Ita presiza tuir relijiaun ida ka lae?

Bíblia nia resposta

Sin, tanba Maromak hakarak ema atu halibur hamutuk hodi adora nia. Bíblia hatete: “Mai ita hanoin malu hodi fó laran-manas ba malu atu hatudu domin no hahalok diʼak, no maski ema balu sai toman ona atu la halibur hamutuk, maibé imi keta haluha atu halibur hamutuk.”​—Ebreu 10:24, 25.

Jesus hatudu katak ninia dixípulu sira sei iha organizasaun ida kuandu nia dehan ba sira: “Se imi hadomi malu, ema hotu sei hatene katak imi mak haʼu-nia dixípulu.” (João 13:35) Dalan importante ba Kristu nia dixípulu sira atu hatudu domin mak, liuhusi halibur hamutuk ho ema neʼebé iha fiar hanesan. Sira organiza an hodi sai kongregasaun sira neʼebé halibur hamutuk atu adora Maromak. (1 Korinto 16:19) Hamutuk, kongregasaun hotu sai parte ba família espirituál ida iha mundu tomak.​—1 Pedro 2:​17.

La toʼo atu tuir relijiaun deʼit

Bíblia hatudu katak ema tenke halibur hamutuk atu adora Maromak, maibé Bíblia la hanorin katak se ema sai membru husi relijiaun ida, neʼe bele halo Maromak kontente. Atu Maromak simu ita, relijiaun neʼe tenke book ita atu halo buat ruma iha ita-nia moris loron-loron nian. Porezemplu, Bíblia dehan: “Adorasaun neʼebé moos no la foʼer tuir ita-nia Aman Maromak nia hanoin mak neʼe: tau matan ba oan-kiak no feto-faluk sira iha sira-nia susar, no kontinua hadook an husi hahalok aat iha mundu neʼe.”​—Tiago 1:​27.