Seksu orál mak hanesan ho halo relasaun seksuál ka lae?

Sentru saúde kona-ba kontrola no prevene moras iha Estadus Unidus halo entrevista ba joven barak ho idade 15 toʼo 19 kona-ba seksu orál.a No rezultadu mak porsentu 50 husi joven sira-neʼe halo ona seksu orál. Sharlene Azam neʼebé hakerek livru Oral Sex Is the New Goodnight Kiss hatete: “Se Ita koʼalia ba joven sira kona-ba seksu orál, sira sente neʼe mak buat neʼebé baibain deʼit. No tuir sira-nia hanoin seksu orál la hanesan ho halo relasaun seksuál.”

• Ita hanoin oinsá?

• Faktu sira neʼebé Ita presiza hatene

• Tanbasá neʼe perigu?

Ita hanoin oinsá?

Hatán pergunta sira tuirmai neʼe:

1. Feto ida bele sai isin-rua tanba halo seksu orál ka lae?

   1. Bele

   2. Labele

2. Seksu orál perigu ba ita-nia saúde ka lae?

   1. Sin

   2. Lae

3. Seksu orál inklui relasaun seksuál ka lae?

   1. Sin

   2. Lae

Faktu sira neʼebé Ita presiza hatene

Kompara Ita-nia resposta ho faktu sira-neʼe.

1. Feto ida bele sai isin-rua tanba halo seksu orál ka lae?

   Resposta: Labele. Neʼe mak razaun neʼebé halo ema barak hanoin sala katak la perigu atu halo seksu orál.

2. Seksu orál perigu ba ita-nia saúde ka lae?

   Resposta: Sin. Ema neʼebé halo seksu orál bele kona moras epatite A ka B, futi iha oin-lulik, gonorreia, erpes, AIDS no sífilis.

3. Seksu orál inklui relasaun seksuál ka lae?

   Resposta: Sin. Hahalok hotu neʼebé envolve ema seluk nia oin-lulik, hanesan halo relasaun seksuál, seksu orál, seksu anal no mós halo masturbasaun ba ema seluk nia oin-lulik mak relasaun seksuál.

Tanbasá importante atu hatene kona-ba neʼe?

Hanoin toʼok eskritura balu tuirmai:

Bíblia hatete: “Maromak nia hakarak mak neʼe, katak imi tenke sai santu no hasees an husi sala seksuál.”​—1 Tesalónika 4:3.

Liafuan Gregu neʼebé tradús nuʼudar “sala seksuál” refere ba hahalok seksuál hotu neʼebé ema halo maski sira seidauk kaben, neʼe inklui halo relasaun seksuál, seksu orál, seksu anal no mós halo masturbasaun ba ema seluk nia oin-lulik. Ema neʼebé halo hahalok sala seksuál bele hetan rezultadu neʼebé aat. Rezultadu neʼebé aat liu mak sira-nia relasaun diʼak ho Maromak sai aat.​—1 Pedro 3:12.

Bíblia hatete: “Ema neʼebé halo sala seksuál, nia halo sala kontra ninia isin rasik.”​—1 Korinto 6:18.

Seksu orál bele estraga ita-nia saúde, ita-nia relasaun diʼak ho Maromak no mós bele fó impaktu ba ita-nia emosaun. Livru Talking Sex With Your Kids esplika katak bainhira ema halo relasaun seksuál naran deʼit iha situasaun sala, impaktu ba ema nia emosaun mak hanesan deʼit. Bainhira ema halo relasaun seksuál iha situasaun sala neʼe bele halo ema sente arrepende an, folin-laek no sente katak ema aproveita sira.

Bíblia hatete: “Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi.”​—Isaias 48:17.

Tuir Ita-nia hanoin, Maromak nia ukun-fuan kona-ba hahalok seksuál lori benefísiu ka lae? Ka Ita sente katak ukun-fuan neʼe hanetik Ita-nia liberdade? Hanoin toʼok ai-knanoik neʼe. Iha estrada ninin iha sinál tránzitu sira, hanesan velosidade máximu no sinál neʼebé haruka ema para. Sinál tránzitu sira-neʼe hanetik Ita-nia liberdade ka proteje Ita? Saida mak sei akontese se Ita no ema seluk la halo tuir sinál sira-neʼe?

Hanesan neʼe mós ho Maromak nia ukun-fuan sira. Se Ita lakohi halo tuir ida-neʼe, Ita sei hetan duni rezultadu aat. (Galásia 6:7) Livru Sex Smart hatete: “Se ita halo beibeik buat neʼebé ita hatene katak sala, ita sei la hafolin liután ita-nia an.” Maibé se Ita halo tuir Maromak nia ukun-fuan, Ita bele hatudu katak Ita iha morál neʼebé diʼak no loos. No Ita mós bele iha konxiénsia neʼebé moos.​—1 Pedro 3:16.