PERGUNTA HUSI JOVEN SIRA
Haʼu bele rona ba múzika naran deʼit ka lae?
“Bainhira haʼu hadeer, haʼu loke múzika. Bainhira haʼu lori karreta, haʼu loke múzika. Bainhira haʼu iha uma maski deskansa, hamoos ka lee, múzika loke. Haʼu sempre rona ba múzika.”—Carla.
Hanesan ho Carla ita mós gosta múzika? Informasaun neʼe sei ajuda ita atu hetan benefísiu husi múzika, hasees husi lasu, no hili múzika ho matenek.
Benefísiu sira
Rona ba múzika hanesan ho han ai-han ruma. Buat neʼebé hanesan mak ita tenke hili didiʼak no hanoin kona-ba tempu. Porezemplu:
Múzika bele ajuda ita-nia emosaun.
“Se haʼu sente laran-kraik, haʼu loke múzika neʼebé haʼu gosta no lalais haʼu sente diʼak fali.”—Mark.
Múzika bele halo ita hanoin hetan buat ruma.
“Múzika ida bele halo haʼu hanoin memória ida, no neʼe halo haʼu sente kontente.”—Sheila.
Múzika bele ajuda ita iha unidade.
“Haʼu tuir reuniaun boot internasionál husi Testemuña ba Jeová, no bainhira ema hotu kanta knananuk ikus, haʼu komesa tanis. Maski ita koʼalia língua la hanesan, maibé múzika neʼe halo ami hotu iha unidade.”—Tammy.
Múzika bele ajuda ita haburas hahalok diʼak.
“Aprende atu toka instrumentu ida ajuda ita atu haburas pasiénsia no la rende an lalais. Presiza gasta tempu atu aprende. Atu sai matenek tenke treinu beibeik.”—Anna.
Ita hatene ka lae? Livru boot ida naran Salmo husi Bíblia iha knananuk 150.
Hanesan ita hili didiʼak kona-ba ai-fuan ruma, nuneʼe mós ita tenke hili didiʼak múzika
Lasu sira
Múzika balu mak hanesan ai-han neʼebé iha venenu iha laran. Porezemplu.
● Knananuk barak iha liafuan seksuál.
“Knananuk barak neʼebé ema gosta mak kona-ba buat seksuál. Artista sira kanta nakloke kona-ba hahalok seksuál.”—Hannah.
Bíblia hatete: “Iha imi-nia leet keta temi hahalok sala seksuál, hahalok oioin neʼebé la moos.” (Éfeso 5:3) Husu ita-nia an: ‘Múzika neʼebé haʼu rona bele hanetik haʼu atu halo tuir Bíblia nia konsellu ka lae?’
Múzika balu bele halo ita sente triste tebes.
“Dala ruma haʼu rona múzika iha kalan-boot neʼebé halo haʼu hanoin negativu no sente depresaun. Múzika neʼebé hamosu sentimentu triste bele estraga haʼu-nia hanoin.”—Tammy.
Bíblia hatete: “Proteje bá ó-nia laran, neʼe mak buat importante liu hotu neʼebé ó tenke proteje.” (Provérbios 4:23) Husu ita-nia an: ‘Múzika neʼebé haʼu rona mak halo haʼu fokus liu ba buat neʼebé negativu, ka lae?’
Múzika balu bele halo ita sente hirus.
“Múzika neʼebé iha liafuan hirus, odi ema seluk ka ita-nia an mak perigu ba haʼu. Haʼu nota katak se haʼu rona ba múzika neʼe haʼu-nia sentimentu sei troka. Haʼu-nia família mós nota.”—João.
Bíblia hatete: “Imi tenke soe tiha buat sira-neʼe hotu, katak laran-nakali, hirus, hahalok aat, koʼalia aat, no keta husik liafuan foʼer ida sai husi imi-nia ibun.” (Koloso 3:8) Husu ita-nia an, ‘Múzika neʼebé haʼu rona mak halo haʼu sente laran-nakali, no la hanoin ema seluk nia sentimentu, ka lae?’
Saida mak pontu importante? Hili didiʼak. Joven feton naran Julie hatete: “Haʼu nafatin haree ba haʼu-nia múzika no hapus múzika sira neʼebé la moos. Dala ruma la fasil atu halo ida-neʼe, maibé haʼu hatene neʼe mak loos.”
Joven feto seluk naran Tara mós konkorda. Nia dehan: “Knananuk balu iha melodia jeitu, maibé bainhira haʼu rona liafuan foʼer mosu haʼu tenke taka ka rona ba múzika seluk. Neʼe hanesan ita hahú han dose neʼebé gostu maibé derrepente tenke soe tiha dose neʼe! Maibé se haʼu laran-metin atu la rona múzika ida kona-ba buat seksuál, neʼe bele ajuda haʼu atu la halo buat seksuál antes haʼu kaben. Haʼu tenke kuidadu kona-ba oinsá múzika bele fó influénsia ba haʼu.”