Saida mak animál fuik ho ulun hitu neʼebé temi iha Apokalipse kapítulu 13?
Bíblia nia resposta
Animál fuik ho ulun hitu neʼebé temi iha Apokalipse 13:1 reprezenta sistema polítiku nian iha mundu tomak.
Nia iha podér, kbiit no kadunan no ida-neʼe hatudu katak nia mak sistema polítiku nian.—Apokalipse 13:2.
Nia ukun “ema husi suku, povu, língua no nasaun hotu”, tan neʼe ita hatene katak nia laʼós governu ida neʼebé ukun nasaun ida deʼit.—Apokalipse 13:7.
Nia iha buat neʼebé hanesan ho animál fuik haat neʼebé temi iha profesia iha Daniel 7:2-8, neʼe katak nia haree hanesan leopardu, iha ursu nia ain, iha leaun nia ibun no iha dikur sanulu. Bíblia fó sai katak animál fuik sira iha Daniel nia profesia mak liurai ka governu sira neʼebé ukun tuituir malu. (Daniel 7:17, 23) Tan neʼe, animál fuik iha Apokalipse kapítulu 13 reprezenta sistema polítiku oioin neʼebé serbisu hamutuk.
Nia “sai husi tasi laran”, neʼe katak ema nia governu sira mai husi ema neʼebé Maromak la simu no governu sira-neʼe la metin.—Apokalipse 13:1; Isaias 17:12, 13.
Bíblia hatete katak animál fuik neʼe nia númeru ka naran mak 666, neʼe mak “númeru ema nian”. (Apokalipse 13:17, 18) Fraze neʼe hatudu katak animál fuik neʼebé temi iha Apokalipse kapítulu 13 mai husi ema no laʼós espíritu ka anju aat.
Maski nasaun sira ladún konkorda malu kona-ba buat barak, maibé sira apoia malu atu nafatin kaer podér duké hakruʼuk ba Maromak nia Ukun. (Salmo 2:2) Sira mós sei apoia malu atu funu hasoru Maromak nia tropa sira iha funu Armagedon. Komandante ba Jeová nia tropa sira mak Jesus Kristu. Iha funu Armagedon nasaun sira sei lakon.—Apokalipse 16:14, 16; 19:19, 20.
“Dikur sanulu no ulun hitu”
Bíblia uza númeru balu iha dalan simbóliku. Porezemplu, sanulu no hitu reprezenta buat neʼebé kompletu. Atu bele komprende kona-ba animál fuik nia “dikur sanulu no ulun hitu” iha Apokalipse kapítulu 13 mak reprezenta saida, ita presiza komprende “animál fuik nia estátua” neʼebé mós temi iha Apokalipse reprezenta saida. Animál fuik neʼe mak kór-mean no iha ulun hitu no dikur sanulu. (Apokalipse 13:1, 14, 15; 17:3) Bíblia hatete katak animál fuik kór-mean nia ulun hitu signifika “liurai naʼin-hitu” ka governu hitu.—Apokalipse 17:9, 10.
Nuneʼe mós ho ulun hitu husi animál fuik neʼebé temi iha Apokalipse 13:1, ulun hitu neʼe reprezenta governu hitu. Governu sira neʼebé iha kbiit boot iha ema nia istória no mós fó-terus makaʼas ba Maromak nia povu. Governu sira-neʼe mak Ejitu, Asíria, Babilónia, Média-Pérsia, Grésia, Roma no Bretaña ho Amérika. Se ita dehan katak dikur sanulu neʼe reprezenta governu hotu maski kiʼik ka boot, entaun neʼe katak koroa iha dikur ida-idak hatudu katak governu ida-idak sei ukun iha tempu hanesan ho governu neʼebé iha kbiit boot.