Bíblia hanorin katak ‘hetan salvasaun dala ida, hetan salvasaun ba nafatin’, neʼe loos ka lae?
Bíblia nia resposta
Lae, Bíblia la hanorin doutrina ‘hetan salvasaun dala ida, hetan salvasaun ba nafatin’. Ema neʼebé hetan salvasaun liuhusi fiar ba Jesus Kristu bele lakon fiar no lakon salvasaun. Bíblia dehan katak ita presiza hakaʼas an ka “luta makaʼas” atu mantein ita-nia fiar. (Judas 3, 5) Ema Kristaun iha apóstolu sira-nia tempu neʼebé simu ona Kristu simu konsellu neʼebé dehan: “Kontinua hakaʼas an atu hetan imi-nia salvasaun ho taʼuk no nakdedar.”—Filipe 2:12.
Eskritura sira neʼebé hatudu katak doutrina ‘hetan salvasaun dala ida, hetan salvasaun ba nafatin’ mak la loos.
Bíblia fó avizu kona-ba sala sériu oioin neʼebé halo ema labele tama ba Maromak nia Ukun. (1 Korinto 6:9-11; Galásia 5:19-21) Se doutrina ‘hetan salvasaun dala ida, hetan salvasaun ba nafatin’ mak loos, entaun avizu hanesan neʼe saugati deʼit. Bíblia dehan katak ema neʼebé hetan ona salvasaun bele lakon ida-neʼe se nia fila fali ba toman uluk nian hodi halo sala neʼebé sériu. Porezemplu, Ebreu 10:26 dehan: “Se ita halo beibeik sala ho neon bainhira ita hetan ona koñesimentu neʼebé loos kona-ba lia-loos, sei la iha tan sakrifísiu ba sala.”—Ebreu 6:4-6; 2 Pedro 2:20-22.
Jesus fó ilustrasaun ida hodi hanorin katak importante duni atu mantein ita-nia fiar. Nia kompara nia an ho uvas-hun no ninia dixípulu sira ho uvas-sanak. Dixípulu balu foufoun hatudu sira-nia fiar liuhusi hahalok, hanesan uvas-sanak neʼebé fó fuan, maibé liutiha tempu balu sira la fó fuan tan no sai hanesan “ai-sanak neʼebé soe tiha ona” no lakon salvasaun. (João 15:1-6) Apóstolu Paulo mós uza ilustrasaun neʼebé atu hanesan hodi dehan katak ema Kristaun neʼebé la mantein sira-nia fiar “sei tesi sai tiha”.—Roma 11:17-22.
Ema Kristaun simu mandamentu atu “matan-moris nafatin”. (Mateus 24:42; 25:13) Ema bele lakon sira-nia salvasaun se sira sai dukur iha dalan espirituál tanba halo “hahalok nakukun nian” ka la fó laran tomak ba serbisu neʼebé Jesus haruka sira atu halo.—Roma 13:11-13; Apokalipse 3:1-3.
Eskritura barak hatudu katak ema neʼebé hetan salvasaun tenke kontinua laran-metin hodi tahan toʼo rohan. (Mateus 24:13; Ebreu 10:36; 12:2, 3; Apokalipse 2:10) Ema Kristaun iha apóstolu nia tempu sente haksolok tebes kuandu rona katak sira-nia maluk Kristaun seluk tahan susar ho fiar metin. (1 Tesalónika 1:2, 3; 3 João 3, 4) Tanbasá mak Bíblia dehan katak importante atu laran-metin nafatin se ema neʼebé la laran-metin mós hetan salvasaun?
So deʼit kuandu apóstolu Paulo besik ona atu mate mak nia sente katak nia simu duni salvasaun. (2 Timóteo 4:6-8) Antes neʼe, nia rekoñese katak iha posibilidade atu la hetan salvasaun se nia monu ba hakarak isin nian. Paulo dehan: “Haʼu kontrola haʼu-nia isin no ukun haʼu-nia an hanesan atan, atu nuneʼe, kuandu haʼu haklaken tiha ba ema seluk, haʼu rasik la sai fali ema neʼebé Maromak la simu.”—1 Korinto 9:27; Filipe 3:12-14.