PERGUNTA HUSI JOVEN SIRA
Tanbasá mak Ita presiza hatudu hahalok laran-moos?
Tanbasá ema balu la hatudu hahalok laran-moos?
Ohin loron ema barak hanoin katak hatudu hahalok laran-moos la lori rezultadu neʼebé diʼak. Ema balu hanoin:
‘Se haʼu la bosok haʼu-nia inan-aman, karik haʼu sei hetan kastigu.’
‘Se haʼu la bosok iha ezame, karik haʼu sei hetan valór neʼebé ladiʼak.’
‘Se haʼu la naʼok sasán neʼe, neʼe katak haʼu presiza rai osan hodi hola.’
Karik ema balu hanoin: ‘La buat ida, tuir loloos ema hotu halo hanesan neʼe, loos ka lae?’
Tuir loloos, lae. Ema barak, inklui mós joven sira, hanoin katak importante atu hatudu hahalok laran-moos. Bíblia dehan: “Buat naran deʼit neʼebé ema kari, nia mós sei koʼa ida-neʼe.” (Galásia 6:7) Neʼe katak ita-nia hahalok sempre iha rezultadu, dala ruma rezultadu neʼebé diʼak, dala ruma ladiʼak.
Porezemplu, mai ita haree rezultadu ladiʼak balu neʼebé ema hetan ona tanba sira bosok.
“Haʼu bosok haʼu-nia amá katak haʼu la koʼalia ho joven mane ida. Nia hatene haʼu bosok. Haʼu bosok haʼu-nia amá ba dala tolu, ikusmai nia la kontente no fó kastigu ba haʼu. Durante semana rua, haʼu labele laʼo halimar no durante fulan ida haʼu labele uza haʼu-nia telemovel ka haree televizaun. Husi tempu neʼe toʼo agora haʼu nunka bosok tan haʼu-nia inan-aman.”—Anita.
Hanoin lai: Tanbasá Anita nia inan presiza tempu kleur atubele tau fiar ba nia?
Bíblia hatete: “Tanba agora imi husik tiha lia-bosok, imi ida-idak tenke koʼalia lia-loos ba malu.”—Éfeso 4:25.
“Haʼu hanoin haʼu konsege bosok haʼu-nia inan-aman, maibé tuir loloos lae. Bainhira sira haruka haʼu atu konta fali istória neʼe, haʼu labele hanoin-hetan saida mak haʼu konta uluk. Kuandu ita konta istória neʼebé loos, ita bele hanoin-hetan no konta fali ida-neʼe!”—Anthony.
Hanoin lai: Iha dalan saida deʼit mak Anthony bele hasees an husi situasaun hanesan neʼe?
Bíblia hatete: “Jeová hakribi ibun neʼebé koʼalia bosok, maibé ema neʼebé hatudu laran-metin halo nia kontente.”—Provérbios (Amsal) 12:22.
“Haʼu iha kolega ida neʼebé gosta aumenta istória naruk. Haʼu gosta nia, maibé haʼu koko atu la hanoin barak kona-ba ninia istória sira. Maibé susar tebes atu tau fiar ba nia.”—Yvonne.
Hanoin lai: Oinsá mak bosok uitoan bele estraga Yvonne nia kolega nia naran diʼak?
Bíblia hatete: “Ami hakarak atu hatudu laran-moos iha buat hotu.”—Ebreu 13:18.
Hanesan ho fundasaun neʼebé nakfera bele estraga uma tomak, hahalok la laran-moos bele estraga Ita-nia naran diʼak.
Tanbasá hatudu hahalok laran-moos lori rezultadu diʼak?
Agora, mai ita haree rezultadu diʼak balu neʼebé ema hetan ona tanba sira hatudu hahalok laran-moos.
“Feto ida laʼo iha haʼu-nia oin no nia osan monu. Haʼu foti osan neʼe no fó fali ba feto neʼe. Nia agradese tebes. Feto neʼe dehan ba haʼu: ‘Ita laran-diʼak loos. Ohin loron ema ladún hatudu hahalok laran-moos hanesan ita.’ Haʼu kontente tanba nia hafolin buat neʼebé haʼu halo!”—Vivian.
Hanoin lai: Tanbasá feto neʼe hakfodak bainhira Vivian hatudu hahalok laran-moos? Vivian hetan bensaun saida tanba nia hatudu hahalok laran-moos?
Bíblia hatete: “Ksolok ba sira neʼebé . . . sempre halo buat loos.”—Salmo (Mazmur) 106:3.
“Nuʼudar família ida ami halo serbisu atu hamoos fatin oioin. Dala ruma bainhira ami hamoos eskritóriu sira ami haree osan-besi iha rai. Bainhira ami hetan osan-besi neʼe ami sempre foti no tau iha meza neʼebé besik liu. Loron ida, serbisu-naʼin ida hakfodak no dehan ‘Diak hela sá, neʼe sentavu 10 deʼit!’ Maibé tanba ami-nia hahalok neʼe nia bele tau fiar ba ami.”—Julia.
Hanoin lai: Tanba Julia hatudu hahalok laran-moos iha situasaun hanesan neʼe, oinsá mak neʼe bele ajuda nia se nia presiza buka serbisu seluk?
Bíblia hatete: “Hakaʼas an hodi sai nuʼudar ema neʼebé Maromak simu, no nuʼudar serbisu-naʼin neʼebé la moe kona-ba buat ida.”—2 Timóteo 2:15.
“Bainhira haʼu simu haʼu-nia saláriu, sira fó osan liu tiha. Tuir loloos haʼu hakarak rai osan neʼe, maibé haʼu hatene diʼak liu se haʼu fó fali. Tuirmai haʼu fó-hatene haʼu-nia patraun no nia agradese tebes. Se haʼu la fó fali osan neʼe, haʼu sente hanesan haʼu mak naʼok-teen ida.”—Bethany.
Hanoin lai: Sala atu naʼok husi kompañia ida ka lae?
Bíblia hatete: “Jeová hakribi ema neʼebé laran-makerek, maibé nia sai belun neʼebé besik ho ema laran-loos.”—Provérbios (Amsal) 3:32.