Tanbasá mak Testemuña ba Jeová nafatin neutrál kona-ba buat polítiku nian?
Testemuña ba Jeová neutrál iha buat polítiku nian tanba sira-nia fiar, neʼe bazeia ba buat neʼebé Bíblia hanorin. Ami la hola parte iha grupu polítiku nian, vota iha eleisaun atu apoia partidu polítiku ka hili ukun-naʼin, la sai kandidatu ba pozisaun ruma iha governu, no ami la tuir demonstrasaun ruma atu hatún governu. Ami fiar katak Bíblia fó razaun neʼebé forte kona-ba neʼe.
Ami tuir Jesus nia ezemplu, neʼebé la simu atu tuur iha pozisaun polítiku nian. (João 6:15) Nia hanorin ninia dixípulu sira atu la sai “parte husi mundu neʼe” no labele apoia buat polítiku nian.—João 17:14, 16; 18:36; Marcos 12:13-17.
Ami laran-metin ba Maromak nia Ukun, neʼebé Jesus temi kuandu nia hatete: “ema sei haklaken liafuan diʼak kona-ba Maromak nia Ukun iha mundu tomak.” (Mateus 24:14) Nuʼudar reprezentante husi Maromak nia ukun, ami haklaken kona-ba ukun neʼe, no ami neutrál kona-ba buat polítiku nian iha rai neʼebé ami hela bá.—2 Korinto 5:20; Éfeso 6:20.
Tanba ami neutrál, ami bele koʼalia ba ema husi partidu oioin kona-ba Maromak nia Ukun. Liuhusi ami-nia liafuan no hahalok, ami hatudu katak ami fiar Maromak nia Ukun deʼit mak bele rezolve problema hotu.—Salmo (Mazmur) 56:11.
Tanba ami la envolve an iha buat polítiku sira, ami bele sai ida deʼit nuʼudar maun-alin iha mundu tomak. (Koloso 3:14; 1 Pedro 2:17) La hanesan ho relijiaun sira seluk neʼebé hola parte iha buat polítiku nian neʼebé ikusmai halo sira-nia povu fahe malu.—1 Korinto 1:10.
Hatudu Respeitu ba governu. Maski ami la apoiu buat polítiku nian maibé ami hatudu nafatin respeitu ba governu iha fatin neʼebé ami hela bá. Ida-neʼe tuir ukun-fuan iha Bíblia, neʼebé hatete “ema ida-idak tenke hakruʼuk ba ukun-naʼin sira”. (Roma 13:1) Ami halo tuir lei sira, selu taxa, no apoia governu nia planu atu dezenvolve nia povu. Ami la hola parte iha grupu ruma atu hamonu governu, maibé ami tuir Bíblia nia konsellu atu reza ba “liurai sira no mós kona-ba sira hotu neʼebé iha pozisaun aas”, bainhira sira halo desizaun neʼebé kona fali adorasaun.—1 Timóteo 2:1, 2.
Ami mós respeitu ema seluk nia direitu atu foti desizaun kona-ba buat polítiku nian. Porezemplu, ami la hanetik eleisaun ka ema neʼebé atu vota.
Ami-nia desizaun atu neutrál mak buat neʼebé foun ka lae? Lae. Apóstolu sira no ema kristaun iha tempu uluk mós foti desizaun neʼebé hanesan kona-ba governu sira nia autoridade. Tuir livru Beyond Good Intentions hatete: “Maski sira fiar katak sira tenke hatudu respeitu ba governu, maibé ema kristaun iha tempu uluk la mete iha buat polítiku nian.” Hanesan neʼe mós, livru On the Road to Civilization hatete katak ema kristaun iha tempu uluk “la kaer pozisaun iha polítiku”.
Tanba ami hatudu neutrál ba buat polítiku nian neʼe katak ami perigu ba nasaun ka lae? Lae. Ami mak povu neʼebé buka dame no governu la presiza hanoin barak. Haree toʼok relatóriu husi National Academy of Sciences of Ukraine tinan 2001. Bainhira koʼalia kona-ba ami-nia neutralidade, relatóriu neʼe hatete, “Ohin loron, Ema balu karik sei la gosta Testemuña ba Jeová sira-nia desizaun neʼebé metin; tan neʼe ema Nazi no komunista sira fó terus ba sira”. Maski hetan terus husi Soviétika nia ukun, maibé Testemuña sira “nafatin hatudu sira-nia an nuʼudar sidadaun neʼebé halo tuir. Sira ho laran moos no haraik-an serbisu iha toos ka fabrika no sira la perigu ba Komunista”. Hanesan mós ohin loron, Testemuña ba Jeová nia fiar no atividade sira “la hanetik seguransa no unidade husi rai naran deʼit”, hanesan temi iha relatóriu neʼe.