Saida mak haʼu sei halo bainhira haʼu halo sala?

Saida mak Ita sei halo?

Haree buat neʼebé akontese ba Karina, imajina toʼok ida-neʼe akontese ba Ita. Saida mak Ita sei halo iha situasaun hanesan neʼe?

Karina: “Bainhira atu bá eskola haʼu lori karreta halai makaʼas liu no ikusmai polísia hapara no fó surat multa mai haʼu. Haʼu estrese tebes! Haʼu konta ba amá no amá haruka atu fó-hatene ba apá, maibé haʼu lakohi.”

Saida mak Ita sei halo?

1. Opsaun A: Nonook deʼit, hein katak apá sei nunka hatene.

2. Opsaun B: Fó-hatene ba apá no konta buat hotu.

Ita bele hetan tentasaun atu hili Opsaun A. Karik Ita-nia amá sei hanoin katak Ita fó-hatene tiha ona ba Ita-nia apá. Maibé loloos iha razaun diʼak ba Ita atu fó-hatene kona-ba Ita-nia sala sira, maski neʼe kona-ba surat multa ka buat seluk.

Razaun tolu atu rekoñese Ita-nia sala

1. 1. Tanba neʼe hahalok neʼebé loos. Bíblia iha regra ba ema Kristaun sira, Bíblia hatete: “Ami hakarak atu hatudu laran-moos iha buat hotu.”​—Ebreu 13:18.

   “Haʼu hakaʼas an atu koʼalia loos no hatudu responsabilidade ba haʼu-nia hahalok. Haʼu mós fó-hatene kedas se haʼu halo sala ruma.”​—Alexis.

2. 2. Tanba baibain ema fó perdua ba ema neʼebé rekoñese sira-nia sala. Bíblia hatete: “Ema neʼebé subar ninia sala sira sei la hetan susesu, maibé ema neʼebé fó sai no husik tiha ninia sala sei hetan laran-sadiʼa.”​—Provérbios 28:13.

   “Klaru katak tenke brani atu rekoñese ita-nia sala, maibé neʼe mak dalan atu ema bele tau fiar ba ita. Sira bele haree katak ita mak ema neʼebé laran-moos. Se ita koʼalia loos, ita bele hadiʼa problema.”​—Richard.

3. 3. Importante liu, tanba neʼe halo Maromak Jeová kontente. Bíblia hatete: “Jeová hakribi ema neʼebé laran-makerek, maibé nia sai belun neʼebé besik ho ema laran-loos.”​—Provérbios 3:​32.

   “Depois halo tiha sala boot, haʼu foin hatene katak haʼu presiza fó-hatene ema ruma. Se lae, Jeová sei la fó bensaun mai haʼu.”​—Rachel.

Entaun, saida mak Karina sei halo? Nia la fó-hatene ninia apá kona-ba multa neʼe, maibé ikusmai nia apá hatene kona-ba neʼe. Karina hatete: “Liutiha tinan ida, haʼu-nia apá haree surat neʼe, no nia fó dixiplina makaʼas mai haʼu! Amá mós hirus tanba haʼu la rona ba ninia matadalan.”

Lisaun: Karina dehan: “Subar ita-nia sala, neʼe sei halo situasaun sai aat liután, ikusmai ita sei simu konsekuénsia!”

Aprende husi Ita rasik nia sala

Ema hotu halo sala. (Roma 3:​23; 1 João 1:8) No se ita rekoñese kedas ita-nia sala, neʼe hatudu katak ita haraik an no maduru.

Hakat tuirmai mak aprende husi Ita-nia sala. Triste mak joven balu la halo hanesan neʼe! Karik sira sente hanesan ho joven ida naran Priscilla. Nia dehan: “Haʼu sempre estrese kuandu haʼu halo sala. Haʼu sai laran-kraik no sente haʼu-nia sala todan tebetebes. Haʼu sente la iha folin.”

Dala ruma Ita mós sente hanesan neʼe ka lae? Se nuneʼe, hanoin-hetan: Kuandu hanoin nafatin sala uluk nian, neʼe hanesan ita lori karreta maibé hateke nafatin ba karreta nia espellu. Ita sei sente la iha folin no la prontu atu hasoru situasaun seluk tan.

Tan neʼe, diʼak atu hanoin ho balansu.

“Hanoin kona-ba ita-nia sala no aprende husi ida-neʼe atu ita atu la halo fali. Maibé, labele hanoin nafatin, se lae ita sei estrese.”​—Elliot.

“Haʼu koko atu haree haʼu-nia sala ida-idak nuʼudar lisaun atu nuneʼe haʼu bele sai ema neʼebé diʼak liu no bele hasoru situasaun iha tempu seluk. Neʼe mak dalan ida se ita hakarak sai ema neʼebé maduru.”​—Vera.