Batizmu katak sá?
Bíblia nia resposta
Batizmu katak hatama ema ida nia isin-lolon tomak iha bee laran.a Bíblia fó sai ezemplu barak kona-ba batizmu. (Apóstolu 2:41) Ezemplu ida mak Jesus, bainhira nia hetan batizmu, ninia isin-lolon tomak tama iha bee laran iha Mota Jordaun. (Mateus 3:13, 16) Tinan balu tuirmai, mane Etiópia ida mós hetan batizmu iha “bee-lihun” neʼebé besik dalan bainhira nia halo viajen daudaun.—Apóstolu 8:36-40.
Jesus hanorin katak ninia dixípulu sira presiza hetan batizmu. (Mateus 28:19, 20) Apóstolu Pedro mós fó sai ho klaru kona-ba neʼe.—1 Pedro 3:21.
Iha informasaun neʼe
Batizmu signifika saida?
Batizmu mak símbolu, ka buat neʼebé ema ida fó sai ba públiku katak nia arrepende an husi ninia sala no promete ba Maromak atu kumpre Ninia hakarak iha situasaun naran deʼit. Neʼe inklui sempre halo tuir Maromak no Jesus iha ninia moris tomak. Ema neʼebé hetan batizmu komesa laʼo ida dalan neʼebé lori ba moris rohan-laek.
Hatama isin-lolon tomak ba bee laran mak símbolu neʼebé diʼak atu hatudu katak ema neʼe nia moris iha mudansa boot. Oinsá? Bíblia kompara batizmu ho hakoi mate. (Roma 6:4; Koloso 2:12) Kuandu hatama ema ida ba bee laran, neʼe hatudu katak ema neʼe nia moris uluk nian mate ona. Kuandu nia sai husi bee, neʼe katak nia komesa ninia moris foun nuʼudar ema Kristaun neʼebé dedika an ona ba Maromak.
Saida mak Bíblia dehan kona-ba batizmu ka sarani bebé?
Bíblia la temi kona-ba fó batizmu ba bebé.b Bíblia mós la hanorin katak labarik kiʼik sira tenke hetan batizmu.
Tuir loloos, Bíblia nia hanorin la apoia batizmu ba labarik kiʼik sira. Bíblia hanorin katak ema neʼebé hakarak hetan batizmu presiza kumpre kritéria balu. Porezemplu, nia presiza komprende hanorin báziku husi Maromak nia Liafuan no moris tuir buat neʼebé nia aprende. Nia mós presiza arrepende an ona husi ninia sala. No liuhusi orasaun, nia dedika ninia moris ba Maromak. (Apóstolu 2:38, 41; 8:12) Labarik kiʼik labele halo buat sira-neʼe hotu.
Hetan batizmu hodi Aman, Oan no espíritu santu nia naran, neʼe katak sá?
Jesus haruka ninia dixípulu sira: “Hanorin ema atu sai haʼu-nia dixípulu, fó batizmu ba sira hodi Aman, Oan no espíritu santu nia naran. Hanorin sira atu halo tuir mandamentu hotu neʼebé haʼu fó ona ba imi.” (Mateus 28:19, 20) “Hodi Aman, Oan no espíritu santu nia naran” signifika katak ema neʼebé hetan batizmu rekoñese Aman no Oan nia kbiit no pozisaun, no nia mós rekoñese kbiit husi Maromak nia espíritu santu. Atu komprende liután: Apóstolu Pedro hatete ba mane ida neʼebé moris mai ain-aat: “Hodi Jesus Kristu ema Nazaré nia naran, haʼu hatete bá ó, laʼo bá!” (Apóstolu 3:6) Ita bele komprende ho klaru katak Pedro rekoñese Kristu nia kbiit no fó sai katak nia halo milagre neʼe ho Kristu nia kbiit.
“Aman” refere ba Maromak Jeová.c Nuʼudar Kriadór, Moris nia Hun, no Maromak Kbiit Boot Liu, Jeová mak iha autoridade neʼebé boot liu hotu.—Génesis 17:1; Apokalipse 4:11.
“Oan” mak Jesus Kristu, neʼebé fó ninia moris mai ita. (Roma 6:23) Ita labele hetan salvasaun se ita la rekoñese no la hafolin Jesus nia knaar importante atu kumpre Jeová nia hakarak ba ema.—João 14:6; 20:31; Apóstolu 4:8-12.
