Moris dala ida tan katak sá?

Bíblia nia resposta

Liafuan “moris dala ida tan” refere ba relasaun espesiál entre Maromak no ema neʼebé moris dala ida tan. (João 3:3, 7) Maromak hakiak sira neʼebé moris dala ida tan sai nuʼudar ninia oan sira. (Roma 8:15, 16; Galásia 4:5; 1 João 3:1) Hanesan ho ema sira neʼebé ema seluk hakiak tuir lei legál, ema sira-neʼe mós sai fali parte ba Maromak nia família.​—2 Korinto 6:18.

Tanbasá mak ema ida moris dala ida tan?

Jesus hatete: “Se ema ida la moris dala ida tan, nia labele haree Maromak nia Ukun.” (João 3:3) Entaun, moris dala ida tan, prepara ema ida atu ukun hamutuk ho Kristu iha Maromak nia Reinu. Reinu ka governu neʼe sei ukun husi lalehan, entaun Bíblia esplika katak ema sira neʼebé “moris fali dala ida tan” sei hetan liman rohan iha lalehan. (1 Pedro 1:3, 4) Sira neʼebé moris fali hetan konfiansa katak sira sei ‘ukun hamutuk ho Kristu nuʼudar liurai’.​—2 Timóteo 2:12; 2 Korinto 1:21, 22.

Oinsá mak ema ida moris dala ida tan?

Bainhira Jesus koʼalia kona-ba neʼe, nia dehan katak sira neʼebé moris fali sei “moris husi bee no Maromak nia espíritu”. (João 3:5) Liafuan neʼe katak batizmu tiha ho bee tuirmai batizmu ho espíritu santu.​—Apóstolu 1:5; 2:1-4.

Jesus mak ema primeiru neʼebé moris fali dala ida tan. Jesus batizmu iha Mota Jordaun, depois neʼe Maromak hili (ka, fó batizmu) nia ho espíritu santu. Jesus moris fali nuʼudar Maromak nia oan neʼebé Maromak hili ho ninia espíritu santu. Tan neʼe, nia iha esperansa atu moris fali iha lalehan. (Marcos 1:9-11) Esperansa neʼe sai loos bainhira Maromak halo Jesus moris-hiʼas nuʼudar kriatura espíritu ida.​—Apóstolu 13:33.

Ema seluk neʼebé moris fali dala ida tan mós hetan batizmu ho bee antes sira simu espíritu santu.a (Apóstolu 2:38, 41) Depois neʼe sira mós iha esperansa neʼebé metin atu hela iha lalehan, esperansa neʼebé Maromak sei fó ba sira bainhira sira hetan moris-hiʼas.​—1 Korinto 15:42-49.

Hanoin neʼebé sala kona-ba moris dala ida tan

Hanoin neʼebé sala: Ema ida bele hili atu moris fali dala ida tan.

Faktu: Ema hotu hetan oportunidade atu iha relasaun neʼebé besik ho Maromak no hetan salvasaun. (1 Timóteo 2:3, 4; Tiago 4:8) Maibé, Maromak mak hili ema sira neʼebé sei moris dala ida tan, ka hili sira ho ninia espíritu santu. Tuir Bíblia, atu ema moris fali “laʼós depende ba ema nia hakarak ka ema nia hakaʼas an”, maibé depende ba Maromak. (Roma 9:16) Liafuan “moris dala ida tan” mós bele signifika “moris mai husi leten”, neʼe katak ema ida bele moris dala ida tan tanba “husi leten”, ka husi Maromak.​—João 3:3, nota-rodapé.