Taru-osan sala ka lae?

Bíblia nia resposta

Maski Bíblia la koʼalia barak kona-ba taru-osan, ita bele hatene husi Bíblia nia matadalan katak Maromak haree taru-osan nuʼudar sala.​—Éfeso 5:​17.a

• Ema taru osan tanba kaan-teen, no neʼe hahalok neʼebé Maromak odi. (1 Korinto 6:​9, 10; Éfeso 5:​3, 5) Ema neʼebé taru osan hakarak hetan osan husi ema seluk neʼebé lakon. Maibé Bíblia haruka ita atu la kaan ema seluk nia sasán.​—Éxodo 20:17; Roma 7:7; 13:​9, 10.

• Maski taru osan ho folin neʼebé kiʼik, neʼe mós bele haburas domin ba osan no ikusmai bele lori problema boot.​—1 Timóteo 6:​9, 10.

• Dala barak, ema neʼebé taru osan buka sorte liuhusi lulik no buat seluk. Maibé, Maromak haree hahalok neʼe nuʼudar adorasaun falsu no nia la simu ida-neʼe.​—Isaias 65:11.

• Bíblia fó laran-manas ba ita atu serbisu makaʼas, laʼós atu hetan buat ruma gratis deʼit. (Eclesiastes 2:​24; Éfeso 4:​28) Sira neʼebé halo tuir Bíblia nia avizu bele “han ai-han neʼebé sira rasik hetan”.​—2 Tesalónika 3:​10, 12.

• Taru-osan bele haburas hakarak la diʼak atu manán ema seluk, no hahalok neʼe kontra Bíblia.​—Galásia 5:​26.