“Espíritu santu” mak Maromak nia forsa neʼebé ativu, ka ninia kbiit neʼebé kumpre buat ruma.d Maromak uza ninia espíritu santu atu kria no fó moris, atu hatoʼo mensajen ba ninia profeta no ema seluk, no atu fó forsa ba sira hodi bele halo tuir ninia hakarak. (Génesis 1:2; Job 33:4; Roma 15:18, 19) Maromak mós uza espíritu santu hodi dirije ninia atan sira atu hakerek Bíblia hodi fó sai Ninia hanoin.—2 Pedro 1:21.
Sala ka lae atu hetan batizmu dala rua?
Ema barak deside atu troka sira-nia relijiaun. Maibé oinsá se sira hetan ona batizmu iha sira-nia igreja uluk nian? Sala ka lae atu hetan batizmu ba dala rua? Ema balu dehan neʼe sala, karik sira hanoin sira-nia resposta neʼe bazeia ba Éfeso 4:5, neʼebé dehan: “Iha Naʼi ida deʼit, fiar ida deʼit, batizmu ida deʼit.” Maibé eskritura neʼe la dehan katak ema labele hetan batizmu ba dala rua. Oinsá?
Kontestu. Kuandu apóstolu Paulo hakerek Éfeso 4:5, nia esplika katak ema Kristaun neʼebé loos presiza iha unidade kona-ba sira-nia fiar no hanorin. (Éfeso 4:1-3, 16) Sira bele iha unidade hanesan neʼe só deʼit se sira tuir Naʼi ida deʼit, neʼe mak Jesus Kristu, no iha fiar ida deʼit, ka hanoin neʼebé hanesan kona-ba Bíblia nia hanorin. Sira mós presiza kumpre kritéria neʼebé hanesan bazeia ba Bíblia hodi hetan batizmu.
Apóstolu Paulo anima ema balu neʼebé hetan ona batizmu atu hetan fali batizmu tanba bainhira sira hetan batizmu ba dala primeiru, sira seidauk komprende loloos hanorin Kristaun nian.—Apóstolu 19:1-5.
Batizmu presiza bazeia ba saida. Atu halo Maromak kontente, ita-nia batizmu tenkesér bazeia ba koñesimentu neʼebé loos kona-ba lia-loos husi Bíblia. (1 Timóteo 2:3, 4) Se ema ida hetan batizmu bazeia ba relijiaun nia hanorin neʼebé kontra Bíblia, Maromak la rekoñese ida-neʼe nuʼudar batizmu neʼebé vale. (João 4:23, 24) Karik ema neʼe hakarak duni atu halo Maromak kontente, maibé “laʼós tuir koñesimentu neʼebé loos”. (Roma 10:2) Atu Maromak bele simu ema neʼe, nia presiza aprende lia-loos husi Bíblia, aplika buat neʼebé nia prende, dedika ninia moris ba Maromak, no hetan fali batizmu. Iha situasaun hanesan neʼe, hetan batizmu ba dala rua la sala. Tuir loloos, nia presiza halo nuneʼe duni.
Batizmu seluk neʼebé Bíblia temi
Bíblia mós temi kona-ba batizmu seluk neʼebé iha signifikadu la hanesan ho ema Kristaun nia batizmu neʼebé hatama isin-lolon ba bee laran. Haree toʼok ezemplu balu tuirmai.
Batizmu husi João Batista.e João fó batizmu ba ema Judeu no mós ba ema seluk neʼebé tama ona relijiaun Judeu nian. Batizmu neʼe sai nuʼudar símbolu atu hatudu katak sira arrepende an husi sala neʼebé sira halo hodi kontra Maromak nia Ukun-Fuan liuhusi Moisés. João nia batizmu prepara dalan ba ema atu rekoñese no simu Jesus Nazaré nuʼudar Mesias.—Lucas 1:13-17; 3:2, 3; Apóstolu 19:4.
Jesus nia batizmu. Batizmu neʼebé Jesus hetan husi João Batista mak úniku. Jesus mak ema neʼebé perfeitu no nunka halo sala. (1 Pedro 2:21, 22) Tan neʼe, Jesus hetan batizmu laʼós atu hatudu katak nia arrepende an ka ‘husu Maromak hodi bele iha konxiénsia neʼebé diʼak’. (1 Pedro 3:21) Jesus nia batizmu hatudu katak nia entrega an ba Maromak atu kumpre Maromak nia hakarak no halaʼo ninia knaar nuʼudar Mesias, ka Kristu. Neʼe inklui fó ninia moris atu salva ita.—Ebreu 10:7-10.
