Oinsá mak profesia husi Bíblia ajuda ita komprende kona-ba tinan 1914?

Bíblia nia resposta

Profesia husi Bíblia ajuda ita komprende katak Maromak nia Ukun harii ona iha lalehan iha tinan 1914. Mai ita haree profesia ida neʼebé hakerek iha livru Daniel kapítulu 4.

Rezumu husi profesia neʼe. Maromak fó mehi ida ba Liurai Nabukodonozór husi Babilónia kona-ba ai-hun boot ida neʼebé tesi tiha. Ai neʼe nia hun rohan kesi metin atu labele sai boot ba “tempu hitu”, no tuirmai ai-hun neʼe bele sai boot fali.​—Daniel 4:1, 10-16.

Profesia neʼe sai loos ba dala primeiru. Ai-hun boot neʼe reprezenta Liurai Nabukodonozór rasik. (Daniel 4:20-22) Liurai neʼe nia ukun “tesi tiha” iha dalan simbóliku bainhira nia sai bulak no lakon ninia ukun ba tinan hitu. (Daniel 4:25) Bainhira Maromak halo Nabukodonozór nia neon moos fali, nia simu fali ninia ukun no rekoñese katak Maromak mak Ukun-Naʼin neʼebé Boot Liu.​—Daniel 4:34-36.

Evidénsia hatudu katak profesia neʼe sei sai loos iha dalan neʼebé boot liu. Objetivu ba profesia neʼe mak atu “ema bele hatene katak Maromak neʼebé Aas Liu Hotu mak Ukun-Naʼin ba ema nia nasaun sira no katak nia entrega ukun neʼe ba ema neʼebé nia hakarak, inklui mós ba ema neʼebé kiʼik liu”. (Daniel 4:17) Maromak hakarak entrega ninia ukun ba Nabukodonozór neʼebé foti an ka lae? Lae, tanba Maromak fó ona mehi ida seluk ba Nabukodonozór atu hatudu katak nia no ukun-naʼin sira seluk hotu labele kumpre Maromak nia kritéria atu simu ukun hanesan neʼe. Duké hili ema ida atu kaer ukun, Maromak rasik sei “harii ukun ida neʼebé sei nunka lakon”.​—Daniel 2:31-44.

Antes neʼe, Maromak harii ona nasaun ida neʼebé reprezenta ninia ukun iha rai. Neʼe mak nasaun Izraél antigu. Maibé ninia ukun-naʼin sira la halo tuir, tan neʼe Maromak husik nasaun neʼe “rahun” tiha. Maski nuneʼe Maromak fó-hatene nanis katak nia sei entrega ninia ukun ba “ida neʼebé iha direitu tuir lei”. (Ezequiel 21:25-27) Bíblia fó sai katak Jesus Kristu mak ida neʼebé iha direitu atu simu ukun neʼe ba nafatin. (Lucas 1:30-33) La hanesan ho Nabukodonozór, Jesus mak ema neʼebé “haraik an” ka halo ninia an sai kiʼik liu, hanesan profesia fó sai nanis.​—Mateus 11:29.

Ai-hun iha Daniel kapítulu 4 reprezenta saida? Dala ruma, Bíblia temi ai-hun atu reprezenta ukun. (Ezequiel 17:22-24; 31:2-5) Entaun, ai-hun iha Daniel kapítulu 4 reprezenta Maromak nia ukun kuandu profesia neʼe sai loos iha dalan neʼebé boot liu.

Ai-hun neʼebé tesi tiha signifika saida? Hanesan ai-hun neʼebé tesi tiha signifika Nabukodonozór nia ukun neʼebé para tiha ba tempu balu, neʼe mós signifika katak Maromak nia ukun iha mundu para ba tempu balu. Ida-neʼe akontese bainhira Nabukodonozór mak halakon Jeruzalein, fatin neʼebé nasaun Izraél nia liurai sira tuur iha ‘Maromak Jeová nia kadunan’ nuʼudar Ninia reprezentante.​—1 Krónikas 29:23.

“Tempu hitu” reprezenta saida? “Tempu hitu” reprezenta tempu neʼebé Maromak husik nasaun sira atu ukun iha mundu no la iha influénsia ida husi governu neʼebé Maromak mak harii. “Tempu hitu” neʼe hahú iha fulan-Outubru iha tinan 607 AEC, bainhira tropa Babilónia halakon Jeruzalein.a​—2 Reis 25:1, 8-10.

“Tempu hitu” mak kleur oinsá? Neʼe laʼós tinan hitu hanesan bainhira profesia neʼe sai loos ba Nabukodonozór. Jesus ajuda ita atu hetan resposta ba pergunta neʼe bainhira nia dehan katak “nasaun sira sei sama Jeruzalein toʼo tempu neʼebé hili tiha ona ba nasaun sira kumpre ona”. (Lucas 21:24) “Tempu neʼebé hili tiha ona ba nasaun sira”, ka tempu neʼebé Maromak husik nasaun sira atu “sama” ninia ukun mak hanesan ho “tempu hitu” iha Daniel kapítulu 4. Neʼe katak bainhira Jesus iha rai, “tempu hitu” neʼe seidauk remata.

Bíblia ajuda ita oinsá atu kalkula “tempu hitu” neʼe. Tuir Bíblia, “tempu” tolu ho balu mak loron 1.260, entaun “tempu hitu” katak loron 1.260 dala rua, neʼe mak loron 2.520. (Apokalipse 12:6, 14) Bíblia mós temi katak “loron ida ba tinan ida”, se nuneʼe loron 2.520 reprezenta tinan 2.520. Entaun “tempu hitu” mak tinan 2.520, no tempu neʼe remata iha fulan-Outubru iha tinan 1914.​—Números 14:34; Ezequiel 4:6.