–24:2) Maibé husi tempu neʼebá, Maromak la hili grupu ida atu sai ninia povu neʼebé espesiál ka atu fó kastigu ba sira. Tuir Maromak nia haree, “ema Judeu no ema Gregu hanesan deʼit”.—Roma 10:12.

Hanoin neʼebé sala: Se Maromak neʼebé domin no kbiit boot mak iha duni, nia sei hanetik Holocaust atu la akontese.

Hanoin neʼebé loos: Maski Maromak nunka hamosu susar, maibé dala ruma nia husik ida-neʼe akontese ba tempu balu.​—Tiago 1:13; 5:11.

Tanbasá Maromak husik Holocaust akontese?

Razaun tanbasá Maromak husik Holocaust akontese mak hanesan ho razaun tanbasá nia husik ema hetan terus. Neʼe mak atu rezolve problema neʼebé mosu kleur liubá. Bíblia hatudu ho klaru katak agora daudaun Diabu mak ukun mundu, laʼós Maromak. (Lucas 4:1, 2, 6; João 12:31) Faktu rua husi Bíblia bele ajuda ita komprende tanbasá Maromak husik Holocaust akontese.

1. Maromak kria ema ho liberdade. Maromak hatete ba ema primeiru Adão no Eva kona-ba buat neʼebé nia hakarak sira atu halo, maibé nia la obriga sira atu halo tuir. Sira rasik mak deside buat neʼebé diʼak no buat neʼebé aat ba sira-nia an. Sira-nia desizaun neʼebé sala lori konsekuénsia aat ba ema hotu. Nuneʼe mós ho ema seluk, sira-nia desizaun sala lori susar oioin ba ema. (Génesis 2:17; 3:6; Roma 5:12) Hanesan buat neʼebé livru ida (Statement of Principles of Conservative Judaism) hatete: “Susar oioin neʼebé ema barak hasoru, mosu tanba ema uza sala sira-nia liberdade.” Duké halakon tiha ema nia direitu atu hili, Maromak husik ema atu koko moris ketak husi ninia matadalan.

2. Maromak bele no sei halakon rezultadu aat husi Holocaust. Maromak promete atu fó moris-hiʼas ba ema millaun ba millaun neʼebé mate ona, inklui mós ema neʼebé mate durante Holocaust. Maromak mós promete atu halakon ema nia laran-susar tanba tenke moris liu tempu susar neʼe. (Isaias 65:17; Apóstolu 24:15) Maromak nia domin ba ema mak garantia katak nia sei kumpre ninia promesa sira-neʼe.​—João 3:16.

Ema barak neʼebé mate no mós ema neʼebé moris liu Holocaust konsege mantein sira-nia fiar no mós iha objetivu ba sira-nia moris liuhusi komprende kona-ba tanbasá Maromak husik buat aat akontese no mós oinsá nia sei halakon susar sira iha futuru.