Batizmu ho espíritu santu. João Batista koʼalia kona-ba batizmu ho espíritu santu, nuneʼe mós Jesus Kristu. (Mateus 3:11; Lucas 3:16; Apóstolu 1:1-5) Batizmu neʼe la hanesan ho batizmu hodi espíritu santu nia naran. (Mateus 28:19) Oinsá?
Ema uitoan deʼit husi Jesus nia dixípulu sira mak hetan batizmu ho espíritu santu. Ema sira-neʼe simu espíritu santu iha dalan espesiál no hetan knaar atu serbí hamutuk ho Kristu iha lalehan nuʼudar ninia maluk liurai no amlulik neʼebé ukun mundu.f (1 Pedro 1:3, 4; Apokalipse 5:9, 10) Sira-nia povu mak Jesus nia dixípulu millaun ba millaun neʼebé iha esperansa atu moris ba nafatin iha mundu Paraízu.—Mateus 5:5; Lucas 23:43.
Batizmu iha Kristu Jesus no batizmu iha nia mate. Ema neʼebé hetan batizmu ho espíritu santu mós hetan “batizmu iha Kristu Jesus”. (Roma 6:3) Batizmu neʼe aplika deʼit ba Jesus nia dixípulu sira neʼebé hetan ona knaar atu ukun hamutuk ho nia iha lalehan. Hodi hetan batizmu iha Jesus, sira sai membru ba kongregasaun Kristaun espesiál. Jesus mak Ulun, no sira mak isin-lolon.—1 Korinto 12:12, 13, 27; Koloso 1:18.
Ema Kristaun sira-neʼe mós hetan “batizmu iha [Jesus nia] mate”. (Roma 6:3, 4) Neʼe katak sira banati-tuir Jesus nia ezemplu no uza sira-nia moris tomak atu halo tuir Maromak duké buka sira rasik nia haksolok, no sira mós husik esperansa atu moris ba nafatin iha mundu. Sira hetan batizmu ida-neʼe ho kompletu bainhira sira mate no hetan moris-hiʼas nuʼudar kriatura espíritu iha lalehan.—Roma 6:5; 1 Korinto 15:42-44.
Batizmu ho ahi. João Batista dehan ba ema neʼebé rona nia: “Nia [Jesus] sei fó batizmu ba imi ho espíritu santu no ahi. Nia kaer ona ninia garfu boot atu haliri trigu, no nia sei hamoos hotu fatin sama trigu nian no haloot trigu ba armazén, maibé nia sei sunu trigu-kulit ho ahi neʼebé labele hamate.” (Mateus 3:11, 12) Eskritura neʼe fó sai diferensa entre batizmu ho espíritu santu no batizmu ho ahi. João nia liafuan neʼe katak sá?
Trigu reprezenta ema neʼebé rona no halo tuir Jesus. Sira iha esperansa atu hetan batizmu ho espíritu santu. Trigu-kulit reprezenta ema neʼebé lakohi rona ba Jesus. Rezultadu mak sira sei hetan batizmu ho ahi, katak mate ba nafatin.—Mateus 3:7-12; Lucas 3:16, 17.
a Tuir Vine’s Complete Expository Dictionary of Old and New Testament Words, liafuan Gregu neʼebé tradús nuʼudar “batizmu” signifika “hatama ba bee laran”.
b Bainhira bebé ida hetan “sarani” ka “batizmu” iha igreja balu nia serimónia, nia hetan naran sarani no amlulik ida hisik ka fui bee ba bebé neʼe nia ulun.
c Jeová mak Maromak nia naran. (Salmo 83:18) Haree informasaun “Sé mak Jeová?”
d Haree informasaun “Saida mak espíritu santu?”
e Haree informasaun “Sé mak João Batista?”
f Haree informasaun “Sé mak sei bá lalehan?”
g Bíblia mós uza liafuan “batizmu” atu koʼalia kona-ba serimónia hamoos nian balu, hanesan hatama ekipamentu sira iha bee laran. (Marcos 7:4; Ebreu 9:10, nota) Klaru katak neʼe la hanesan duni ho batizmu neʼebé Jesus ho ninia dixípulu sira hetan.